ماذا تعرف عن قانون التصالح فى مخالفات البناء

إيمان العادلى
كيف تنتهي من محاضر مخالفات البناء؟

ماهى قصة قانون التصالح ؟

– في كل محافظة في لجان فنية لمراجعة الطلبات، وبمجرد صدور اللائحة التنفيذية للقانون «خلال 3 شهور من إقرار الرئيس له»، هيبقى مسموح لك تقدم للجنة دي طلب تصالح خلال 6 شهور، واللجنة هتنظر في الطلبات خلال مدة 4 شهور بحد أقصى.

– هيكون في «رسم فحص» للمبنى بحد أدنى 500 جنيه، وحد أقصى 5000 جنيه ودي علي حسب مساحه العقار المخالف

– اللجنة هتديك شهادة بإنك سجلت معاها، وبالشهادة دي هيتوقف أي إجراءات كانت هتتاخد ضدك سواء قرار إزالة أو قضية بناء مخالف، إلي حين البت في الطلب وعلشان تاخد الشهادة دي لازم لازم تكمل الملف بتاعك

مقابل التصالح هيكون كام؟

– بحد أدنى 50 جنيه للمتر وحد أقصى 2000 جنيه للمتر، واللي هيحدد سعر المتر لجان هيتم تشكيلها في كل محافظة عشان تقسمها لمناطق بحسب المستوى العمراني والحضاري، وهيبقي في إمكانية التقسيط.

– طب ولو اللجنة وافقت على طلب التصالح أو رفضته، إيه اللي هيحصل؟

– لو في موافقة، هيصدر قرار بقبول التصالح، وهيكون قدامك فرصة 60 يوما تدفع الفلوس اللي اللجنة حددتها بناء على تقيمها للمنطقة وسعر المتر فيها.

– لو طلبك اترفض، أو اتأخرت في سداد قيمة التصالح عن 60 يوما، يبقي خلاص أي إجراءات كانت ضدك سواء قضية أو قرار إزالة هترجع تشتغل تاني.

– كمان القانون وفرلك فرصة تانية للي طلبه هيترفض، أنه يقدم تظلم خلال 30 من تاريخ إخطاره بالرفض، ولازم اللجنة تنظر فيه خلال 90 يوما.

– بس كده، ولا في حاجة تانية؟

– في نقطة مهمة تم النص عليها في القانون، وهي إنه لن يصدر القرار النهائي بالتصالح إلا «بعد طلاء واجهات العقارات» كاملة التشطيب «مع استثناء المباني في القرى من الشرط ده».

طب إيه هي الحالات المحظور التصالح فيها بشكل نهائي؟

في 8 حالات محظور التصالح فيها بأي شكل، وهي :

1-البناء علي الأراضي المملوكة للدولة، إلا إذا كان صاحبها تقدم بطلب تقنين الأوضاع للأراضي المملوكة للدولة .

2-البناء علي الأراضي الخاضعة لقانون حماية الآثار وحماية نهر النيل .

3-الأعمال اللي بتخل بالسلامة الإنشائية للبناء يعني منزل آيل للسقوط مثلا مش هيرخصلك، وده هيتعرف ازاي ؟ كل طلب هيتقدم هتطلع معاينة من مكتب مهندس إستشاري عن صلاحية المبني للتصالح من عدمه والتقرير بتاعه هو اللي هيحدد طلبك هيتوافق عليه ولا هيترفض .

4-التعدى على خطوط التنظيم المعتمدة وحقوق الارتفاق المقررة قانونًا، والمقصود هنا الخطوط الموضوعة لتنظيم الشوارع ومساحتها عشان المرافق من كهرباء ومياه وغيرها .

5-المخالفات الخاصة بالمباني والمنشآت ذات الطراز المعماري المتميز.

6-تجاوز قيود الارتفاع المقررة من سلطة الطيران المدني، أو تجاوز متطلبات شؤون الدفاع عن الدولة .

7- تغيير الاستخدام للمناطق التي صدر لها مخططات تفصيلية معتمدة من الجهة الإدارية .

8- البناء خارج الأحوزة العمرانية المعتمدة «يعني خارج زمام المدن والقرى» مع استثناء الأراضي الزراعية اللي عليها مباني خدمية أو سكن خاص «بناء على ضوابط بيحددها وزير الزراعة»، ومشروعات الإنتاج الزراعي والمشروعات الحكومية والخدمية اللي يحددها مجلس الوزراء.

وأيضاَ الكتل السكنية المتاخمة للأحوزة العمرانية للقرى والمدن، ويقصد بها المبانى المكتملة والمتمتعة بالمرافق المأهولة بالسكان والمقامة على مساحات فقدت مقومات الزراعة وطبقًا للتصوير الجوي في 22/7/2017 «يعني لو المبني خارج كردون المباني، ومأهول بالسكان وفي مرافق، ومبني قبل يوم 22 يوليو 2017 (أخر تصوير جوي)، هيتم التصالح معاك، لكن لو مبني بعد كده أو مكنش مسكون، يبقى لأ هتفضل مخالف وللأسف طلبك هيترفض، لأن القانون صدر لتقنين أوضاع قائمة بالفعل، وليس مخالفات جديدة»

المستندات المطلوبه لاستكمال ملفات التصالح

١- صوره الرقم القومي

٢ – المستندات التي تثبت علاقة مقدم الطلب بالعقار المخالف

٣- اثبات تاريخ ارتكاب المخالفه

٤- عدد (٢) نسخه من الرسومات المعماريه المنفذه علي الطبيعه

٥- تقرير من مكتب استشاري عن السلامة الانشائية للمبني

٦- الايصال الدال علي سداد رسم الفحص ودراسة الطلب

٧- صوره اورنيك الترخيص ان وجدت

٨- نسخه من الرسومات المرفقه بترخيص البناء ان وجدت

وبالنسبه للي ماقدمش في قانون التصالح

ومعموله محاضر وقضيه للبيت بتاعه من 2008 لحد شهر 4 لسنه 2019

في مده للقانون هيقفل فيها

وبعد كدا اللي ماقدمش وخلص الاجراءات وكمل ورقه هيبقي فيه عقوبات اكتر وغرامات اكتر عليه

اما بقي للناس اللي بتبني بعد شهر 4 (ابريل) لسنه 2019 بدون ترخيص واتعمله محضر

دي مافيش فيها تصالح والعقوبات فيها بتوصل من سنتين حبس لحد 5 سنيين وغرامات من 100 الف جنيه لحد 5 مليون جنيه علي حسب مساحه البيت وعدد الادوار المخالفه

وياريت الناس ماتسمعش كلام اي شخص وينصحه انه يبني الايام دي لا مهندس ولا مقاول ولا موظف شغال في المجلس او الحي ولا اي حد الا اذا كان معاك رخصه للبيت بتاعك

لان وقت مايتعمل محضر محدش هيقف جمبك من كل دول

لان اللي بيقولك ابني مش خسران اي حاجه لان مافيش حاجه اسمها انك هتبني وبعدين تتصالح القانون معمول للناس اللي خالفت بالفعل من قبل نزول القانون اي حد هيبني بعد القانون مانزل مالوش تصالح

يعني اي حد هيبني بدون ترخيص بعد تاريخ 8/4/2019 (8 ابريل) وهيتعمله محضر مايلومش غير نفسه لان محدش هينفعك وقتها

تعديل ***

في ناس كتير بتسأل طيب انا عامل ترخيص ومخالف في الرسم المعماري او الانشائي فقط ومعموله محضر مخالفه ده يتصالح ايوه يافندم يتصالح وهتعمل الرسم والتقرير برضو بس اللجنه لما تنزل هتحددلك نسبه من قيمه المتر يعني لو المتر متقدر عندك مثلا ب ٥٠٠ جنيه هتدفع ٥٪ من قيمه المتر المسطح للادوار المخالفة او ٢٠٪ علي حسب انت مخالف عن رسم الرخصه في ايه بالظبط يعني لو مساحة البيت بتاعك 100 متر مسطح وعدد الادوار المخالفة فى الرسم المعماري ارضي و 3 يبقي كدا اربع ادوار يبقي كدا المساحة الاجمالية 4 * 100 = 400 متر مسطح تضربهم في 5% يبقوا 20 متر وترجع تضرب بقي في قيمة المتر عندك لو 500 جنية مثلا يبقي 20 * 500 = 10000 جنية دي قيمة التصالح تقدر تدفع الربع 2500 وتقسط الباقي الكلام ده لو مخالف معماري بس انما بقي لو مخالف انشائي بتضرب في 20 % ولو مخالف فى الاتنين معماري وانشائي بتضرب في 25 %

وبالنسبه اللي بيسأل علي ارض فضاء بور بجوار الارض الزراعية يا جماعة قانون التصالح ده معمول للمباني مش للاراضي وكمان مش اي مباني للمباني المخالفه بالفعل مش اللي لسه هتخالف جديد

وبرضو اللي بيسأل علي موضوع تغييير الاستخدام من بدروم لجراج او العكس ده يجماعة لو المكان اللي هو فيه مثلا زي المدن الجديد اللي ليها مخططات تفصيلية من هيئة التخطيط العمراني ده مالوش تصالح
انما لو في مدينه او قريه مالهاش مخطط تفصيلي يتصالح مافيش مشاكل

وبالنسبه للي كمل الروف او غرف السطح المفروض انها تكون ربع مساحه المبني 25% من المساحه حضرتك كملتها 70% او 90% او 100% من المساحه ده يتصالح ما لم يعارض ارتفاع المبني هيئة الطيران المدني والقوات المسلحه