انا متجوزة عن حب متجوزة بقالى حوالى ٤ سنين وزيهم أرتباط ومعايا طفل جوزى شخص الى حد ما ناجح ومجتهد فى شغله جدا ومن الشخصيات اللى الشغل عندها رقم ١ جدا

 هو كان جارى وكنت انا بحبه جدا وهو مكنش يعرف بدأت انا اللى اقرب من نحيته وهو كان صريح معايا أنه مش بيفكر يرتبط ولا بيفكر فى جواز او كدا هو دماغه شغل وسفر بس بس انا اللى كنت لحوحه شويه وكنت أنا اللى بهتم جدا وانا اللى بحب وكل حاجه كان نظامنا فى الارتباط ميردش على اتصالاتى شهر مثلا ويرجع يقول اصل كنت مشغول يغيب ويرجع لا سورى مكنش بيرجع كنت أنا بردو اللى بتصل وبسأل ويحاول أوصله كنت أنا الطرف اللى بيحب بجنون يعنى ومكنتش محكمه عقلى خالص ٤ سنين وانا بحاول وكدا لحد ما قولت استوب بقى خلاص ومبقتش اسال خالص وهو عرف انى تعبت رجع يطمن وصارحته انى تعبانه فى بعدو لحد ما اقنعته انه يجى يتقدم ايوة انا من غير كرامه ورخصت نفسى عارفه

وفعلا جيه اتقدم ورغم رفض اهلى ليه صممت عليه سنتين وكنا متجوزين مخرجتش معاه فى الخطوبه تقريبا الا قليل جدا يتعدو على صوابع الأيد الواحدة يعنى مكنش فى مكالمات بليل خالص تقريبا كان ممكن يغيب بالاسبوع ويرجع اصل الشغل اصل الدنيا اصل الظروف هو شغله صعب جدا

المهم كنت بصبر نفسى أنه بعد الجواز اكيد الحياه هتتعدل وكفايه عليا الساعتين بتوع اخر اليوم اللى هشوفو فيهم

وطلع بردو الموضوع غير كدا خالص لا بشوفو ولا اعرف عنه حاجه بردو هى هى نفس الحياه بقالها ٤ سنين ممكن يبات برا البيت بليومين ويرجع يغير هدومه وينزل ونفس الحال هو مش بيقعد مع صحابه هو طول الوقت فى الشغل

مفيش تواصل خالص بينى وبينو لا بيتغدا ولا بيتعشا فى البيت رمضان مش موجود العيد كذالك اى مناسبات فى العيله بروحها لوحدى بتبقى كل واحدة مع جوزها وانا بطولى لو اخد إجازة بيروح لوالدته طول اليوم يعوضها عن غيابه لانه وحيد مفيش اهتمام خالص عمرى ما سمعت منه كلام حلو الا قليل اوى هو محسوب عليا زوج فقط كلمه مش فاضى ومشغول دى على لسانه دائما خرجنا مشغول قسما بالله ما خرجت من يوم ما اتجوزت معاه طلعنا مصيف طيب مشغول بقيت طول اليوم قاعدة لوحدى بأبنى حاسه بوحدة اوى اوى بخاف بخاف جدا اتكلم مع اى حد راجل عشان متشدلهوش ولسه فى دماغه السفر بردو هو كأنه مسافر اصلا مش موجود وكل ما أكلمه احاول اخطف دقيقه كدا أكلمه واقوله انى تعبت كان يقولى انا قولتلك من الاول أن شغلى صعب وانى مليش فى الجواز وانى هظلمك معايا وانتى اللى صممتى حتى وقت كروونا كان يقوم يشتغل من النوم يقفل عليه اوضه من الاوض اقسم بالله يفضل قاعد فيها لحد ما نهار تانى يوم يطلع ولما البس وادخل اخبط عليه عشان اقعد معاه يقولى مشغول ومش هينفع ويقولى اصلى بشتغل من البيت طب دور على شغل تانى مواعيدو تكون مناسبه وتكون معانا يقولى لا طبعا انا بحب شغلى طب حبنى قد ما بتحب شغلك يقولى انا مخدعتكيش انا من الاول معرفك حياتى هتبقى ازاى حتى العلاقه بيغيب فيها اوى اوى فين وفين لما الاقيه عاوزنى انا بحس انى مش عجباه أنه مش حاببنى انا نفسى اسيب البيت واخيرو بينى وبين شغله بس حاسه ان مش هنجح انا بيصعب عليا اوى بجد انى مليش معاه مواقف حلوة مثلا لا خروجات ولا صور ولا اى حاجه بجد وبيصعب عليا نفسى والعمر اللى بيضيع انا صغيرة نفسى اسمع كلام حلو انتو متخيلين أن جوزى نزل الشغل بعد ٣ ايام من الجواز ارجوكم انا تعبانه قولولى ممكن اعمل معاه اى

حاجه كمان هو مكنش فاضى يعمل شقه عشان يتجوز ومن كتر ما هو مش فاضى كل حاجه اتركبست على دماغنا واخويا اللى كان واقف فى كل حاجه نزلت انا ومامته بس نختار العفش حتى لما العفش راح الشقه اخويا اللى كان واقف يوم الخطوبه أتأخر عشان كان فى الشغل يوم ما روحنا نودى حاجتى مكنش موجود اساسا جيه فى الاخر التنجيد يوم الحنه ويوم الفرح اخدهم إجازة وبعدهم ب٣ ايام وخلاص على كدا يوم ولادتى اول ما اطمن عليا مشى بردو راح الشغل ومقدرش يجى ياخودنى تانى يوم من المستشفى بعتلى صاحبه بلعربيه ووالدته

ابنى لسه صغير مش مدرك عدم وجودة

خايفه لما يكبر يأثر فيه عدم وجوده

 

 

رد بريد قراء بوابه العاصمة

شوفي

حبيتي من طرف واحد من البدايه

زوجك صادق معاك من اول لحظه

انت فعلا بتحبيه وقبلتي بوضعه المريب ده على أمل

بعد الجواز هيستجيب

وجودك في حياته هيفرق

هنخلف ونبقى اقرب واقرب

آمالك منطقيه جدا وياما ناس نجحوا فيها لكن

اللي حصل انه مافرقش معاه

ماحبكيش

هو لا خاين ولا لعبي

شغله مهم؟؟ بياخد معظم وقته؟؟

كله ده تمام

لكن يوم الاجازه كله يبقى مع أمه؟

عشان يعوضها غيابه،؟؟

ده هنا الحب

بيحبها وعايز يرضيها بيعوضها عشان بيحبها

 

اغلب ظني انه ما حبكيش

لان اللي بيحب بيعرف يخلق فرص بيعرف يخلق رضا ودفا

يعني ايه ٢٤ ساعه قافل على نفسه وبيشتغل؟؟؟

ما رحش الحمام؟؟؟

مافيش حضن كده وهو خارج من التواليت؟؟

مافيش بحبك كل ٨ساعات زي الانتيبيوتك😂

اللي بيحب بيعرف يعبر ولو بنظره عين لكن هو مش شايفك

وعلى ذلك لو حبك له مستمر فكملي وارضي بفتافيت وقته ومشاعره

خلاص تعبتي ماتكمليش

وتوقعي جدا انه لن يعبء بالفراق منك

لانه مشغول

ولاخر العمر مشغول

ربنا يكون في عونك جدا

معادله صعبه وللأسف لازم تكوني انت القاضي اللي يحكم لان النتيجه هتكون مسؤليتك لوحدك

ربنا يوفقك