القرين

سهرة الرعب عبارة موضوع من اختياركم هنتكلم عن الموضوع الأكتر طلب علي الصفحة ( القرين ) بس المرة دي بدري شوية عشان انهاردة الجمعة اجاز بقي .

 

⁕⁕ – نبدأ برأي الدين . ⁕⁕

 

◼ – أدلة وجود القرين في القرآن والسنة.

⬣ – في القران يقول الله تعالى ( قَالَ قَرِينُهُ رَبَّنَا مَا أَطْغَيْتُهُ وَلَكِنْ كَانَ فِي ضَلالٍ بَعِيدٍ) سورة قّ الآية 27 .

⬣ – في السنة فروى مسلم من حديث عائشة رضي الله عنها أنها قالت لرسول الله صلى الله عليه وسلم “أو معي شيطان؟ قال: نعم، قلت: ومع كل إنسان، قال: نعم، قلت: ومعك يا رسول الله؟ قال: نعم! ولكن ربي أعانني عليه حتى أسلم” .

⬣ – المفروض المسلم المؤمن بالقرآن و السنة يصدق بوجوده ميقولش دي خرافات .

 

آيات ورد فيها ذكر “القرين”

⬣ – حَتَّىٰ إِذَا جَاءَنَا قَالَ يَا لَيْتَ بَيْنِي وَبَيْنَكَ بُعْدَ الْمَشْرِقَيْنِ فَبِئْسَ الْقَرِينُ ﴿٣٨ الزخرف﴾

⬣ – وَالَّذِينَ يُنفِقُونَ أَمْوَالَهُمْ رِئَاءَ النَّاسِ وَلَا يُؤْمِنُونَ بِاللَّهِ وَلَا بِالْيَوْمِ الْآخِرِ ۗ وَمَن يَكُنِ الشَّيْطَانُ لَهُ قَرِينًا فَسَاءَ قَرِينًا ﴿٣٨ النساء﴾

⬣ – قَالَ قَائِلٌ مِّنْهُمْ إِنِّي كَانَ لِي قَرِينٌ ﴿٥١ الصافات﴾

⬣ – وَقَيَّضْنَا لَهُمْ قُرَنَاءَ فَزَيَّنُوا لَهُم مَّا بَيْنَ أَيْدِيهِمْ وَمَا خَلْفَهُمْ وَحَقَّ عَلَيْهِمُ الْقَوْلُ فِي أُمَمٍ قَدْ خَلَتْ مِن قَبْلِهِم مِّنَ الْجِنِّ وَالْإِنسِ ۖ إِنَّهُمْ كَانُوا خَاسِرِينَ ﴿٢٥ فصلت﴾

⬣ – وَمَن يَعْشُ عَن ذِكْرِ الرَّحْمَـٰنِ نُقَيِّضْ لَهُ شَيْطَانًا فَهُوَ لَهُ قَرِينٌ ﴿٣٦ الزخرف﴾

⬣ – وَقَالَ قَرِينُهُ هَـٰذَا مَا لَدَيَّ عَتِيدٌ ﴿٢٣ ق﴾

⬣ – قَالَ قَرِينُهُ رَبَّنَا مَا أَطْغَيْتُهُ وَلَـٰكِن كَانَ فِي ضَلَالٍ بَعِيدٍ ﴿٢٧ ق﴾

 

⁕⁕ – ندخل علي الجزء التاني الماورائيات . ⁕⁕

 

◼ – تعريف القرين

 

⬣ – القرين هو الجن ( الشيطان ) الملازم للأنسان من وقت ولادته لحد موته وانا قولت شيطان لأن من شياطين الجن المرافق للأنسان مهمه الغواية و الوسوسه و الضلال عن طريق الله تعال .

⬣ – يقال تسميته بالقرين لأنه بيعمل كل صفات الأنسان كاملة و بيكون كمان سبب في هموم الأنسان و كوابيسه .

⬣ – يعتقد انه من ارقي و اشرس طبقات الجن .

 

◼ – صفات القرين

 

⬣ – الخبث . ⬣ – العند . ⬣ – المكر .

⬣ – مخلوق ذكي جدا ذكاء خارق .

⬣ – بيقدر يسطير علي العقل البشري بسهوله .

⬣ – من صفاته انه من الصعب السيطرة عليه او حرقه طالما صاحبه لسه عايش .

 

◼ – كل اللي اتقال عن القرين .

 

◼ – ليه بننسي الحلم لما نصحي .

⬣ – يقال ان بيكون سبب من الأسباب ان الأنسان لما يصحي من النوم ينسي الحلم اللي حلمه وهو نايم لسبب ما .

 

◼ – القرين بيختار لبسك .

⬣ – بعض العلماء بتقول ان القرين بتفاعل مع النفس بمعني لو جايب طقم جديد وبتقيسه قدام المرايا عشان تشوفه حلو او لأ وقتها انت بتقتنع بالأجابة اللي جايه من القرين انت مش مخك اللي جاوب ده القرين ووقتها انت بتقتنع وتقول ده البنطلون ده حلو او الفستان ده جميل عليا جدا انا شكلي حلو فيه او لأ ده شكله وحش انا مش حابه .

 

◼ – القرين و السرحان .

⬣ – لما تفكر او تسرح في موقف ما وتقول انا هتصرف ازاي في الموقف ده في وقتها القرين بيديك الفكره من خلال انه بيعيش او يروح المكان للحظة وينقلك شكل التجربه هتبقي عامله ازاي زي ما انت بتتخيل نفسك لو عملت كذا وتتخيل الموقف في نفس الوقت ده مش انت اللي بتعمل كده لأ ده القرين .

 

◼ – الأرتياح او النفور في المقابلة الأولي .

⬣ – لما بتقابل حد من اول مره وترتاحله او تتقفل منه او مش طايق تتعامل معاه ده بيبقي عن طريق انطباع القرين بتاعك وبتاعه من اللقاء الأول .

 

◼ – بتسمع صوت في راسك .

⬣ – ساعات تلاقي نفسك بتكلم نفسك في دماغك و تبقي سامع صوت نفس صوتك نفس النبره وحتي الطريقة بيتقال ان القرين بيقدر يطابق صوتك بنفس الصوت ويبدأ يكلمك ويوسوس بأفكار تخليك تأذي نفسك او تأذي غيرك ساعات الصوت ده بيأثر عليك تماما ويتحول لمرص نفسي و هلاوس .

◼ – القرين بعد الوفاة .

⬣ – القرين بيقال ان بيبقي ساكن اماكن الناس اللي ما*تت بطريقة ما او اتع*ذبت لأن اعمارهم اكبر من اعمار البشر فبيفضل القرين عايش بعد مو*ت صاحبه فتره طويلة ويعيش في المقابر ساعات لو المتوفي اتعرض لمو*ته غريبه او اتعرض للخي*انه او للق*تل بيسكن المكان اللي ما*ت فيه و يتشكل علي شكل المتوفي وممكن كمان يستخدم نبره صوته .

 

◼ – طب سؤال هو ليه بيطلع في اماكن حصل فيها كده واماكن لأ .

⬣ – مفيش اجابه واضحه علي كده طب هو بيمو*ت بمو*ت صاحبه في ناس بتقول اه وفي ناس بتقول بيعيش لفتره طويلة .

 

◼ – القرين والحزن .

⬣ – لما تكون حزين قرين بيطبب عليك ويواسيك ويحضنك وده سبب في ارتفاع درجه حرارة الجسم اثناء البكاء وفي تفسير علمي بيقول ده بسبب الضغط النفسي و العصبي اللي بيتسبب في ارتفاع درجه حراره الجسم .

 

◼ – القرين بينام .

⬣ – القرين مش بنام بيفضل قاعد جنبك ويتأملك ويستني عشان تصحي ويبدأ يتجول في المكان اللي انت نايم فيه ويتعمد يوقع حاجه عشان يصحيك وانت تصحي مخضوض .

 

◼ – القرين بيبكي .

⬣ – بيقال ان القرين بيبكي مره واحده لما بيم*وت صاحبه .

 

◼ – القرين بينتقم لصاحبه .

⬣ – لو اتخانقت مع شخص وبعد فتره بسيطه الشخص ده تعب بيقال ان القرين بيضايق لزعلك و بينتقم ليك بدون تفكير .

 

◼ – القرين و صفير الأذن .

⬣ – صوت الصفير اللي بتسمعه في ودنك بيكون عايز يتواصل معاك ويشيل الحواجز اللي محجوب عنك بيها علميا بيقال ان بسبب الدوشه اللي اتعرضت ليها كتير او انسداد في الودن زي ما بتكون في فرح وتروح البيت و تحس ان الفرح لسه شغال في ودنك ومتعرفش تنام بسببها .

 

◼ – ضربات القلب السريعة والرعشة .

⬣ – لما تحس بضربات قلبك سريعه جدا بيكون بسبب ان القرين شاف مارد او حاجه اكبر منه بكتير فبيستخبي ويبدأ يترعش وانت من كتر خوفه انت بتخاف وتقول انا اترعشت فجأة او قلبي دق بسرعه بدون سبب الماورائيات بتقول ان ده السبب .

 

◼ – القرين و المرايا .

⬣ – انتي بقي بتقفي قصاد المرايا وبتعيطي في الحمام دي كارثة خلي بالك عشان بتصعبي عليه واكيد مش لطيف انك تصعبي علي قرين او جن لأنك مش هتستحملي تعاطفه ده لأ تعاطفه ده مش هتستحمليه بأي صورة .

 

◼ – القرين و الكوابيس

⬣ – بيقال ان القرين ساعات بيجي في الكوابيس و يتشكل علي شكل قط او تعبان او شخص دميم ومخيف و ساعات شخص في غايه الجمال .

 

ملحوظة القرين ضعيف بالاستعانة بالله و ميقدرش يتحكم فيك طالما محافظ على العبادات وطالما في تحصين دايما للنفس مفيش اي ضرر بإذن الله.