فراخ كنتاكي المقرمشة

 

إيمان العادلى

 

#الطريقة

:نقطع الفراخ صغير ونجيب بولة نحط فيها كوبايتين دقيق ونص وربع نشا ومعلقتين خل وملح وفلفل وباربكيا وتوم وبصل بودر وشطة ومعلقة بهارات ونحط عليهم حوالي كوباية ماية عادية ونص لغاية ماالعجينة تبقي وسط ولا تقيلة ولا خفيفة

نصربهم بالمضرب العادي عشان تتقلب كويس ونحط فيها الفراخ ليلة كاملة

 

تاني يوم نحضر طبق تاني فيه دقيق عادي كوبايتين مثلا وعليهم ربع كوباية دقيق درة و٣ اكياس فيجيتار ومعلقة ملح ونفس التوابل اللي حطيناها في العجينة فوق

 

ونجيب طبق تالت فيه مية ساقعة من التلاجة وبحط فيها تلج عشان تفضل ساقعة

 

#الزيت ده اهم حاجة عشان الفراخ تطلع مستوية لااااازم يكون غزير بمعني يغطي الفراخ ويكون سخن اوووي قبل مااحطها

 

نطلع الفراخ من النتبيلة ونحطها في طبق الدقيق ومكوناته تتغلف كويس وبعدين اطلعها احطها في المية يدوبك انزلها واطلعها…

وارجعها لطبق الدقيق التاني تتغلف وتعمل طبقة تانية

 

وبعدين انزلها في الزيت السخن واغطيها واهدي النار تبقي اقل من الوسط واسيبها براحتها بتاخد مثلا ربعاية وبعدين اقلبها الجنب التاني..

 

وقبل مااطلعها اعلي النار عليها عشان تقرمش بقي واطلعها علطول… وبالهنا

 

#تعديل طريقة الكول سلو:

تلات معالق كبار مايونيز وعليهم ربع كوباية لبن ومعلقة خل صغيرة ومعلقتين كبار عسل ابيض او سكر بودرة واضربيهم كويس وحطي فيهم الكرنب والجزر المبشور وقلبيهم كويس قبل الاكل بساعة.. مش بيتحط ولا زبادي ولا اي توابل تانية وهي بتتاكل مسكرة كدة وبتبقي احلي من بتاعة برة