عشق
ايمان العادلى
مرة واحدة بس في العمر… هيعدي علينا “إحساس العشق”
مش حب عادي، لأ… ده الإحساس الأعظم، الأصدق، الأقوى من كل “أحبك” اتقالت في حياتك.
ممكن نحب مرة واتنين وعشرة
بس العشق؟
العشق بيحصل مع شخص واحد بس.
شخص ملامحه محفورة في قلبك مش عقلك بس
وشه ييجي فـ بالك حتى وانت وسط الزحمة
صوته يطمنك من غير ما تتكلم
واسمه… يرسم على وشك ابتسامة حتى لو في عز وجعك.
ده الشخص اللي مهما عمل فيك
مبتقدرش تكرهه، ولا تنساه، ولا تتخطاه
كل لحظة جميلة تعدي؟
تتمنى يكون جنبك ويكملها بيك.
كل نقطة مطر تنزل؟
تدعيله من قلبك من غير ما تحس.
هو الشخص اللي لو 100 قالولك “بحبك”
مش هتصدق غير صوته هو
مش هتستناها غير من شفايفه هو،
ومش هيطمنك غير حضنه هو.
هو اللي قلبك دق ليه دقة مختلفة
دقة مكنتش مجرد إحساس
كانت حياة بتبدأ أول ما شافه.
ده الشخص اللي لو الدنيا كلها تحت رجلك،
مش هتحس إنك ملكت حاجة… لو هو مش معاك فيها.
ده اللي لو ليك أمنية واحدة هيبقى هو الأمنية دى
أو هتقسمها معاه وتسيب لنفسك جزء صغير، بس تبقى جمبه.
شخص واحد بس
وجوده بيلغي وجود أي حد… وكل حد.
هو البداية والنهاية.
هو الماضي اللي عشت فيه، والحاضر اللي بتتنفسه،
والمستقبل اللي مش هتحس بيه من غيره.
هو توأمك…
عشق الروح الأبدي… والأوحد.
التعليقات مغلقة.