خسوف القمر الدموى اليوم

إيمى عمرو

عايز اقولك ان بكره اغلب العالم هيشوف خسوف للقمر وهتحصل ظاهرة القمر الدموي بسبب لون القمر وقتها في ذروة الخسوف في مناطق واسعة من العالم بما فيها المنطقة العربيه

 

نخش كده على التفاصيل المهمة ونفسر ايه اللي هيحصل

 

🔴 شوف يا صديقي اليوم الاحد فالعالم على موعد مع ظاهرة فلكية ممتعة وهي خسوف القمر لما الارض تحجب ضوء الشمس عن القمر والظاهرة دي هيشوفها اكثر من 7 مليار شخص على مستوى العالم في اسيا وافريقيا واوروبا واستراليا واقصى شرق الامريكتين في اواخر الخسوف وبداية الخسوف هتكون الساعة 03:28 مساء الاحد بتوقيت جرينتش بدخول القمر منطقة شبه الظل وهيبدأ الخسوف الكلي 05:31 حتى الساعة 06:53 بتوقيت جرينتش

 

المناطق اللي هتشوف خسوف كلي مناطق واسعة من اسيا واستراليا واقصى شرق اوروبا واقصى شمال شرق افريقيا وده معناه ان الدول العربية في غرب اسيا وكمان مصر والقمر هيكون لونه احمر بشكل غامق جدا والظاهرة دي اسمها القمر الدموي

 

⚠️ طب ايه هي ظاهرة القمر الدموي؟

 

🔴 الارض وقت الخسوف بتحجب ضوء الشمس عن القمر وبالتالي بينحني الضوء عبر الغلاف الجوي للارض قبل ما يوصل لسطح القمر ومع مروره فاغلب الاطوال الموجية له بتتشتت وخصوصا القصيرة وبتتبقى الاطوال الموجية الطويلة زي اللون الاحمر والبرتقالي ودي اللي بتوصل للقمر بعد كده لان الارض بتكون بين القمر والشمس وكمان درجة نقاء الالوان دي بتعتمد على صفاء الغلاف الجوي للارض من الجسميات والغبار فوقتها بيظهر القمر بشكل دموي في السماء

 

☢️ طب الخسوف في مصر هيبدأ امتى في مصر؟

 

في البداية يا صديقي فالخسوف هيبدأ قبل شروق القمر عندنا فمثلا في القاهرة شروق القمر فهو الساعة 19:05 ولكن بداية الخسوف فعليا الساعة 18:28 وبكده نفهم ان وقت ما القمر هيشرق هيكون في بداية مراحل الخسوف وهو خسوف شبه الظل وبداية الخسوف الكلي هتكون الساعة 20:31 وذروة الخسوف الساعة 21:12 والقمر وقتها هيكون على ارتفاع 25 درجة في الافق تقريبا وهينتهي الخسوف الكلي الساعة 21:53 وهيتنهي الخسوف عموما بشكل تام الساعة 23:55