الفضفضه (صحة) .

 

 

بقلم ؛سمر يوسف

 

العقل ساعات بيتعب

والقلب بيتهد حِيلُه

والروح بتتخنق..

فانت لما بتفضفض ، إنت بتتنفس

وزى ماجسمك محتاج يِخَرَّج التعب منه

قلبك برضوا محتاج يخرج اللى جواه

 

والعاقل مش اللى بيستحمل ويشيل ويكتم فى قلبه لحد ماينفجر ..

العاقل هو اللى عارف ان الفضفضة ضرورة بس خطر ..

مغامرة والريسك فيها كبير ..

فلو قررت تفضفض لحد اعرف انك أخدت الريسك وبتسلم نفسك لقبضه إيده ..

هتقوللى كل حاجه فيها ريسك

الحب فيه ريسك ،

الصداقه فيها ريسك

هاقولك اه بس هما اللى ف قبضة ايدك وقلبك فى صدرك ..

اما الكلمه لو طلعت منك خلاص مبقتش فى ايدك انت كلك على بعضك كدة بقيت فى احتمالين يا اما الايد دى تشيلك وتشيل معاك ..ياإما تفعصك وتندمك انك فتحت بؤك

 

فلو مالكش حد امين تفضفض معاه ممكن الفضفضه تكون مع كوبايه شاى ،فنجان قهوة ..

فى كراسه فاضيه محدش بيقرا اللى فيها غيرك بتقول فيها ( الكلام اللى جوه )

فويس نوت لنفسك وانت بتحكى وبتعيط وبتفرح وبتخطط وبتستغرب وبتقرر ..بتكلم نفسك فى كل كبيرة وصغيرة

المهم انك بتطلع كل اللى جواك وتتنفس

وتبقى شايف ربنا محاوطك من كل اتجاه ..وموصى كل حاجه حواليك تقولك احكيلى

تحس غيوم السما بالليل سامعه همسك ودعواتك للى خلقها وخلقك

شمس الصبح ونورها اللى بيدخل من الشباك على سجادة الصلاه فى مكان سجودك وقت الضحى سامعاك ..

ربنا دايما موجود بيسمعك حتى لو مش عارف تبدأ منين

احنا بشر

والبشر ضعيف

ولو هنقفل على نفسنا ونكتم جوانا عشان مانتأذيش يبقا بنموت نفسنا بالبطئ

الحل اننا نختار نفضفض لمين

مش اى وِدْن تنفع تبقا حضن

ولا كل الناس اهل للثقة ..

 

ياعزيزى الفضفضه ماتنفعش مع (صديق ولا عدو ولا حبيب )

 

لو اخترت الفضفضه تكون مع انسان

يبقا لازم تكون مع صاحب/ه جدع وعشره عُمْر .

شخص واحد ، وحيد، أوحد.

عنده الامان

مبيزهقش وكل ماتتكلم يقولك كمان ..

ويقسم الحِمل لنصين ويشيله معاك …

هو اللى بيكشفلك حلول ماكنتش شايفها ..

وبيكمل جملتك قبل ماتقولها ..

الشخص دة نتاج سنين وعشرة ومواقف حلوة كتير ومواقف صعبه اكتر ..

وفى كل الاحوال ماتغيرش ولا اتبدل

ولا سرك معاه خرج بره البير

يدارى عليك ويحمى ضهرك ويغطيك ..

بيسمعك من غير حُكم ولا نصايح ولا تأنيب .

الفضفضه ليها اصول

الباشمدرسة ツ

29_5_2025