بعد 18 سنة جواز، اتجوزت عليها وقلت هعدل.. ودلوقتي هي مصممة على الطلاق وأنا مش عارف أعمل إيه!

 

أنا متجوز بقالي 18 سنة، وعندي أولاد من مراتي، وعشنا مع بعض سنين طويلة، لحد ما قررت أتجوز زوجة تانية بالحلال.

دورت لحد ما لقيت واحدة مطىلقة واتجوزتها، لكن مراتي الأولى كانت رافضة الفكرة تمامًا، وحاولت كتير تقنعني إني أتراجع، وحصلت بينا خلافات ومشاكل بسبب قراري.

أنا وقتها كنت مصمم، وقلت لنفسي إني هقدر أعدل بين الاتنين، وإن جوازي التاني مش معناه إني هظلم مراتي الأولى أو أولادي.

لكن بعد ما رجعت من شهر العسل، حاولت أصلح الأمور مع مراتي الأولى، وأقرب منها، وأرجع حياتنا لطبيعتها، لكنها رفضت تمامًا.

حتى لما حاولت أديها حقوقها الزوجية، كانت بترفض، وقالت لي بوضوح: «ما تجيش الشقة، وما تدخلش عليّا ولا على أولادي». ومن وقتها بقت عايشة هي والأولاد لوحدهم، ومش عايزاني أتواصل معاها أو أتعامل معاهم.

حاولت معاها كتير على مدار سنتين، لكن كل محاولاتي انتهت بنفس الرفض والخلافات.

وفي الآخر، من كتر ما تعبت، قلت لها تختار: يا إما تكمل معايا كزوجة ونحاول نرجع حياتنا، يا إما ننفصل. لكنها قالت لي إنها عايزة الطلا،ق.

دلوقتي أنا في حيرة كبيرة، خصوصًا إني عرفت إن حماتي بتدور لمراتي على عريس. وهيمشوا في إجراءات الطلا،ق الفكرة دي وجعتني جدًا، ومش قادر أتخيل إن بعد 18 سنة جواز، وبيت وأولاد وعِشرة، مراتي تتجوز شخص تاني.

أنا بدأت أندم على قراري، وحاسس إني خسرت استقرار بيتي، لكن في نفس الوقت مش عارف أعمل إيه علشان أصلح اللي حصل. هل أسيبها تمشي في قرار الطلاق، ولا أحاول أرجعها البيت وأديها وقت تهدى؟

أنا عارف إن قراري كان سبب في وجع كبير ليها، لكن هل لسه فيه فرصة أصلح بيتي وأحافظ على أسرتي، ولا لازم أتقبل إن مراتي مش قادرة تكمل معايا بعد اللي حصل؟

 

رد بريد قراء بوابة العاصمة

أنت كنت شايف إن الزواج الثاني حقك وده صحيح شرعا لكن نسيت إن زوجتك الأولى ليها قلب ومشاعر وكرامة وبعد 18 سنة عشرة مش من حقك تتوقع إنها تستقبلك وكأن شيئا لم يحدث أنت اخترت تدخل حياة زوجية جديدة وهي من حقها تختار تخرج من حياتك فلا تلومها على قرار أنت كنت سببا فيه ولو فعلا ندمت فبلاش كلام ووعود ولا تضغط عليها بالأولاد قدم اعتذارا حقيقيا وحاول تصلح اللي كسرته بالأفعال مش بالكلام لكن لو هي حسمت أمرها بالطلاق احترم قرارها واعرف إن مش كل حق شرعي معناه إن مفيش ثمن إنساني هتدفعه مقابل اختيارك.