قصيدة وداع الشهيد..
بقلمي انتصار محمد حسين
….….
قول يا ابني
قول ياشهيد
هما صحيح قتلوك؟
أيوة يا أمي
قتلوني لماكنت بصلي
وانت بتصلي!
أيوة يا أمي
حتي شوفي.. دمي مغرقني
روحي يا أمي هناك
للمسجد مكان ماكنت بصلي
هتلاقي هناك ريحة مسك
أهو ده دمي
وكمان هتلاقي سبحتي
وقعت مني
مكان ماكنت بصلي
قتلوك ياحبيبي وانت بتصلي!
أيوة يا أمي
ياحبيبي يا ابني
قتلوك ياقلبي
وانت بتصلي!
طيب ياشهيد ماخافوش الله!
وفي بيته اتجرأو وسفكوا الدماه
طب هيروحوا منه فين
ودمك ليهم مغرق الإيدين
قتلوك ياولدي
وقتلوا كل المصلين
اللي لربهم راكعين وساجدين
طب ده يرضي مين
روح يا ابني
روح ياشهيد
روح للجنة هناك واتهني
وحزني عليك هيفضل يزيد
قتلوك الغدارين
ورصاصهم جوة قلبك دفين
قتلوك ياولدى وفضيت علية الدار
وزودوا علية الأنين
قتلوك الخاينين
قتلوك تجار الدين
خدوا روحي معاك
ودبحوك بسكين غدرهم الأليم
قتلوك المنافقين
خانوك وخانوا رب العالمين
خدت يا ابني معاك كل الفرح
وبفراقك ياابني سايبلي الجرح
بودعك آخر وداع
وحزني هيفضل يملي الأسماع
آه ياغالي علي قلبي
آه ياللي فراقك جرح قلبي
لكن اللي مصبرني
إنك هتروح الجنة وأكيد هتتهني
طيب يا أمي بلاش بقي تبكي
ده ربنا وعدني
بإني هروح الجنة وكمان هتهني
ودلوقتي يا أمي سلاااام
أهم جايين لية قوام
مين دول يانور العين
الملايكة يا أمي أهم جايين
واقفين قدامي أهم صفين
ومعاهم عطور الجنة
ومعاهم منها الرياحين
وكفني معاهم أهه يا أمي
لونه أخضر م الجنة مزهر
والمسك اهه منه ينقط
الله يا أمي لو تشوفيهم
يااااه يا أمي لو ليهم تجيهم
وكمان الجنة أهه بابها انفتح علي وسعه
وكمان واقفين الحور العين
فرحانين ومهللين
وبالشهادة مبسوطين
وبمكانتي العالية مبشرين
يااااه يا أمي لو تيجي معايا الجنة
واتشوفي ابنك وهو بيتهني
روح يا ابني
روح يا شهيد
روح الجنة هناك واتهني
روح وهقابلك في اليوم المجيد
لكن من بعد مناخد تارك ياشهيد
اكتشاف المزيد من بوابة العاصمة
اشترك للحصول على أحدث التدوينات المرسلة إلى بريدك الإلكتروني.
