هل الريفو هو الأسبرين يا دكتور

إيمى عاطف

الأربع اقراص أسبرين اللي بنديهم في وقت جلطات القلب الحاده مقصود بيهم انهي أسبرين .. الاسبوسيد الأطفال ٧٥ .. ولا الأسبرين بروتيكت الـ ١٠٠ ولا الريفو .. ولا ايه بالظبط ؟ ⁉️

 

الاسئله دي تقريبا بنتسألها يوميا .. عشان كده هنوضح بعض الحقائق عن الاسبرين

 

الأسبرين ( acetylsalicylic acid ) هو عباره عن علاج بيشتغل كـ ” دوا سيوله antiplatlet” أو ” دوا مسكن ومضاد للالتهاب ” .. حسب الجرعه اللي بينعطى بيها ..

 

🔹ازاي ؟

✅بيشتغل كدواء سيوله لما يتعطى بجرعات قليله زي ٧٥ أو ٨١ أو ١٠٠ ملجم

✅وبيشتغل كمسكن لما يتعطى بجرعات كبيره اكبر من ٣٢٥ ملجم

 

فمتركزش كتير مع الاسم ( أسبرين ولا ريفو ) اهتم اكتر بقراءة التركيز اللي مكتوب على العلبة فى كل نوع قبل ما تاخده ..

 

🔹ازاي ؟

 

✅في جلطات القلب الحاده احنا بندي ٣٠٠ ملجم أسبرين كجرعة تحميليه بمجرد تشخيص الجلطه في الطوارئ .. ( بالاضافه إلي جرعة تانيه من نوع تاني زي البلافكس أو البرليك )

 

🚩فلو هنستخدم الأسبوسيد ٧٥ .. هنستخدم ٤ أقراص

🚩ولو هنستخدم الاسبرين بروتيكت ١٠٠ .. هنستخدم ٣ اقراص ..

🚩ولو هنسنخدم الجوسبرين ٨١ .. هنستخدم ٤ اقراص

 

المهم ان مجموع التركيزات يكون ٣٠٠ وميزيدش عن ٣٢٥ زي ما قولنا ( إلا في بعض الحالات )

 

⛔طيب لو مكنش موجود غير الريفو ( اللي هو تركيزه في معظم المستحضرات ٣٢٠ أو اكتر كمان ونادرا لما بتلاقي منه جرعة الـ ٧٥ ) نعمل ايه ؟

✅هنستخدم قرص ريفو واحد فقط .. مش أربعه ( لان تركيز القرص الواحد من الريفو ٣٢٠ زي ما قولنا .. واتأكد من التركيز اللي موجود على العلبه قبل ما تديه )

 

🚨وطبعا ده في لحظة تشخيص الجلطه الحاده فقط .. لكن بعد ما المريض بيعمل القسطره و الدعامه وحالته بتستقر بيكمل بقية عمره علي قرص أسبرين ( ٧٥ أو ٨١ أو ١٠٠ ) واحد فقط يوميا مش اكتر .. بالاضافه إلي الأدويه التانيه طبعا .

 

📝طيب في سؤال تاني ..

⁉️لو مريض الجلطه الحديثه في القلب اللي ماشي علي أسبرين كدواء سيوله .. دخل في التهاب بالعشاء التاموري للقلب ..

Post MI Pericarditis

وطبعا الأسبرين من أهم الادويه المضاده للالتهاب ده وبنديه في حالة الالتهاب ده بجرعات عاليه جدا عشان يشتغل كمسكن ومضاد الالتهاب ..

🛑 والسؤال هل لما نديه بالجرعات العاليه دي كمسكن .. هل بيفقد خاصيته كدواء سيوله ؟وبالتالي محتاجين نضيف دواء سيوله تاني مكانه لمريض جلطة القلب ؟ ⁉️

 

✅الاجابه :

لا

الأسبرين لا يفقد خاصيته كدواء سيوله مهما زادت جرعته .. يعني في الجرعه اللي فوق ٣٢٥هو بيشتغل كمكسن ومضاد التهاب + بيستمر تأثيره كدوا سيوله

وفي الجرعات اللي تحت ال ٣٢٥ بيشتغل كدوا سيوله فقط ( بيكون ليه تأثير كمسكن ولكن ضعيف جدا )

 

📢ملحوظه جانبيه :

❌الاسبرين بأنواعه عموما ليس هو الاختيار الامثل كمسكن ومضاد للالتهاب في أغلب الحالات .. بسبب مشاكله الكتير علي المعده .. و في عشرات المسكنات الأخري الاكثر أمانا منه .. أهمهم طبعا الباراسيتامول..

❌والاسبرين بأنواعه ممنوع استخدامه في الأطفال كمسكن أو مضاد للإلتهاب أو خافض للحراره .. لانه بيعمل حاله مشهوره في الأطفال اسمها Ray’s syndrome

 

دمتم سالمين

 

….