أفتاكسات زوج صايم

إيمان العادلى

إلهام وممدوح

الحلقة التاسعة

إلهام : حبيبى يا نور يا عينى أبقى أسأل وأستشيرنى يا روحى قبل ما تفتكس وتحط ليمون لشربات البسبوسة

ممدوح : هو الليمون زاد حبتين يا حبيبتى لكن والله كان شربات يجنن المرة الجاية ححط نقطتين بس علشان يطلع سيرب تخين كده زى الشيف حسن

إلهام : وهو فى مرات تانية يا روحى ( اه يا مرارتى يانى من جوزى وعمايله )

التليفون بيرن

رهف : مامااا خالتو على الفون تعالى كلميها

إلهام : خلاص يا حبيبى اكلم أختى وأرجعلك نشوف البسبوسة دى

اهلا يا سامية وحشتينى فينك يا بنتى وحدوتة بقى وكلام ستات وسامية بتشتكى لها من جوزها وأنه مش بيساعدها ولا بيغسل حتى كوبية ميه وأنها بتحسدها على جوزها ممدوح وأنه بيدخل المطبخ وبيساعدها فيه

وإلهام تضحك وتقولها أه جوزى مفيش فى أفتكاساته أتنين يا حبيبتى كانت مصر خربت ههههه

سامية نبهتها لكحك العيد والبسكوت أللى حيعملوه

لأن برة غالى وعلشان ظروف الحظر وكمان ينزلوا قبل الحظر يجيبوا لبس العيد للولاد

إلهام : أه يا سامية فكرتينى ده الوقت خلاص بيجرى ومفيش وقت

أما اقول ل ممدوح حبيبى بقى علشان يستعد

يلا سلام يا حبببتى ونتفق ننزل قبل الحظر

إلهام : ممدوح يا حبيبى فينك ياقلبى

ممدوح

رهف : (بصوت واطى ) بابا فى المطبخ من وقت ما بتكلمى خالتو يا ماما

إلهام : ممددووح بتعمل ايه عندك يا لهووى يانى

ممدوح : مفيش يا حبيبتى بعملكم سلطة جديدة بالفاصوليا والفلفل تجنن جبت طريقتها من النت بس مش لاقى مايونيز ففكرت فى بديل بس حعملكم مفاجأة أصبرى

إلهام : طيب أنا خلصت البامية وسبكتها تمام من بدرى وقبل الفطار حعمل حبة رز

وعاوزاك يا حبيبى نتكلم كده فى شوية حاجات

ممدوح : ماشى يا حبيبتى اخلص السلطة ونتكلم

على فكرة يا حبيبتى انا لاقيت البامية ناقصة ميه وزودتها لك ميه

إلهام : فتحت الحلة ولاقيت البامية اللى سبكتها وسوتها باللحمة بتعوم فى المية

يا لهوووووى يا أناا من أفتاكسات جوزى

أه يا ضغطى أللى على عليا

البامية باظت يا ممدوح من افتكاساتك

أسبكها تانى أزاى

اعمل ايه يانى

ممدوح : متعمليش يا حبيبتى انا حظبطها وارجعها زى الأول بعد ما أعمل السلطة

إلهام : لأ سيب البامية فى حالها

وانا حظبطها وأمرى لله

تفتكروا إلهام حتعرف تظبطها

وممدوح حيفتكس أيه تانى فى السلطة

بكرة حنعرف أخر عمايله