أفتاكسات زوج محظور
إيمان العادلى
الحلقة الرابعة و الستون
إلهام و ممدوح
(الجزء الثانى )أفتاكسات زوج صايم
أصطبحنا وأصطبح الملك لله
وممدوح وإلهام مبيخلصوش حكايات و ٠٠٠٠٠٠
ممدوح : صباح الخير
قايمة بتزعقى ليه يا وليه على الصبح
إلهام : محدش من العيال راضى يصحى علشان أروق الشقة وأروق أوضهم اللى زى مزبلة التاريخ دى
حتى الفطار مفطرتش يا دوحة
قوم أعمل لنا كام ساندوتش أفطر بيهم يسندونى فى الشقا أللى جاى ده
ممدوح : طيب وطى الصوت شوية هو انا في قاره تانية وبعدين سندوتش ايه تانى ما أنتى كلتى كيك وكوكيز مع الشاي
إلهام :تعبانة وشقاينة يا راجل انت هتعد عليا اللقمة
ممدوح : وهو كل ده اسمه لقمه دول 7 لقم اعد ايه ولا ايه بس يارب شقاء عمرى راح في الكورونا والحظر حرام عليكى
إلهام : ده بدل ما تقولي صحتين يا راجل
ممدوح : وهو صحتين بس هينفعوا
ألا قوليلى يا إلهام
لما بتقفي في المطبخ تعملي لنا الأكل بتبقى سعيدة؟
إلهام :والله على حسب لو فيها خاتم دهب مثلا اكيد هبقى سعيدة
ممدوح : اتلمى يا إلهام وأتكلمى جد من غير الألش بتاعك
إلهام :لو هنتكلم جد من غير ألش اه طبعا ببقي مبسوطة جدا لأنى بسعدكم يا حبيبى وبعدين المطبخ ده مملكتى الحقيقة وهيهيهى ملعبى بقى يا دوحة
ممدوح : ملعبك أه اللى حرمانى أدخل وأشوط فيه وأجيب أجوان
إلهام : أنا يا حبيبى حرماك منه علشان بصراحة كده الأكل بيقع علينا بالخسارة وفى الأخر محدش بياكله
ها بقى
ممدوح :خلاص يبقي ربنا عاوز كده متعكريش ليا دمى كل شوية وتقرفينى وانا محظور عاوز اشتغل وأسلى نفسى مش معقول كده جتتي هترنخ من الركنة
إلهام : ما هو يا دوحة أنت بتفتكس لنا حاجات غريبة وإيشى كحك ناعم ملون ولا سلطة الخضار أللى عملتها بالمستردة وطلعت يع خالص
ممدوح : يووووة كفاية عكننتى عليا اليوم يا شيخة وبعدين يعنى يا إلهام فى مثل بيقول
إربط الحمار مطرح ما يعوز صاحبه
يعنى إفهمى شوية وسيبينى أفتكس براحتى
إلهام : طب ولو صاحبه حمار وعاوزنى اربطه في عربيه نازله في الترعة
ممدوح : أنتى بتقولى على جوزك حمار طيب والله منا سيبك يا إلهام
وحخلى يومك أسود من شعرك
قال حمار قال ده اللى ناقص
يقطع الحظر وسنينه
تعالى لى بقى
إلهام : أى اى يا لهوووووى
اه يا عينى سبنى يا دوحة يتقطع لسانى والنبى ما أقصد
ألحقوووونى يا عيال يا لهوووى
يوووة أنا تعبت من عمايلهم
وبفكر أنهى حكايتهم ونرتاح منهم
أستنونى بكرة
يجب عليك تسجيل الدخول لكتابة تعليق.