أفتاكسات زوج محظور
(الجزء الثانى )أفتاكسات زوج صايم
إيمان العادلى
الحلقة الثامنة والخمسون
إلهام و ممدوح
(الجزء الثانى )أفتاكسات زوج صايم
ممدوح وإلهام قرروا يعلنوا الهدنة مع بعض لحد ما أيام الحظر تعدى على خير و ٠٠٠٠٠٠٠
ممدوح : تعالى هنا يا سى خالد وقولى مالها سهى صاحبة أختك وأيه موضوعها معاك
خالد : ولا موضوع ولا حاجة يا بوس
دى البت رهف نكد زى ما أنت عارف كده
جينات وراثية سبحان الله بتجرى فى عروق ستات عليتنا
ممدوح : أتلم يا واد لأمك تسمعك وتخلى أيامك أسود من شعرها
مالها البت سهى ومالك
خالد : مفيش يا بوس ده أنا كنت حسألها على الأمريكن دبلومة علشان أخت حسام صاحبى مش أكتر
رهف النكد بقى كبرت الدنيا وخلاص
ممدوح : ماشى يا خويا حصدقك المرة دى سامع المرة دى بس
لو عاوز معلومات تانى خلى أخت حسام تكلمها بنفسها لأقرص لك ودانك
خالد : حاضر يا بوس
ممدوح: أيووة شاطر يا أبنى أللى منرضهوش لبناتنا منرضهوش لبنات الناس
إلهام : أهلا بيكم مجتمعين فى الخير إنشالله
أنا نازلة مشوار ل ماما وحرجع كمان ساعة
حبقى أعمل المكرونة والبانيه لما أرجع
ممدوح : بالسلامة يا حبيبتى
وعدى الوقت وممدوح رجع لهوايته القديمة و ٠٠٠٠٠٠
ممدوح : اكتشاف مهم جدا اكتشفته اثناء سلق المكرونة انك ممكن تحط شوية زيت على الميه.. قوم المكرونة مش هتلزق في بعضها وهتبقي كل واحده بوحدتها كده.. بلغة المطابخ المكرونة هتفلفل يا دوحة انت يا مفلفلهم
رهف : أيه ده بابا حبيبى فى المطبخ
تبقى ماما بره البيت ههههههه
ممدوح : أستنى بقى لما أحط خلطتي السحرية على الصلصة..
ده أنا طباخ ماهر.. مش أي حد يطبخ مكرونة على فكره
رهف : يا بابا يا جاااامد انت
ممدوح : شوفى بقى يا بنتى دى شغلانة محتاجة جد واجتهاد والتزام سنين طويله اوى.. المتميزين في عمل المكرونة في الكوكب ده يتعدوا على الأصابع اتشرف بكوني واحد منهم
رهف : كمل يا بابا ياقمر وأنت بتعمل المكرونة
ممدوح : نص البنات اللى كانت بتجري ورايا قبل الجواز كان سبب دهولتهم الأساسي هو سمعتي العالمية في طبخ المكرونة ب 3 طرق مختلفة.. بالصلصة الحمراء.. من غير صلصله خالص.. او الأقوى بقي.. بالفراخ والمشروم.. ذلك فضل الله يؤتيه من يشاء.. الحمد لله بسبب التزامي طول سنين عمري ربنا كافأني عليهم بأنه رزقني مهاره عالية جدا في سلق المكرونة.
خالد : تيرررررا كمل يا بوس
ممدوح : الظاهر بقى أمكم مش مقدرة النعمة اللى هيا فيها.. كونها تتجوز راجل على هذا القدر من التميز في سلق المكرونة.. فدى حاجه تستاهل انها تصلى لربنا ركعتين شكر كل يوم لكن هى الستات كده. يكفرن العشير ومبيفهموش في المكرونة و ٠٠٠٠٠٠
إلهام : أنا يا دوحة مكفراك ومبفهمش ولامم العيال حواليك وبتشجينى إهئ إهئ
يا عينى عليكى يا إلهام وعلى بختك فى جوزك وولادك
ممدووووووح
طلقنى
يووووة أستنونى بكرة
يجب عليك تسجيل الدخول لكتابة تعليق.