هكتب بكل عامية
خالد المنصوري/مصر
هكتب بكل عامية
كلام لناس عادية
لحنها ينفع أغنية
معانيها كلها حنية
ساعات تلاقيها أمنية
تفصل منه ألف جلابيه
قماشته واسعة مكفية
لا وزن ولا بحور شعرية
بنام وأقوم ساعه الفجرية
أكتب زجل فى الصباحية
وأنام لى حبة الضهرية
وأكتب كمان فى العصرية
كلام بقوله بكل حرية
وقت ما أعوز يجى عاليه
فى حاجة أكتبها غية
شاعر وبقى ليا شعبية
بكتب كلام الناس عاديه
عبد السلام يعرف يقراه
أوام أوام يفهم معناه
لو أشتكى يلاقى الآه
وإن يوم قال موال يامحلاه
شاعر بكل شاب موجوع
وكل بيت ميت من الجوع
شاعر وعارف إيه الموضوع
شعره صبح كلام مسموع
ولا فتح ولا كسر ولا مرفوع
شاعر بريح من الأوهام
وساعات بفوق من الأحلام
ساعات بروج حلو كلام
وساعات بيصلح وقت خصام
أبوزيد ساعات يكون ضرغام
وساعات بدوق ذل الأيام
بفرح وأحزن وأصحى وأنام
ما أنا بكتب عامية بسلام
هكتبها لناس اللي تفهم معناه
خالدالمنصوري
