مش لازم تكون ملحوظ

سلمى عبد السلام شعبان

كل مجتمع وليه ثقافته وكمان ليه الأمراض الاجتماعية اللي بيصاب بيها. مفيش مجتمع مفيش فيه أمراض اجتماعية متفشية، دا حتى كل طبقة في أي مجتمع بيكون ليها أمراضها الخاصة واللي حتى بيها بنقدر نميز بيها طبقة عن غيرها. لكن في عصرنا الحالي ظهرت لنا السوشيال ميديا واللي من خلالها ظهرت بعض السمات واللي أصبح بعضها بيعتبره بعض العلماء اضطراب من الاضطرابات النفسية الجديدة، طبعا كلنا قرينا البوستات اللي بتقول إن بعض الباحثين رصدوا من خلال دراسة جديدة إن مدمني السليفي اللي بينشروها على مواقع التواصل الاجتماعي بيعانوا بشكل كبير من رغبتهم في الحصول على القبول عند الآخرين لأنهم بيعانوا من افتقادهم للقبول. وبحسب موقع السي إن إن الدراسة دي اتعملت في تايلند وشملت ثلاثمئة متطوع ووصلوا إن بعض الأشخاص من مدمني السليفي ممكن كمان يكونوا بيعانوا من بعض الإضطرابات العقلية.

فكرت كتير في الدراسة اللي كتير من الناس بقت تتريق عليها وتقول أنا عندي إضطراب سيلفي، دا كمان في بعض الناس بقت بتتصور كنوع من الإثبات إنهم مش مصدقين الكلام دا، وقفت عند فكرة افتقاد القبول عند الآخرين، واقتنعت بيها تمامًا. مين فينا مش محتاج يلاقي قبول عند اللي حواليه، ويحس بقيمته وقيمة وجوده في الحياة، ومين فينا معداش عليه ناس مش مقدرين وجوده في حياتهم ولا حتى حاسين إنهم لو فقدوه مش هيزعلوا عليه ولا حد ممكن يتأثر بعدم وجوده، وجت ليه مواقع التواصل الاجتماعي عشان يكون ملحوظ من أي حد وكل حد حتى لو ناس ميعرفهاش وتعرفه، ويعوضوه أهم إحساس ممكن إنسان يتمناه أنه يكون ملحوظ. طيب مين فينا معداش عليه نموذج أو أكتر في حياته بيعاني من عدم تقدير الناس ليه وبيعمل أي حاجة وكل حاجة عشان الناس تشوفه ويقولهم أنا أهوه حتى لو بشيء ممكن يستهجنوه أو حتى يشتموه عليه.

لكل واحد حاسس أنه مش ملحوظ والسوشيال ميديا قدمت له الحل عشان يكون ملحوظ أحب أقوله: مش لازم أبدًا تكون ملحوظ. مش لازم تستنى الناس تقدر اللي بتعمله أو اللي مش بتعمله. مش لازم تقول للناس سافرت ورحت وجيت وحبيت، مش لازم تكون ملحوظ بس لازم تكون مؤثر، لازم تحس أنك مهم وليك قيمة وسط الناس باللي بتعمله، لازم يكون عندك هدف وتسعى ليه عشان تقدر تحس بقيمتك وسط الناس حتى لو في يوم محطتش صورة ع الفيس بوك ولا تويتر ولا انستجرام ولا سناب شات وقلت ايه اللي عملته وسويته، هتفضل تحس بقيمتك وهتحس إن كل الناس شايفاك وملاحظاك، هتحس إنك ملحوظ. سجل إنجازاتك حتى لو مكنش متسجل بصورة وفيديو وتعليقات ولايكات فهو موجود بين الناس اللي حواليك وقبلهم جواك بينورلك الطريق اللي أنت ماشي فيه وشايف من بعيد الهدف اللي عايز توصله.

متختصرش نفسك في كام صورة وبوست وعدد لايكات بس، ملف إنجازك في الحياة لازم يكون أكبر من كدة بكتير، ولازم تتأكد أن ربنا خلقك لهدف ما حتى لو أنت لسه بتلاقي صعوبة أنك تحدده. السؤال المهم اللي مؤخرًا قدرت أجاوب عليه، أزاي ممكن الاقي هدفي في الحياة وكانت إجابته أبسط من كل توقع في خيالي، دور على الشغف. الشيء اللي بتحس وأنت بتعمله أنك سعيد ومبسوط ولاقي نفسك مهما كان بسيط وتافه، هو دا الشيء اللي أنت محتاجه ومن خلاله هتحقق ذاتك، بكل بساطة، لأن الشغف بيصنع معجزات، بيخلينا ندي واحنا مبسوطين ونبدع. دور على الشغف! دور على الشغف وهتلاقي نفسك، وهتحس بقيمتك وساعتها بس هتكون ملحوظ زي ما تمنيت.