محمد ربيع يكتب “حتى أنت يا بروتس”

آخر جملة قالها القيصر يوليوس قبل ما يموت لما خانه كل اللى حواليه واتفقوا انهم يغتالوه ، كلهم طعنوه ومع ذلك فضل واقف علي قدمه لم يقع لحد ما شاف صديق عمره “بروتوس” فمشي يوليوس قيصر لحد عنده وهو متخبط فى دمه وعينه كانت فيها نظرة أمل ورجاء وارتياح إن صديق عمره موجود من اجل ان ينقذه ، وضع ايده على كتفه كاتما للدم ومستني صاحبه يساعده لحد ما “بروتوس” طعنه هو الاخر وساعتها قال جملته الشهيره .. وفعلا وقع مات .

طعنة صديقه “بروتوس” كانت مختلفة عن كل الطعنات الأخرى كانت هي القاتلة لأنه لم يطعنه في جسمه بل طعنه في شخصه .. طعنه في سنين عمره اللى قضاها وهو فاكر انه صاحبه الوحيد .. طعنه في ثقته في كل اللي حواليه .. فخلاص باقى إيه في الدنيا !!
سقط قيصر ساعتها وهو راضى بالسقوط معلناً هزيمته وخيبته ورجائه وآماله.
علاقة الصحوبية ياجماعة تانى وتالت ومليون !!
خيانة الصداقة بتدمر زي بالظبط خيانه الحبيب ، بل ويمكن أكتر بكتير .
علاقة الصحوبية هي أسمي علاقة في الوجود وساعات بتكون أفضل مليون مره من علاقة الأخوه أو الحب لذلك دوروا على علاقة صداقة مثمره ومش لازم يبقوا كتير والله دا هو لو كتير يبقا تعرف ان فيه حاجه غلط !
دور على السَند مش القعدة الحلوة والكام صورة وارفع على الفيس !
دور على الصاحب اللى يوجعك بالكلام عشان يفوقك ، وفي نفس الوقت يطبطب وقت ما تعيط من غير ما يقولك كفايه نكد ، اللى يسمع منك نفس الشكوى كل يوم وما يكلش ولا يمّل ومقدر ان الموضوع دا كبير بالنسبالك ، اللى يبقا شايف الحلو اللى جواك والجانب الطيب وقت متكون انت شايف انك حد وحش ، اللى يتعامل مع مصيبتك ومشكلتك كأنها مصيبته بالظبط وتلاقيه مهتم اكتر منك وبيتكلم بصيغه الجمع “طب هنعمل ايه دلوقتى-طب نكلم فُلان-طب نروح لعِلان” دور على اللى “تدور” عليه اول ما تقع فى مشكلة .
دور على اللى شبهك ومريحك اللى تبقى راضى عن نفسك وانت معاه ، عن شكلك و لونك وجسمك ، اللى لما تنزل معاه بنفس الطقم الف مره كل مره يقولك الله انت شكلك حلو النهارده “حتى لو مكنتش حلو” .

خليك عارف ان المواقف اللى بتبين الصحاب مش المواقف الهلس والضحك وقعده الكافيه والقهاوي وان الصاحب اللي بجد مهما حصل ومهما جري عمره مابيعري صاحبه حتي لو قدام أبوه.
أصعب احساس انك تكتشف ان صاحب عمرك بيخونك ! والخيانة ممكن تكون خيانة مشاعر عادي ! انه لا يتمني لك الخير ذلك خيانة ! انه يمثل انه فرحان لك تلك خيانة ! انه يكون بجوارك عشان مصلحه هذه ايضا خيانه والله.
وحقيقي اللي معاه صاحب جدع بجد لا يتركه أبدا في وقت شدته ويكون سبب في ابتسامته ويتركن عليه وقت ما الدنيا تديله ضهره يقدر يستغني عن الدنيا كلها باللي فيها ،الصاحب اللي بجد لا يقدر بكنوز الدنيا كلها .
“حتى أنت يا بروتس” هي آخر جملة نطقها “يوليوس قيصر وهو يحدق في عينيّ قاتله وصديق عمره بروتوس من اشهر العبارات التي تختزل ألم الخيانة والغدر والخذلان.
عندما اصابت الرصاصة قلبي لم أمت…
لكنني متُ لما رأيت مطلقها
ونصيحة أخيرة ” الصاحب اللي أمك تقولك عليه ده كويس بيطلع فعلاً كويس، واللي تقولك عليه مبرتحلوش ومتمشيش معاه بيطلع فعلاً حد قذر ” إحساس اﻷم عمره ما بيخيب والله.