أغرب من الخيال! _ من ديوان “إعادة ترتيب الروح” بمعرض القاهرة للكتاب2020
الشاعر/احمد ربيع
النهارده صحيت ونفسي
إني اجرب شئ جديد
مش مهم انا هكسب ايه
مش مهم إني استفيد
ممكن اطلع عـ الطريق
وامسك الصندوق وانادي
اتبرعوا لبناء قلوب
تدخل المسجد نضيفه
ولا هركب مكروباص
وادفع الأجرة قصيدة
وان سألني حد جنبي
هقوله عايش بالمقايضه
المهم بإني هعمل
حاجة غير واقع حياتي
مش مهم الاقيلها فايده
ممكن اقتل حد قالي
اني مش هوصل لحلمي
واقوله: حلمي اني اقتلك
وتبقي أخر أمنياتي قبل إعدامي..
إني اروح علي قبره يومها
واقوله: اهو “مش قولتلك”
ممكن اعمل أي حاجة تكون غريبه
ممكن ارسم تحت بيتنا
نفسي علي هيئة فروع
وان ساعتها قالوا شجرة
ولا بيا استهتروا
هخلع جذوري قصاد عيونهم واترمي
مش مُبرر..
بس لازم نترمي علشان نبان
والمثال:
الزرع وقت حصاده يتشال عـ الكتاف
والبذرة ياما اتداس عليها واترمت
ممكن اعمل أي حاجة بدون مبرر
زي مثلا..
إني اروح لعماره واقفه في أي حاره
واقولها: امشي.. ده مش مكانك
في فيلا حلوه روحي واقفي جنبها
زي مثلا..
اني اطلع سطح بيتنا واقول هطير
وان قالولي: اعقل..
هقول:
خدنا ايه مـ العقل في بلاد الفطير
نفسي اجرب شئ جديد
زي مثلا اني الف الدنيا طولها وعرضها
معلش خاني المعني ده
مش مستحيل
ليها ناس بتلفها
لينا الخيال هو اللي باقي منَّها
وعشان كده انا نفسي اوصل للخيال
وارسم حاجات ابعد مايمكن عـ الحقيقة
زي مثلا..
اني اروح علي بحر يشبه حضن امي
واسيب له روحي يضمها
زي مثلا اني اروح من غير مبرر
واقول بجد بحبها.
التعليقات مغلقة.