سفاح التجمع

إيمى عمرو

المدرس المثقف اللي كان بيعلم الناس لغة إنجليزية على تيك توك، بس هو في الحقيقة كان شيطان عمل أوضة عزل صوت جوه شقته عشان يقتل فيها البنات ويعذبهم ويصورهم فيديو يتفرج عليه وهو بيشرب مخدرات.

 

النهاردة هنتكلم عن القضية اللي قلبت مصر والعالم العربي في مايو 2024، قضية كريم سليم المعروف بسفاح التجمع، الشخص اللي كان بيبان شيك ومعاه جنسية أمريكية وبيتكلم لغات، لكن ورا الوش ده كان فيه وحش سادي مبيعرفش الرحمة، دارس علم نفس وتعديل سلوك في الجامعة الأمريكية، يعني فاهم إزاي يلعب بعقول ضحاياه ويصطادهم.

 

كريم بدأ حياته في إسكندرية وسافر أمريكا وعاش هناك 5 سنين، ورجع مصر في 2017 واشتغل مدرس في مدرسة دولية إنترناشونال، لكن الإدمان ومخدر الآيس غيروا حياته تماماً، بعد ما طلق مراته في 2019 ورفع عليها قضية زنا، فضل عايش لوحده مع ابنه زين في شقة في كومباوند فخم بالتجمع الخامس، وطلب مخصوص من اللي بيشطب الشقة إنه يعزل أوضة من الصوت تماماً بتبطين خاص بحجة إنه بيسجل مزيكا وفيديوهات، لكن الحقيقة إن الأوضة دي كانت مسلخ بشري.

 

يوم اكتشاف الجريمة (16 مايو 2024)

البداية كانت لما الناس لقت جثة بنت مشوهة الملامح ومرمية في شنطة سفر على طريق محور 30 يونيو في بورسعيد، المباحث بدأت تفحص الكاميرات ولقوا عربية فارهة كانت موجودة في المكان ده، وتكرر وجودها في أماكن تانية اترمى فيها جثث لبنات بنفس الطريقة في طريق الإسماعيلية، ومن نمرة العربية وصلوا لصاحبها كريم سليم، وأول ما دخلوا الشقة وشافوا أوضة عزل الصوت واللاب توب اللي عليه الفيديوهات، الدنيا كلها اتكشفت.

البشاعة اللي مابعدها بشاعة

 

التحقيقات كشفت إن كريم كان بيستدرج البنات ويجبرهم على تعاطي مخدر الآيس بجرعات كبيرة لحد ما يفقدوا السيطرة، وهنا تبدأ طقوسه المرعبة بالضرب بالكرباج والسلاسل الحديد، والأبشع من كده إنه كان بيصور جرايمه فيديو بكل تفاصيلها عشان يقعد يتفرج عليها وهو تحت تأثير المخدر، لدرجة إن النيابة لقت عنده مكتبة فيديوهات لجرايمه وصور لضحايا بعد ما فارقوا الحياة، وكان بيمارس أفعال شاذة مع الجثث بعد الوفاة.

 

كريم اعترف بقتل 3 بنات بشكل أساسي هما نورا وأميرة ورحمة، وكان بيرمي الجثث في الطرق الصحراوية ويرجع يمارس حياته وينزل فيديوهات تعليمية على تيك توك كأن مفيش حاجة حصلت، لدرجة إن ابنه كان بيبقى موجود في الشقة وهو بينفذ جرايمه جوه الأوضة المعزولة.

 

نهاية السفاح

في 12 سبتمبر 2024، المحكمة في التجمع الخامس نطقت بحكمها التاريخي بالإعدام شنقاً لكريم سليم، بعد ما الطب الشرعي أثبت إن الضحايا ماتوا نتيجة الخنق والتعذيب وجرعات المخدرات العالية

 

القضية دي علمتنا إن المظاهر دايماً خداعة، وإن اللي بيبان مثقف ومتعلم ممكن يكون جواه شيطان مستني الفرصة عشان ينهش في ضحاياه.

اتقوا الله وخليكم واعيين للي بيحصل حواليكم لأن الغدر ملوش وش ولا عنوان مبيفرقش بين مثقف وغني ولا جاهل وفقير.

 

—النهاية

قضية حقيقية