جرائم_حقيقية مذبحة_كفر_الدوار.
إيمى عمرو
وكأنه مشهد من فيلم رعب ،
الزمان:
ليلة 5 يناير عام 2020 ،
المكان: محافظة البحيرة ، إحدى قرى مركز كفر الدوار، منزل مكون من طابقين على طريق زراعي على أطراف القرية ، على مسافة غير قريبة من القرية نفسها.
سيارة ربع نقل من السيارات الموجودة بكثرة في الأرياف في كل أنحاء مصر وقفت قدام البيت في ظلام الليل ونزل منها شخص واحد .
اقترب من البيت وطرق الباب أكتر من مرة لحد ما فتح له صاحب البت وهو في حالة من الدهشة والتوتر
بعد حوار سريع دخله بيته.
في صباح نفس اليوم ،
بعض سكان القرية المارة على الطريق الزراعي لاحظوا سحب من الدخان طالعة من بيت حسني الموجود وسط الرزع .
حسني جارهم وقريب بعضهم وعارفينه كويس جدا .
الناس راحت بسرعة تحاول تطفي النار وتنادي على حسني وولاده لكن ما حدش رد.
باب البيت كان مقنوح.
دخلوا يطفوا النار ويشوفوا إيه اللي حصل لكن اللي قابلهم جوا البيت ما كانش مجرد نار اشتعلت في البيت لأي سبب إنما كان مذبحة..
مذبحة مريعة.
الموقف كان صادم لأقصى درجة لأهل القرية المسالمة.
الناس إتصلت بالشرطة اللي حضرت وبدأت تفحص المكان والجثث.
7 جثث هم كل اهل البيت.
حسني رب الأسرة 39 سنة ووالدته زينب السيدة العجوز وزوجته رنا وولاده ، أربع أطفال ، اكبرهم 15 سنة وأصغرهم 4 سنوات .
آثار طعـ،ـنات سكين على بعض الجثث وبعض الجثث محترقة.
الشرطة وجدت نقط دم خارج البيت وطبعا آثار إطارات السيارة كانت واضحة وخاصة في الجو الشتوي الممطر والأرض الترابية الوحلة.
شيء آخر لاحظوه،
المواشي اللي تخص الأسرة مش موجودة في البيت .
البحث عن المجرم لم يستغرق وقت طويل وخاصة أن الجريمة المريعة هزت أهل القرية وسببت لهم رعب شديد وعلشان كدا الكل تسابق في محاولة معرفة هوية المجرم .
وبالفعل اتعرف .
اسمه شريف .
بيشتغل جزار .
من نفس المنطقة.
ليه سوابق في ملفه سرقة،
ومعروف أنه متعاطي مخدرات وسيء السلوك.
بمواجهة شريف بالأدلة اللي جمعتها الشرطة اعترف بارتكاب المجزرة المروعة.
شريف مر بأزمة مالية كبيرة جدًا
فكر في سرقة مواشي يحل بيها ازمته.
جه في باله سرقة مواشي حسني بما إن بيته منعزل عن القرية .
اتخذ قراره وفي الليلة دي راحله على أنه زائر.
حسني استقبله ودخله بيته.
المجرم قاله أن عليه احكام وقضايا وخايف يتقبض عليه وجي يختبئ عنده الليلة دي .
وفي لحظة مفاجأة وبدون حسني ما ينتبه للغدر والخيانة في عيون المجرم، طلع شريف سكيتة وطعـ،ـن حسني بعنف طعـ،ـنة غائرة.
سقط حسني بينما اللي سمع الصوت كانت والدته العجوز زينب ،
طلعت من غرفتها تشوف فيه إيه،
أول ما شافها المجرم عاجلها بالطعـ،ـن بالسكين وسقطت السيدة العجوز بجوار جثة ابنها.
في نفس الوقت كانت الزوجة رنا خرجت من غرفة نومها وشافت اللي بيحصل، حاولت تصرخ وتجري تنادي أي حد لكن للأسف الليت كان بعيد وسط الزرع والوقت ليل متأخر ما حدش سمعها بينما عاجلها المجرم بضربة سكين لكنها فرت منه ودخلت غرفة ولادها.
دخل اامجرم خلفها وكمل عليها ضرب .
ولحد من الأطفال صحي وشاف اللي بيحصل،قاله :
” ما تقتلناش با عمو شريف ..إحنا ما عملناش حاجة ”
رد عليه المجرم بجملة مرعبة :
انتو اتحكم عليكم كلكم بالإعدام خلاص ”
وللتذكير ، الكلام دا من نص اعترافات المجرم في النيابة أثناء التحقيفات معه.
قتل الطفل وبعدين ولع النار في ملابس الزوجة وتركها تحرق البيت كله.
والنتيجة كانت مذبحة مروعة غير مسبوقة في تاريخ القرية كلها.
محاكمة الجزار شريف لم تستغرق إلا شهر واحد.
محاميه حاول يدقع بكونه مريض نفسي وعنده حالة فصام وغير مسؤول عن تصرفه ليلة الجريمة وأنه تم احتجازه في مستشفى نغسي لفترة .
أسرة المجرم اللي اتضح إنها أسرة ثرية جدا بالفعل عرضت دفع دية 20 مليون جنيه لأسرة الضحايا
لكن كل دا تم رفضه واتحكم عليه بالإعدام.
أثناء جلسة النطق بالإعدام كان واقف في القفص يبتسم .
حكم الإعدام اتنقذ بالفعل في المجرم شريف .
تمت
ملاحظات:
▪︎ القصة مكتوبة من واقع اعترافات المجرم في النيابة واللي تم نشرها في الصحف فيما بعد .
▪︎ لو عندك أي معلومة إضافية أو مختلفة في الموضوع أكتبها في تعليق.
▪︎ الصورة حقيقة أثناء الحكم عليه بالإعدام.
