دكتور ذبح زوجته وأبنائه الثلاثة

إيمى عاطف

اللي قدامك ده دكتو دبح مراته وعياله التلاتة في ليلة رأس السنة

 

شيطان كفر الشيخ اللي الحقد والغيرة عموا عينه عن أقرب الناس ليه، ارتكب واحدة من أرعب الجرايم اللي حصلت في تاريخ محافظة كفر الشيخ وتحديداً في حي سخا، جريمة بدأت بعقدة نقص وانتهت بمجزرة ليلة رأس السنة 2019، بطلها الدكتور أحمد عبد الله، طبيب بشري قرر إنه يمسح عيلته كلها من الدنيا عشان يحس بانتصاره الوهمي.

 

أحمد كان متجوز الدكتورة منى السجيني، ست ناجحة ومكافحة، سافروا السعودية مع بعض وهي هناك كانت شاطرة جداً ودخلها المادي أكبر منه، وده اللي زرع جواه عقدة النقص، الحقد والغيرة كانوا بياكلوا في قلبه بدل ما يفتخر بنجاح مراته، ولما رجعوا مصر في 2018، وبدل ما يبدأ حياة جديدة، قرر إنه يخلص منها، وفضل يخطط لجريمته لمدة 4 شهور كاملة.

 

يوم المجزرة (31 ديسمبر 2018)

في الوقت اللي الناس كلها كانت بتجهز عشان تحتفل بالسنة الجديدة، الدكتور أحمد كان بيجهز كفن عيلته، أوهم مراته إنه هياخد إجازة يقضي اليوم معاهم، وصحي الصبح لبس جوانتي كان شاريه مخصوص، وجاب حبل الستاير ولفه حوالين رقبة مراته وهو بيضحك وبيهزر معاها، وأول ما بدأت تقاوم، خنقها بكل قوته وبعدين دبحها بالسكينة عشان ينهي حياتها تماماً.

 

البشاعة اللي مابعدها بشاعة

بنته الصغيرة ليلى اللي عندها 4 سنين شافت المنظر وقعدت تصرخ، الدكتور مرحمهاش، خدها في حضنه ودبحها هي كمان بدم بارد، وبعدها دخل أوضة الأولاد عبد الله وعمر ودبحهم وهما نايمين في سرايرهم، وبعد ما خلص المجزرة، قعد يغير هدومه وخد ذهب مراته عشان يبين إنها سرقة، ونزل من البيت بكل برود عشان يبدأ المسرحية.

 

المسرحية الفاشلة كانت عبارة عن أن أحمد راح البنك وخد رقم انتظار عشان يثبت إنه كان هناك، وراح مطعم سمك وحجز أكلة كبيرة ودفع تمنها عشان يقول إنه كان بيجهز للغدا، والأغرب إنه اتفق مع زميلته في الوحدة الصحية إنها تمضي له في دفتر الحضور عشان يبان إنه كان في الشغل وقت الجريمة، ورجع البيت وطلع يصرخ ويصوت ويقول الحقوني عيلتي اتدبحت، والناس كلها صدقته في الأول إلا رجال المباحث.

 

بداية التحقيقات

الشرطة شكت فيه لإن مفيش كسر في الباب، والأهم إن الذهب اتسرق من مكان محدش يعرفه غير صاحب البيت، لكن الخيط اللي جاب رقبته كان دكتورة إسراء زميلته، اللي ضميرها أنبها وبلغت المباحث إنها هي اللي مضت له في الدفتر وإنه مكنش موجود في الشغل، وبمواجهته بكل الأدلة انهار واعترف بمكان السكينة والدهب وقال إنه قتلهم عشان يخلص من غيرته وحقده.

 

في مارس 2019، المحكمة حكمت بالإعدام شنقاً على الدكتور اللي خان الأمانة ودبح عياله.

 

عايزكم تعرفوا إن الحقد لو دخل قلب إنسان بيحوله لوحش مبيفرقش بين حبيب وغريب، اتقوا الله في بيوتكم وخليكم عارفين إن مفيش سر بيستخبى للأبد.

 

—النهاية

قصة حقيقية