الرصيد

 

ايمان العادلى

 

في العلاقات، في حاجة اسمها الرصيد وده مش مجرد كلمة، ده ميزان بيتحدد بأفعالك وتصرفاتك، مش بعدد الكلام الحلو اللي بتقوله. الرصيد مش بيتبني في يوم، لكن ممكن يخلص في لحظة لو الاستهتار زاد.

 

لما تكرر نفس الأسلوب رغم العتاب، رصيدك بيقل

لما تسيب حد زعلان وتقول ظروف رصيدك بيقل

لما تتغير فجأة من غير سبب واضح، رصيدك بيقل.

لما العتاب يبقى على نفس الحاجة مليون مرة ومفيش تغيير، رصيدك بيقل.

لما تتعامل بمزاجك وتاخد الناس على حسب رغبتك، رصيدك بيقل.

لما كلامك الحلو يكون مجرد كلمات عكس أفعالك، رصيدك بيقل

لما الحقيقة تكون واضحة قدامي وأنت مصر على الكذب رصيدك بيقل.

 

الراجل لو بيحبك عمره ما يتجاهلك مستحيل يعدي يومه من غير ما يكلمك من غير ما يعرف عنك حاجة روحتي فين بتعملي إيه جيتي منين أكلتي شربتي.

الراجل اللي بيحبك ما يعرفش ينشغل عنك ما يعرفش يقولك “أنا مشغول” أو “عندي ظروف الراجل اللي بيحبك ما يعرفش يختفي ويظهر

الراجل اللي بيحبك مهما اختلفتوا، مهما اتخانقتوا مهما حصل، يفضل لازقلك، يفضل في ضهرك، يفضل سندك، يفضل معاكي حتى في قمة الزعل.

فما تقوليش حبيبي بيتجاهلني” أو انا مش من أولوياته لا ده مش حبيبك

العلاقات مش ماشية بنظام “خد وهات” بس ماشية على مبدأ التقدير والاحترام. أبنى رصيد يسمح إنك تفضل موجود لأن لما الرصيد يخلص محدش هيحاول يعيد الشحن.