انقطاع سنترال رمسيس كشف فجوة خطيرة في منظومة الشبكات: أين “التوافرية العالية”؟

إيمى عمرو

اللي حصل مؤخرًا في سنترال رمسيس مش مجرد عطل فني، ده كان ناقوس خطر. الإنترنت وقع، شبكات المحمول اتأثرت، الأرقام الأرضية والطوارئ شبه اتعزلت، والمحافظ الإلكترونية والتطبيقات البنكية شبه تجمّدت. ليه؟ لأن نقطة واحدة كانت “محورية” بدون بدائل أو تحوّل تلقائي سريع.

في أي نظام شبكات حديث، بيكون في حاجة اسمها High Availability أو التوافرية العالية، ودي معناها ببساطة: إن الخدمة تفضل شغالة حتى وقت الكوارث، من خلال توزيع الأحمال، وجود نسخ احتياطية، وكابلات بديلة، وتحويلات لحظية بدون تدخل بشري.

اللي بيحصل عالميًا؟

السنترالات بتتوزع جغرافيًا، الكابلات بتترسم في شكل حلقات، والخدمة مبتقعش حتى لو حصل عطل ضخم.

لكن اللي حصل عندنا بيقول إننا لسه معتمدين على “نقطة محورية واحدة” من غير خطة بديلة واضحة. وده بيفرض ضرورة فورية لإعادة تصميم شبكة الاتصالات الوطنية بشكل يضمن استمرارية الخدمة مهما حصل. خصوصًا مع وجود العاصمة الإدارية الجديدة، اللي من الطبيعي يكون فيها سنترالات موازية تُفعل أوتوماتيكيًا عند أي عطل.

📍الدرس واضح: الاستمرارية في زمن الرقمنة مش رفاهية… دي ضرورة وطنية