جوزي مسافر، واتعلقت بشخص من معارفه كان بيطمن علينا.. ودلوقتي مش قادرة أتخطى تعلقي بيه!
إيمى عمرو
جوزي مسافر، واتعلقت بشخص من معارفه كان بيطمن علينا.. ودلوقتي مش قادرة أتخطى تعلقي بيه!
أنا متجوزة وجوزي بقاله فترة مسافر بره مصر، وخلال الفترة دي كان فيه شخص من معارفه، وبيعتبر نفسه صاحبه، كان بيسأل علينا من وقت للتاني بحجة الاطمئنان علينا.
مع الوقت، بدأت أتعلق بالشخص ده جدًا، وبقينا نتكلم كتير، خصوصًا بالليل، لدرجة إني بقيت مستنية الوقت اللي هنتكلم فيه، وحسيت إني لقيت اهتمام ومشاعر كنت مفتقداها.
وفي مرة طلب مني نتكلم عن طريق مكالمة فيديو، وكنت مبسوطة جدًا إني شايفاه وهو شايفني، لكن مع الوقت بدأ يطلب مني تصرفات أنا عارفة إنها مش مناسبة، وكان بيقول لي إن ده بسبب حبه ليا وتعلقه بيا.
وللأسف، بسبب مشاعري ناحيته واحتياجي للاهتمام، استجبت لبعض طلباته، لكن اللي حصل إن طلباته بدأت تزيد مع كل مرة، وده خلاني أفكر: هو فعلًا مهتم بيا وبمشاعري، ولا اهتمامه مرتبط بحاجات تانية؟
بدأت أحس إن الصورة اللي كنت راسماها ليه مختلفة عن الحقيقة، وإن أنا كنت محتاجة حب واهتمام، لكن هو كان منتظر مني حاجات تانية.
قررت أتكلم معاه بصراحة، وقلت له إني مش هقدر أكمل بالطريقة دي، وإن كل اللي كنت محتاجاه هو الاهتمام والمشاعر الصادقة، مش إن التواصل بينا يبقى بالشكل ده.
بعد الكلام ده، كل واحد فينا راح لحاله، وانقطع التواصل تمامًا.
أنا دلوقتي متأثرة جدًا ببُعده، وبحاول أتماسك وأمنع نفسي من التفكير فيه أو الرجوع للتواصل معاه، لكن الحقيقة إن الموضوع صعب عليّا، وحاسة بفراغ كبير بعد ما اتعودت على وجوده وكلامه.
أنا عارفة إن اللي حصل كان غلط، ومش بحاول أبرر لنفسي، لكن محتاجة حد ينصحني ويساعدني أخرج من الحالة دي، وأقدر أرجع أهتم بحياتي وبيتي من جديد.
تنصحوني أعمل إيه علشان أتخلص من التعلق ده وأقدر أبدأ صفحة جديدة وأصلح اللي حصل في حياتي؟ياريت بدون تجريح أو اهانه
رد بريد قراء بوابة العاصمة
استغفري ربنا اول حاجه وصلي وقربي من ربنا وصوني جوزك واطلبي منوا الاهتمام وقربي من جوزك وحبيه لانه شقيان ومتغرب عشانك وعشان يوفر احتياجاتك ف ذنبه اي تخونيه هو يستاهل منك كد ؟؟؟؟ ربنا هيحاسبك عليه . اسهري مع جوزك وخلي وقتك معها هو شايف المر هناك وانتي مقضيها مع واحد ف يوم من الايام هيقول ل جوزك دي مش تمام دي مصنتكش لواحد كل م هيشوفك مع جوزك هيستحقر ومش هيتمني واحده زيك فاهمه فصوني الامانه اللي معاكي وحافظي ع بيتك واتقي الله
التعليقات مغلقة.