ولا شبر واحد ولا حبة من رمل سيناء”.

ايمان العادلى

لما دخل الرئيس السادات في مفاوضات مع الإسرائيليين كان عنده هدف استراتيجي أساسي وهو الانسحاب الكامل من الأراضي المصرية المحتلة

وكان شعاره في المفاوضات “ولا شبر واحد ولا حبة من رمل سيناء”.

 

والهدف التاني كان حل المشكلة الفلسطينية، مع إن الفلسطينيين نفسهم كانوا رافضين عملية السلام وبيهاجموها!

 

وعشان يوصل لهدفه كان لازم يواجه واحد من أصعب خلق الله وهو مناحم بيجن.

 

والغريب إن السادات مكنش بيواجه مناحم بيجن بس، لكن كمان كان بيواجه أعضاء الوفد التفاوضي المصري نفسهم، من أول وزير الخارجية محمد إبراهيم كامل، اللي استقال قبل توقيع الاتفاقية، لحد أصغر عضو في الفريق، ما عدا الدكتور أسامة الباز، اللي فضل مع الرئيس من أول لآخر لحظة.

 

السادات كان رجل دولة بيفكر بشكل استراتيجي ومش بيبص تحت رجليه وعارف إن التفاوض يعني “هات وخد”، لكن كل أعضاء الوفد كانوا “موظفين” ومتمسكين بالتفاصيل الصغيرة والشكليات اللي ممكن تضيع كل حاجة والأرض ماترجعش.

 

وقبل ساعات من توقيع الاتفاقية قرر أعضاء الوفد يواجهوا السادات بمخاوفهم،

واللي اتبرع عشان يروح يقابل الرئيس ويقوله كان السيد نبيل العربي، وزير الخارجية وأمين الجامعة العربية.

ووقتها كان مدير الإدارة القانونية بوزارة الخارجية.

 

نبيل العربي طلع على مكان إقامة الرئيس السادات، اللي قابله كويس جدًا، وقاله: اتفضل يا ابني خير في إيه؟

 

نبيل العربي قاله:

يا ريس احنا معترضين على الاتفاقية.

 

السادات ولع البايب بتاعه وسأله: معترضين على إيه؟

 

نبيل العربي ابتدى يقول الاعتراضات وكانت كلها متعلقة بمسألة فلسطين بشكل أساسي، وخصوصًا القدس، وبعض المسائل الشكلية الخاصة بالتواجد المصري في سيناء وإخلاء المستوطنات.

 

الرئيس السادات سمع كل كلامه بهدوء شديد وبعدين سأله: خلصت؟

 

نبيل العربي رد وقاله: أيوا.

 

السادات قاله:

بص يا ابني.. أنا سمعت كل كلامك من غير ما أقاطعك، عشان محدش يقول إني لا بسمع حد ولا بقرأ التقارير بتاعتكم، زي ما بتقولوا عني من ورا ضهري

لكن كل اللي قلته دخل من ودني اليمين وخرح من الشمال.

 

سامحني في الكلمة..

أنا رجل دولة.. وإنتم شوية سباكين..

 

إنتم ما بتفهموش في السياسة ولا التفاوض.. وبتبصوا على الأشجار وأنا شايف الغابة كلها.

 

أنا فلاح من المنوفية.. والفلاح لما يبقى عنده حتة أرض بيحط حديدة في أولها وحديدة في آخرها ويقول “دي بتاعتي”، وبعدها جاره ميقدرش يقرب منها، وهو ده اللي أنا عملته في سيناء.

 

بالاتفاقية اللي مش عجباكم دي أنا هحط حديدة في أول سيناء وحديدة في آخرها وكله بتوقيعهم.

 

أنا راجل واقعي وعندي استراتيجية عليا.. أرضي ترجع.. وأي حاجة تانية سهلة، لكن إنتم موظفين.

 

السياسة مش كلام في الهوا غير قابل للتنفيذ، وكل اللي بتتكلموا فيه تفاصيل ملهاش قيمة والزمن هيثبت كلامي.

 

عندي شوية قيود في سيناء؟.. وماله.. أنا في 73 كان قدامي القناة وخط بارليف وعديتهم في 6 ساعات..

وبعد الاتفاقية دي لو حصلت حاجة قواتي هتبقى في 6 ساعات داخل إسرائيل.

وكله مع الوقت هينتهي.

 

ثم أنا معايا تعهدات من جيمي كارتر، أقوى رجل في العالم، وكل المستوطنات في سيناء هتتشال.

 

وبالنسبة للفلسطينيين.. أنا عملت كل اللي أقدر عليه لكن مقدرتش أجبلهم دولة..

حاولت بس ده الوضع وموازين القوى.. لكن جبتلهم حق تقرير المصير وبدايات للحكم الذاتي وهما وشطارتهم.

هما بيشتموني وأنا هسيبهم وبكره هايندموا.

 

وبرغم كدا نبيل العربي والوفد المصري مقتنعوش برؤية السادات وكمان قاطعوا حفل توقيع الاتفاقية في البيت الأبيض.

لكن الرئيس اتعامل إنهم ولاده ومش فاهمين ومخدش أي إجراء ضدهم مع إن كان عنده سلطة يفصلهم كلهم، زي ما نبيل العربي نفسه قال بعد كدا في شهادته على الواقعة دي.

 

وتفوت الأيام ويعرف الكل إن السادات كان سابق عصره، ولولا اللي عمله الأرض عمرها ما كانت هاترجع.

 

ونبيل العربي ذات نفسه اتسأل في حوار سنة 2018: لو عاد الزمن إلى الوراء هل كنت ستوافق على عمل معاهدة مع اسرائيل؟

فرد وقال:

 

لم يكن هناك حل آخر لاسترجاع أرضنا وخروج إسرائيل منها.. إما نوقع الاتفاقية أو نحاربها.. وإذا لم تتم الاتفاقية الله أعلم ما كان يمكن أن يحدث.. وربما ظلت مصر محتلة من إسرائيل حتى الآن أو بقينا فى حرب لا نعلم نتيجتها والناس بتموت.

 

وهو ده اللي حصل مع اللي رفضوا طريق السادات..

وعندك الجولان محتلة لحد النهارده..

 

والقيود في سيناء كلها انتهت.

 

أما بالنسبة للفلسطينيين. فـ ياسر عرفات بنفسه اعترف بعد سنين إن كامب ديفيد أفضل 10 مرات من اتفاق أوسلو، اللي عمله مع الإسرائيليين.

وحتى في المفاوضات طلب تضمين بنود فلسسطين اللي في اتفاقية كامب ديفيد في اتفاقية أوسلو لكن رفضوا طبعًا وقالوله: “إنت متأخر 15 سنة”.

 

رحم الله العبقري البطل الشهيد أنور السادات..