وصفات البط

إيمى عاطف

 

🔴 البط المشوى فى الفرن .. ( Roast Duck) ..

 

مقادير وصفتنا على وزن يتراوح ما بين ٢ ل ٢ كيلو ونص تقريبا

 

⬛ اول حاجه لازم نفكر فيها هى ازاى نشيل اى سلبيات من طبخ البط

 

والبط مشهور بحاجاتين ..

1- بيبقى فيه طعم زفاره لو ما اتنضفش كويس

2- لحمة قاسى ومش بيستوى بسهولة

 

والحاجتين دول هنقضى عليهم تمامااا بالخطوة اللى جاية دى

 

🔶 محلول الملح … Brining solution

 

ده الحل السحرى اللى تعتبر الوصفة كلها مبنية عليه

ومقاديره بتكون ..

 

🔸3 لتر ميه باردة من الثلاجة

🔸نص كوب ملح “يفضل الملح الخشن”

🔸كوب إلا ربع سكر

ده كده الأساسى …

 

الإختيارى بقى .. ممكن نضيف فصوص حبهان وقرنفل وقرفة عيدان وورق لورى وفلفل اسود حب وقشر برتقال وحلقات ليمون .. كل دى منكهات هتدخل جوه مسام اللحم وتديلوا طعم أغنى (لازم تبقى حاجات صحيحة مش مطحونه)

 

▪️هاندوب كل المكونات دى مع بعض كويس جدا

 

▪️وبعد ما نكون غسلنا البط ونضفناه تماما بنجيب خلة أسنان خشب رفيعة ونبتدى نعمل ثقوب عميقة فى مناطق اللحم الكثيف عند منطقة الصدر .. وده عشان المحلول يتغلغل جوة الأنسجة ويطريها ويطعمها كويس.

▪️هاننقع البط جوه المحلول ونحط عليه حاجه تقيله عشان يغطس بالكامل ونخللى منطقة الصدر لتحت .

هسيبوا “فى التلاجة” يوم كامل ونقلبوا بعد 12 ساعه نخللى الصدر لفوق

▪️تانى يوم بلاقى المية دى لونها اتغير وسحبت كل الزفارة والسوائل الغير مستحبه وكمان اللحم شارب من المحلول كويس

 

▪️هفضيها واجففه بمناديل مطبخ (مش هشطفوا خالص) وابتدى اجهز التتبيلة الخارجية ..

 

🔸معلقة كبيرة من السبع بهارات

🔸معلقة كبيرة من الملح

🔸معلقة صغيرة من الفلفل الأسود

🔸معلقة صغيرة من البابريكا

 

ها أخلطهم فى …

 

🔸ربع كوباية مية

🔸وربع كوباية زيت

🔸ومعلقتين كبار خل

🔸واربع معالق كبيرة من عصير البرتقال او الليمون

🔸ومعلقتين كبار من العسل الأبيض او معلقتين كبار من دبس الرمان “بيدى طعم ولون أجمل”

🔸ومعلقة كبيرة صويا صوص (إختيارى)

 

▪️هدوب التتبيلة كلها فى بعض كويس جدا واوزعها على البط فى كل مكان جوه وبره وهخللى منها حوالى معلقتين برة هاستخدمهم أثناء عملية الشوى

 

▪️هسيبها فى التتبيلة دى حوالى ساعتين مع التقليب كل نص ساعة

 

▪️بعدين هجهز كيس حرارى (وده أفضل إختيار ) او صينية املى نصها ميه سخنة واضيف فيها شوية توابل عطرية صحيحة زى القرنفل والقرفة والحبهان وورق اللورى والفلفل الأسود الحب وهضيف بصل متقطع قطع كبيرة وجزر وفصين توم صحيح وكرفس (كل ما سبق إختيارى تنوعوا فيه وتشيلوا وتحطوا زى ما انتم عاوزين)

واحطها فى الفرن وفوقها مباشرة الشبكة اللى هضيف عليها البط

 

▪️هانحشى بطنها قطع بصل متبل بالفلفل الأسود والملح وممكن تضيفوا معاها شريحة برتقال إختيارى

 

▪️هقفلها كويس بخلل الأسنان واضم الجناحات عشان ما تفتحش معايا

 

🔶 لو هنستخدم الكيس الحرارى هكتفى بحشو البطن واضيف مع البصل جزر وممكن احط حواليها جوة الكيس جزر وبصل يكونوا متقطعين قطع كبيرة شوية عشان ما يتهروش

 

▪️هانغطيها كويس بورق زبدة وعليه ورق فويل وندخلها الفرن ويكون ساخن مسبقا على الرف الاسفل على اعلى درجة حرارة لمدة ساعه

▪️بعدها ههدى الحرارة لغاية 200 واسيبها ساعه كمان

▪️بعدها هشيل من عليها الغطاء او افتح الكيس الحرارى واشرطها خفيف من على الجلد بالسكينة سمبوكسات زى الصورة كده

واضيف معلقة دبس رمان او معلقة كاتشب على باقى التتبيلة اللى معايا وادهنها بيها كويس من فوق ومن تحت وادخلها تانى نص ساعه (ربع ساعة على كل اتجاه) وممكن 10 دقايق تحت الشواية لو بتحبوا الجلد يبقى مقرمش وكريسپى.

 

⭕ طبعا دى طريقة من غير سلق ولا شوربة .. لكن اللى بيحب شوربة البط وبيستخدمها مثلا فى الرقاق او المحاشى فى بوست تانى نازل بالطريقة الصحيحة اللى تخلينا ناخود احلى واطعم شوربة من البط