الهيئة العامة للرعاية الصحية أعلنت في بيان رسمي إنها عملت أكتر من 7 مليون فحص طبي شامل للمستفيدين من منظومة التأمين الصحي الشامل في المحافظات اللي مطبق فيها النظام:

ايمان العادلى

بورسعيد، الأقصر، الإسماعيلية، جنوب سيناء، السويس، وأسوان، وده جزء من شغل كبير بيتعمل علشان صحة الناس وجودة الخدمة تفضل في أعلى مستوى..

البيان وضح إن الفحص الطبي الشامل بيتعمل دوري ومجاني لكل المنتفعين، وبيبدأ من أول التقييم التمريضي وقياس العلامات الحيوية، وبعدها كشف طبيب الأسرة وكشف الأسنان، ومجموعة تحاليل مهمة للكشف المبكر عن أي مشكلة صحية.. يعني فحوصات طبية كاملة تطمنك على صحتك من غير أي تكلفة..

الخدمات دي بتتقدم من خلال 285 وحدة ومركز لطب الأسرة في المحافظات الـ 6، غير العيادات المتنقلة وحملات طرق الأبواب اللي بتوصل لحد بيوت الناس اللي مش دايمًا يقدروا يروحوا للوحدات الصحية، لضمان إن حق الفحص المجاني يوصل للجميع..

الدكتور “أحمد السبكي” رئيس الهيئة، قال إن الفحص الطبي الشامل حق لكل مواطن مستفيد من التأمين الصحي الشامل، وإنه يعتبر أداة أساسية لاكتشاف الأمراض المزمنة بدري قبل ما تسبب مشاكل أو مضاعفات، وده كله مساير لتوجهات مبادرات 100 مليون صحة اللي ركزت على فكرة الوقاية قبل العلاج..

“السبكي” وضّح إن الفحص بيشمل 11 نوع من الفحوصات الدورية، زي قياس الضغط، فحص الأسنان، قياس نسبة الهيموجلوبين، تحليل سكر عشوائي، تحديد فصيلة الدم، وتحاليل متقدمة زي الدهون الثلاثية، السكر التراكمي، وظائف الكلى، فحص قاع العين، ورسم القلب..

وفي الحالات اللي بتحتاج متابعة أعمق، بيتم عمل أشعة موجات صوتية على القلب “إيكو”، وتحويل المريض للمستشفيات التابعة للهيئة علشان يكمل الفحوصات والعلاج اللازم على حسب حالته..

المنظومة دي مش بس علاج، دي متابعة ووقاية وتطمين مستمر، وكل ده بشكل مجاني وعلى أعلى مستوى لإن كل مصري يستحق إنه حياته تكون كريمة في كل تفاصيلها.