مطلوب عروسة
إيمان العادلى
الحلقة العاشرة
بعد ماشفت العجب فى عرايسى أللى شفتهم واللى كنت ناوى أديهم شرف خطوبتى والأنتساب ل حمادة وعيلته بس ملهمش فى الطيب نصيب قررت أسافر أنا وصحابى يومين أهدى أعصابى ونروح العين السخنه و ٠٠٠٠٠٠٠
حازم : شفت يا حمادة بنحبك أزاى كلنا خدنا أجازة وسافرنا معاك يومين علشان تنسى وتفصل شوية من موضوع الجواز ده
حمادة :حبايبى انتم أللى باقيين ليا بصحيح بلا عرايس بلا وجع دماغ
ضياء : أستنوا بقى حسلم على عمو توحيد وعيلته صاحب بابا قصادنا على البسين اهو
وبعد سلامات وتحيات عمو توحيد عنده بنت قمر 14 وهوبه ضياء فكر فيها ونشوف ٠٠٠٠
ضياء : بص بقى يا حمادة من غير كلام كده أنا أتفقت لك مع عمو توحيد نزوره الخميس الجاى وحكتله كل حاجة عنك وهو مرحب بيك وتشوف بنته القمراية شهد يمكن يحصل نصيب
حمادة : يووووة عروسة تانى بس إن مكنتش تحلف هى قمر بصحيح يا ضياء يبقى توكلنا على الله و ٠٠٠٠٠٠
جهز يا بابا التورتة وأمرك لله وبينا على العروسة و ٠٠٠٠
أبو العروسة : أهلا وسهلا شرفتونا
أزيك يا ضياء منور يا حبيبى أهلا بعريسنا القمر أتفضلوا
الحاج محمود : منورة بيك توحيد بك وبعروستنا القمر
حمادة : شفتى يا ماما ناس أستايل خالص ومش معقدين ده العروسة هى اللى فتحت لنا الباب بنفسها
مش نقعد بالساعتين ويطلعوا عينى علشان أشوفها
بحب انا الناس الفرى دى مش المعقدين
الحاجة أميمة : ربنا يسترها يا أبنى ويطلعوا ناس كويسين
حمادة: أنتى شايفة أهو شقتهم تجنن عاملة زى القصور ومامتها شبه هوانم جاردن سيتى
أم العروسة: تعالى يا حاجة أميمة وأنت يا حاج محمود نقعد شوية فى التراس هنا هواء طبيعى أجمل من التكييف وههههه نسيب العرايس ياخدوا راحتهم
وهوبه ٠٠٠٠٠٠
شهد (العروسة) : أزيك يا حمادة ممكن أناديك حمادة من غير كلاكيع وأستاذ وكده
حمادة : أه براحتك خالص أنا مبحبش الكلكعة برضه
شهد : (أوكيه) كده( فانى) خالص قولى بقى هوايتك ايه يا بيبى
حمادة : مين بيبى حضرتك بتكلمينى أنا أنسة شهد
شهد : أه انت بدلعك وبعدين بلاش أنسه دى قولى يا شوشو ههههه زى ما بقولك يا حمادة ها أيه هوايتك يعنى مثلا بتحب السفارى والتخييم واووو يجنن ولا بتتزحلق على الامواج زييا ولا بتلعب أسكواش فى النادى ولا أيه بالظبط
ماهو( ريلى) يعنى لك هواية
حمادة : أه أنا بحب اشوف كورة بشجع ريال مدريد هى دى هوايتى
معنديش وقت تانى يدوب الشغل واخد وقتى وكده
شهد :أوووه أزاى يعنى وقتك كله (بيزنيس) وبس كده (اوفر )أووى مفيش تجديد بص بقى (إكستجلى) لما نتخطب حعرفك على( الفريند ) بتوعى والشلة ونعمل سفارى فى شرم يجنن ونخيم هناك وناخد خيمة أنا وانت ههههه خطيبى بقى
(الفريندز )حيتغاظوا منك أووى واووو ويتجننوا أنى اتخطبت
حمادة : عال اوى هو والد حضرتك بيسيبك تخيمى كده مع اصحابك ومبيكونش معاكى وأنتى مسافرة او حد من أخواتك أو مامتك مثلا بتكون معاكى
شهد : (نوووو) طبعا أنا ليا حريتى كاملة أسافر براحتى مع( الفريند) بتوعى هو فى حد بيسافر مع عيلته دلوقتى يا حمادة أنت بينك دقه قديمة من بتوع زمان ههههه
حمادة : تصدقى بينى كده فعلا
هو حضرتك وافقتى على زيارتى ليه وموضوع الخطوبة وكده يعنى
شهد : اه اقولك الصراحة ومتزعلش يا بيبى حكم انا أحب الصراحة أووى
حمادة : اه قولى ( ما هى شكلها خربانة )
شهد : اصل شاهيناز (البيست فريند) بتاعتى أتخطبت ووقتها مبقاش للشلة خالص وكل شوية تقولى خطيبى وتعزمه على السفارى ويخيموا سوا وانا متغاظة منها لحد ما انت ظهرت يا بيبى وشكل موضوع الخطوبة ده حلو أوووى و ٠٠٠٠
أبو العروسة : ماشاء الله عليكم جوز عصافير يا ناس كأنكم تعرفوا بعض من سنين مش كده يا حاج محمود
الحاجة أميمة : مالك يا واد متنح ليه ما أحنا سيبنكم يجى ساعتين مع بعض انت والعروسة حصل ايه مالك
حمادة : الهانم عاوز تتخطب علشان تخيم معايا لوحدنا يا ماما
الحاجة أميمة : تخيم أزاى يا أبنى ودى حاجة حلوة ولا حاجة وحشة يعنى
الحاج محمود : أظن كده الجواب باين من عنوانه والعروسة مبسوطة وأيه رايك يا توحيد بك نحدد ميعاد للخطوبة و ٠٠٠٠٠
حمادة : لأ يا بابا أستنى شوية لما أفكر يعنى يومين تلاتة كده
الحاج محمود : ليه يا واد فى أيه فين الإشارة مدتهنيش ليه من بدرى
ابو العروسة : أيه يا حمادة 3 أيام أيه أنا بشترى راجل وأنت راجل وعجبتنى وانا أشتريتك ههههه وموافق عليك وانت عليك الشقة وأنا حجهزها لك من الأبرة للصاروخ والفرح (والهانى مون) عليا كمان ايه رأيك يا عريس
حمادة : أنا راجل محدش يشترينى أنا أللى بشترى النسب والعيلة والتربية وبشترى مراتى بنور عيونى يا بك
ومعهلش مضطر أعتذر عن الزيارة
وبنت حضرتك للأسف متناسبنيش
ربنا يرزقها حد من مستواها يكون بيعرف يخيم
يلا يا بابا يلا يا ماما
إمشى قدامى يا ضياء الزفت أنت
وهيييه دنيا بقى
أستنونى بكرة وحلقة جديدة
