متجوزة بقالي سنه، وشاكة إن أخت جوزي مخبية حاجة عننا.. وجوزي شايف إني بتدخل في اللي ماليش فيه!

 

أنا متجوزة بقالي سنة ونص، ومن حوالي 5 شهور بدأت آخد بالي من تصرفات أخت جوزي، وهي لسه مش متجوزة.

البنت أغلب وقتها بتقعد في أوضتها، ومش بتخرج منها غير على فترات، وحتى لما أمها أو إخواتها بيكونوا خارجين، مش بتحب تروح معاهم، وبتفضل قاعدة في البيت.

في الأول ما اهتمتش بالموضوع، وقلت يمكن دي طبيعتها أو بتحب تقعد لوحدها، لكن مع الوقت بدأت أفكر وأسأل نفسي عن سبب عزلتها بالشكل ده.

اللي خلاني أفكر أكتر إني لاحظت إن معاها عِدّة غالية جدًا، ولما سألتها جابتها منين، قالت لي إنها اشترتها بنفسها، مع إن البنت مش بتشتغل، وسعر العِدّة دي تقريبًا 50 ألف جنيه، فاستغربت جدًا وبدأت أربط بين الموضوعين.

اتكلمت مع جوزي وقلت له إني ملاحظة إن أخته طول الوقت في أوضتها، وإن فيه حاجات مش فاهماها، وإن موضوع العِدّة الغالية ده محتاج أفهمه.

لكنه رد عليّا وقال لي إنها من زمان بتحب تقعد لوحدها، وإن دي طبيعتها، وطلب مني ما أكبرش الموضوع.

لكن أنا لسه عندي فضول أعرف إيه اللي بيحصل، وحاسة إن فيه حاجة مش واضحة، وكل ما أشوفها قاعدة في أوضتها أو ترفض تخرج مع أهلها، أفكر في الموضوع من جديد.

وفي نفس الوقت بدأت أحس إن جوزي مش عايز يتكلم في الموضوع، ومش عارفة أفتح معاه الكلام تاني إزاي من غير ما يفتكر إني بتدخل في شؤون أهله.

أنا مش عارفة هل فعلًا فيه حاجة تستدعي القلق، ولا أنا براقب تصرفات البنت زيادة عن اللزوم، .

هو طبيعي إن فيه ناس بطبيعتها بتحب تقعد في أوضتها بالساعات، ومش بتحب تخرج أو تختلط باللي حواليها، ولا العزلة بالشكل ده تستدعي القلق؟

 

رد بريد قراء بوابة العاصمة

الوضع اللي بتحكيه ده بنسميه ف علم النفس الفضول التداخلي لانك بتدوري ع مشكلة ف حياة حد تاني وممكن البنت يكون عندها مجرد انسحاب اجتماعي او ببساطة بتشتغل فريلانس ع النت وده يفسر قعدتها ف الاوضة والعدة الغالية اللي جابتها

جوزك عارف طبيعة اخته كويس وطلب منك تقفلي الباب ده عشان يحافظ ع استقرار بيته وانتي محتاجه تفهمي ان الدين بيقول من حسن اسلام المرء تركه ما لا يعنيه ودي مساحة لازم تحترميها عشان ماتخلقيش ازمة بينك وبين جوزك من الهوا

ركزي ف بيتك وحياتك وعلاقتك بجوزك وسيبي البنت ف حالها طالما مفيش ضرر مباشر واقع عليكي وبلاش تفتحي الموضوع ده معاه تاني عشان مايحسش انك بتدخلي ف شؤون اهله وتخسري ثقته ورصيدك عنده