الحوت القاتل Killer whale…

إيمى عمرو

دا حوت “الاوركا Orca”.. اللي انتشر انه قتل مدربته امبارح.. واتحول لتريند عالمي.

 

هو مش قاتل ولا عدواني مع البشر رغم انه على قمة الهرم الغذائي في البحر وعلى حافة الشط.. اللقب متحرف من Whale killer.. او “قاتل الحيتان”.

 

لأن الأوركا بتقدر تقتل وتصطاد اكبر الحيتان اللي بتقابلها.

 

“مخ” له زعانف وذيل واترمى في البحر. مخها وزنه بيقرب من ٧ كيلوجرامات.. وفيه تعاريج للذاكرة والمعلومات والتفكير زي مخ للبشر. حيتان الأوركا أذكى من كل سلالات الدلافين الأخرى.

 

أذكى من الكلاب.

 

وخد المفاجأة.. أذكى من قرود الشمبانزي والأورانجوتان.

 

ذكاء الاوركا يساوي ذكاء شاب عنده ١٦ سنة.

 

أقوى مفترس في البحر.. مفيش قروش بتصمد قدام الأوركا حتى لو اكبر حجما.. اللعبة مش بس في وزنه وسرعته وقدراته.. لأ.. هو كمان ذكي.

 

الأوركا اترصدت بتناور القرش الأبيض الرهيب وتنقض عليه بضربة واحدة في اماكن قاتلة زي المخ او الكبد. بينتزع كبد القرش كأنه جراح.

 

اترصدوا بيصطادوا في جماعة ويعملوا كماين ويمزقوا زعانف القرش عشان يشلوا حركته ويغرق.

 

لهم لغة خاصة تقترب من لغات البشر.. واللغة بتاعتهم معقدة للغاية ومزيج من عدة أصوات منها الصفير.. وممكن يتعلموا ويرددوا كلمات بشرية في مناسبتها.. زي “هاي” و”شكرا” و”باي”.. والخ…!

 

بيكلموا بعض وبيتفاهموا ويعلموا بعض ويعلموا صغارهم معلومات وخدع.

 

كل عشيرة لها افراد وكل فرد جوا العشيرة بينهم وبين بعض له اسم…!

 

بيعرفوا يعدوا الارقام.. وبيميزوا اسلحة البشر وادوات صيدهم.. وفاهمين ان العالم منقسم لاعماق بحر وارض وسماء.

 

بيظهروا مشاعر معقدة للغاية زي الحب والحزن والانتقام والكراهية واليأس والفرح.. ولكل عشيرة “تقاليد” مختلفة.

 

في عشيرة اترصدت وهي بتتحرك في شكل طابور.. واعضاء الطابور لهم ترتيب.. ممنوع يتخالف.. وعشائر بتتحرك في دواير.. وغيرها بتقفز للسطح تتفرج على المواني والبشر والعالم الخارجي.. وغيرها في تقاليدها ممنوع تعمل دا.

 

عشائر الأوركا بتدرسها سفن الابحاث بالدرونز وروبوتات الغوص. اترصد لهم طقوس شبه جنائزية قريبة للغاية من جنائز البشر.. اتعملت لأم أوركا ماتت من بقية عشيرتها.

 

في أم فضلت تحاول تنعش صغير أوركا مات لمدة ١٧ يوم.. باعتبار انه ممكن يكون “في غيبوبة”.. وكانت بتحمله للسطح وتحاول تخليه يتنفس.. لحد ما بدأ يتحلل.

 

بيتبادلوا نكات بلغتهم ويضحكوا! وبيعملوا خدع ومقالب في بعض وفي البشر.

 

في مجموعة اوركا اتعودت تتظاهر الموج جرفها لحافة الشط.. وترقد بلا حراك.. والحقيقة ان الخبراء عارفين ان الاوركا بتعرف تطلع لحافة الشط وتستقر على الرمل.. وتحرك جسمها ترجع للمياه لوحدها.

 

كانت بتمثل انها اتجرفت للشط.. ولما البشر يقربوا منها كانت بتبخ عليهم مياه وتضحك وترجع الماء.. ومرة ثبتت بشر حاولوا ينقذوها بثقلها في رفق وضحكت ورجعت الماء بطريقة “ضحكت عليك”.

 

بيلتفوا في دواير ويصنعوا امواج بديولهم توقع كلاب البحر من فوق الصخور وبلوكات الثلج العائمة عشان تأكلها.

 

بيستجيبوا لموسيقى البشر ويحبوها.. ولهم موسيقاهم الخاصة بمزيح من الصفير والاصوات الاخرى.

 

بيستعملوا ادوات.. واترصدوا بيعملوا اكمنة لفرائسهم ببقايا شباك الصيد الغارقة.. واترصدوا بيلبسوا على زعانفهم سلاسل جنزير معدنية غارقة وحبال كإسسوارات.. ويحطوا فوق رؤوسهم قبعات من جماجم الاسماك اللي اكلوها…!

 

مش بيهاجم البشر الا على سبيل الخطأ وهجماته عليهم متتجاوزش صوابع يدك الواحدة.. اشهرها متزلج مياه نام فوق لوح التزلج فاتلخبطوا واتصوروه من الاعماق كلب بحر.. وسابوه لما اكتشفوا انه رجل.

 

“بيغلسوا” على قوارب الصيد ويبلطجوا عليها ويقطعوا الطريق لو الاكل شحيح.. علشان تديهم سمك.. ويسيبوها تعدي.

 

في ٣ أوركا في الأسر مدربهم وقع من ارتفاع وارتطم بحافة حوض السباحة ووقع في الماء بعدما ضلوعه اتكسرت.

 

الأوركا بتشوف بعنيها وبالموجات فوق الصوتية.. فلما رصدوا جسم المدرب فحصوه بالموجات فوق الصوتية وادركوا ان ضلوعه مكسوره.. فحملوه من ساقيه وذراعيه بعيد عن ضلوعه المكسورة عشان ميتألمش.. ووصلوه لحافة الحوض!

 

في أوركا انتحرت بعد موت شريكها وحشرت نفسها وسط حبال او حطام عشان تموت ومتعرفش تطلع للسطح تتنفس.. لانهم بيتنفسوا هوا زينا.

 

دي سلوكيات ومشاعر معقدة للغاية.. زي سلوكيات البشر بالضبط.

 

الاوركا في الطبيعة بتساعد البشر لو في أزمة في البحر زي الدولفين.. لأنها علميا.. فصيل دولفين في الحقيقة.. ولها ترتيب في الإنقاذ.. بتنقذ الستات الحوامل اولا.. العلماء فهموا انها بتعرف انهم حوامل بالموجات فوق الصوتية كذلك.

 

الاوركا في الأسر ممكن يقتل بدافع الانتقام.. لأن الأوركا عشان يعمل عرض للجمهور. فهم بيجوعوه كتير.

 

ومقابل ما يؤدي المطلوب بيدوله سمك.

 

بعض الاوركا بيرفض دا بعد فترة “أنت مش حتذلني بالاكل وانا كيان راقي ذكي”.. وبيهاجم المدرب.

 

ساعات بيهاجم المدرب من باب اللعب.. ويشده ويعضه جامد ويسحله للأعماق.. هو بيلعب.. بس اتحمس شوية.. في اوركا غرق مدربته في ٢٠١٧ وشدها من شعرها للاعماق لمجرد انه بيلعب.

 

ساعات بيكتئب من الأسر نفسه.. وبيبقى راغب في البحر المفتوح. الأوركا فاهم ان هناك “ما وراء أسوار السجن”.. حتى لو اتولد واتربى في الأسر.. ودا حير العلماء وأظهر ذكاء و”تفكير” بشري.. زي ما البشر البدائيين اللي مشافوش الحياة الاخرى ومحدش كلمهم عنها قط.. كانوا فاهمين ان في شيء ورا بوابة الحياة المعروفة.

 

في الحبس او الأسر.. الأوركا بيظهر سلوك زي مساجين البشر بالضبط مع الوقت.. عدوانية وقلق وتوتر.. تجاه البشر وتجاه بعضهم.. حتى تجاه نفسهم…

 

أسباب هجمات الاوركا على البشر في الأسر لسه مش معروفة بالضبط.. في ٩ هجمات في التاريخ للاوركا في الاسر.. ماتسببتش في وفيات.. واربع هجمات قاتلة.

 

الأوركا اللي بتخرج من الأسر للبحر المفتوح اترصدت بتبدي انفعالات زي البشر.. وتبكي فرحا وتحتفل.

 

كل هجمة أوركا في الأسر بتنشط موجة انتقادات ضد أسرهم.. وبتطالب باطلاقهم في البرية من جديد.

 

خد بقى المفاجاة الأكبر.

 

والأخيرة…

 

فيديو هجمة الأوركا على مدربته “جيسيكا رادكليف Jessica Radcliffe” إمبارح… مزيف بالكامل.

 

فيديو مفبرك ببرامج ذكاء صناعي متطورة.

 

ومفيش جريدة محترمة واحدة جابت الخبر.. هو جاي من تيك توك.

 

ومفيش مدربة أوركا في العالم.. باسم “جيسيكا رادكليف”.