أفتاكسات زوج محظور

 

 

إيمان العادلى

 

الحلقة الثلاثون

 

• (الجزء الثانى ) أفتاكسات زوج صايم

 

إلهام وممدوح

 

إلهام وخالد ماسكين فى بعض

وإلهام دماغها وألف سيف تعمل سبانخ وتانى يوم بصارة

 

إلهام : بالظبط كده حنتقم منك أفتكر بقى كل المرات اللي أتريقت فيها على أكلي عشان المطاعم كانت مفتوحة لك أفتكر كل اللوبيا والمسقعة اللي رميتهم لما طلبت دليڤري

 

خالد : إهئ إهئ بتنتقمى من إبنك طيب مش هديلك الفرصة تشمتي فيا برضه وهعمل إندومي

 

إلهام : رميته عشان بيجيب كورونا

.

ممدوح : هو مش كان بيجيب سرطان؟

 

إلهام : لا ماهو أترقى

 

ممدوح : الحظر غيّرك وبقيتي تقولي أفيهات كمان

 

خالد : أفيهات أيه اللى بتقولها لك يا بابا وعجباك دى وهى بتبهدل فى إبنك ومجوعاه

 

إلهام : مش عاجبك إفيهات امك روح أسمع إفيهات برة

 

خالد : خلاص ها أكل عيش حاف فيه عيش ولا رميتيه هو كمان؟

 

إلهام : بما إن الفرن بقى بيقفل بدري علشان الحظر انا نشّفت قلقاس وطحنته وخبزت بيه عيش

 

خالد : يالهوي على سنيني السودة

 

ممدوح : مالك ياواد بتندب زي الستات ليه

 

خالد : هو فيه حد بيطحن قلقاس يا ماما؟

 

إلهام : الشيف حسن عملها قبل كده وانا بقى أفتكست وعملت بيه عيش ما أبوكم من أول الحظر بيفتكس ومتكلمتش وعاحبكم أنت وأختك ولا هو الأفتكاس فى إيد اليتيمة عجبة

 

ممدوح : لا يا إلهام بقى كده أوفر يا حبيبتى وهو أي حد يعمل حاجة نقلدها؟

فين شخصيتك المستقلة؟

وبعدين انتي مخبزتيش من سنة ٩٠ جاية تشغلي الفرن دلوقتي بعد ما صدى من الركنة عشان تخبزي عيش مقلقس؟

 

خالد : قولها والنبى يا بابا دى بينها حتطلع الحظر عليا لوحدى

 

إلهام : مش عاجبك عيش أمك روح كُل برة.

 

خالد : مش واكل خالص ياماما هعمل دايت الماية عشان ترتاحي

 

إلهام : والله براحتك بس قبل ما تشرب خد بالك انا معبية الفلتر عصير لمون عشان المناعة

 

خالد : أقوم انتحر طيب؟

ما أنتي عارفه اني مابحبش الليمون يا ستي

 

إلهام : مش عاجبك مية أمك روح إشرب من البحر

 

خالد : أممممممم خليكي معايا ثواني

ألو.. الحجر الصحي؟

 

لو سمحت كنت عايز أبلغ عن حالة

 

أيوه يافندم أمي عمالة تعطس

 

وتكح كحة ناشفة ودرجة حرارتها فوق الأربعين

 

إلهام : انت بتبلغ عن أمك؟

 

ممدوح : والله مش عاجبك حجر ابنك حجر الحكومة برة أحسن

 

أستنونى بكرة ونعرف خالد المسكين حيعمل ايه مع إلهام والحظر وعمايله