تاريخ المطبخ

إيمان العادلى

الكيك ٢

من هو مكتشف البيكنج بودر ؟

سؤال قعد يلح عليا في ظل هذا المد الحظري من الكيك اللي غرق مصر

إيبين هوسفورد

بعد لفة طويلة كده بعد سنة ١٨٣٠ هو من توصل لتركيبة البيكنج بودر الحالية بإنه في مصنع عمله تمكن من تجفيف مجموعة مكونات أنتجت فوسفات حمض الكالسيوم وأضاف نشا وبقي كده البيكنج بودر في صورته الحالية وبديل الخميرة

حتة الكيك مش مجرد حاجة حلوة بناكلها ونغسل بعدها أطباق وصواني ويعاد تمركز سعراتها في الأجناب

أنا كل ما أقول خلاص انزل البوست الاقي مغارة علي بابا ?

كيكة فاكهه ومكسرات وشيكولاته أحمدك يارب ..

كل الفاكهه اتعملت في كيكة وبقي لها اسم حتي الكيوي

الأشهر كيكة البرتقال، وطبعا اللمون، المشمش والتفاح لازق معاه قرفة، والفواكه المجففة كمان ..

الفراولة طبعا والكريز لهم الحظ الأكبر في الموضوع ده .

نيجي بقي للكيكات الأشهر ، فيه السويسرول وهو كيك رقيق بيتلف ويتقطع بشكل دائري ، وهي أمريكية الأصل بتتحشي مربي فراولة وكريمة وتتزين أو تتساب كده .

وهي حلوة جدا ومميزة جدا في الشكل سواء كانت بالكريمة أو بالشيكولاته ، هي من أكتر الحاجات اللي بتتاكل اللي المحتاجة دقة وصبر عشان تطلع مظبوطة يا إما مش مهم

فيه الكيك الأشهر البلاك فورست

Black forest

ودي مميزةبشكلها الموحد في كل حتة انها كيكة شيكولاته مزينة بطبقة كريمة بيضا ومزينة بالكريز، ودي أصلها ألماني ..

بتتعمل بنفس الطريقة بس اسمها الألماني اللي لا عرفت أقراه ولا اكتبه له علاقة بالمنطقة الألمانية الشهيرةبالغابات و بالكريز وبشراب الكريز اللي بيضاف له كحول وكده ..

انتشرت في العالم بشكلها واسمها بس بالكريز بس الحمد لله من غير كحول

فيه كمان كيكة الغابة السويدية السوداء ..ودي شكلها مريب الحقيقة بتتزين بقطع كبيرة من الشيكولاته ..مش فاهمة ليه لونك غامق يا فسواني

فيه كيكة اللوز ودي معروفة بكده بس ..

فيه كيكة الشيكولاته وكيك موس الشيكولاته

Chocolate mousse

ده غير الفادج بتعطيش الجيم

والفرق كبييير في الطعم والشكل والسعرات وكله كله

موس الشيكولاته إضافة عظيمة كده بتتضاف لكيك الشيكولاته، يقال أن السر فيه إذابة مارشميللو وبعدين إضافة لبن وكريمة وليلة كبيرة سعادتك ..بس ملناش دعوة يا محي ..

فيه كيكة البابا أو الباباز ودي كيكة عادية طلعت من الفرن في أمان الله لاقت حد بيشربها شربات ويسميها كده ..هل كان مخترع الوصفة أب اتحظر كتير فطلع بيها وسماها علي اسمه..يمكن

أنا لست من محبين القهوة بس بتقبل وجودها وبتفهم حب عشاقها ليها، بس اللي مش قادرة أفهمه هو ليه حد يفكر يحط القهوة علي الكائن الجميل المسمي بالشيكولاته..لييييه ولمصلحة مين؟!

ليه أحلي قطعة جاتوه شكلا في المحلات تبقي بالقهوة وألاقي الراجل يشيل إيده من عليها ويرفع حاجب وينزل التاني في خطورة ويقول في لهجة تحذيرية بس دي بالقهوة يا مدام ..