في ليلة راس السنة الميلادية، الشرطة الغانية تقبض على محتال مدعى النبوة

إيمى عمرو

الراجل اللي قدامك ده قدر يقنع الناس تبيع كل اللي وراها واللي قدامها عشان تحجز مكان في سفينة النجاة بتاعته قبل طوفان نهاية العالم.. بس بدل ما الطوفان يجي، الشرطة هي اللي جاتله.

 

الحكاية بدأت بواحد في غانا اسمه الحقيقي إيفانز إيشون بس قرر يغير اسمه لـ إيبو نوح وادعى النبوة.

الراجل ده طلع بفتوة كبيرة وخوف الناس إن فيه طوفان عالمي جاي وهيدمر الأرض، وحدد ميعاده يوم 25 ديسمبر (يوم الكريسماس).

 

عشان يقنع الناس إنه المنقذ، قالهم إنه بيبني سفن عملاقة للنجاة، وبدأ يلم مبالغ ضخمة جدا من أتباعه.

عشرات الأشخاص صدقوه وباعوا كل ممتلكاتهم واللي وراهم واللي قدامهم عشان يدفعوا تمن تذكرة في سفينة النجاة المزعومة دي ويروحوا الأماكن اللي حددها.

 

جه يوم 25 ديسمبر وعدى من غير أي طوفان ولا نهاية عالم. لما الناس بدأت تسأل، طلع إيبو نوح في فيديو يرقع الموضوع، وقال إن ربنا أوحى له بمد المهلة وتأجيل نهاية العالم عشان يدي فرصة لناس أكتر تنضم للمشروع وتنجى، وأنه محتاج يبني سفن زيادة.

مع انكشاف الكذبة، الغضب زاد. وفيه تقارير قالت إن مجهولين انتقموا منه وولعوا النار في سفينة النجاة اللي كان بيضحك بيها على الناس.

 

في ليلة راس السنة الميلادية، الشرطة الغانية اتحركت وقبضت عليه. انتشرت فيديوهات ليه وهو متكلبش وواضح عليه الانكسار.

الشرطة قالت إنها بتحقق في تهم النصب والاحتيال الإلكتروني وادعاء النبوة كذبًا وتهديد السلم العام.

 

دلوقتي إيفانز بيواجه مصير أسود؛ لو التهم دي ثبتت عليه، ممكن يتسجن لمدة توصل لـ 25 سنة، ده غير غرامة مالية ضخمة بحوالي 3.5 مليون سيدي غاني