المش الصعيدى

إيمان العادلى

المقادير
برطمان بلاستيك
جبنه قريش …زجاجه لبن رايب …..طبق مورته فلاحى…..بجنيه دنكار من العطار ….. ملح خشن…..شويه مش من عند حد موثوق فيه
يعنى ايه موثوق فيه ….يعنى من عند حد المش بتاعه نضيف …..

الطريقه
اولا الجبنه هنحطها فى طبق بلاستيك كبير بحيث تبقى بعيد عن بعضها …نرش عليها ملح ونحطها فى اى مكان بعيد عن ايدينا لمده ثلاثه ايام وكل يوم نرمى الميه اللى بتنزل منها وبعدين هتكون نشفت نحطها فى البرطمان اللى موجود عندنا
طريقه عمل المش
هنحط اللبن الرايب على شيه المش وعليهم المورته ونبتدى نصفيهم بالمنخل السلك الرفيع …..معندكيش منخل ….حطيهم فى الخلاط على بعض وضيفى عليهم الدنكار معلقه كبيره بتاعت الاكل ……ضربتيهم فى الخلاط حطيهم فوق الجبنه اللى فى البرطمان
وحطى كيس بلاستيك على البرطمان وحطى الغطا عليه واقفلى كويس و ما تفتحيش قبل أربع شهور
وبالهنا واللى هتجرب تدعيلى

تحذير ….

.اوعى تحطى قرون فلفل او ليمون او قشر يوسفى غلط جامد… القرون بتاعت الفلفل تتحط فى برطمان لوحدها وتحطى عليهم شويه مش لكن مع الجبنه لا … اوعى هيعمل حشرات