سؤالك وجوابك عندنا

إيمان العادلى

ما هو القلق وكيف نتداوى منه ؟
الأجابة

من الطبيعى إن الإنسان يقلق من وقت للتانى كنتيجة طبيعية لتعرضه للضغوط اليومية ، وأحياناً بيكون القلق مفيد للإنسان وبيخليه منتبه ومستعد لمواجهة الأمور الصعبة والمشاكل اللى بتقابله ، طالما متعداش القلق المعدل الطبيعى المسموح بيه .
لكن إذا تخطى القلق المعدل الطبيعى ، وبدأت تظهر عليه أعراض مرضية زى الشعور بالخوف المستمر من المجهول أو الأرق أو الشعور بصداع نصفى أو مزمن أو الشعور بتشنجات عصبية ، وصعوبة فى البلع واضطراب المعدة ، وصعوبة التركيز …..وغيرها كتير من الأعراض اللى بتختلف من حالة للتانية .
هنا بيتحول القلق الطبيعى لقلق مرضى ويبدأ المريض يحس بالمعاناة ،والعجز ، ويفقد استمتاعه بالحياة اليومية بعد ما بيتم استهلاكه نفسياً .
وللقلق أنواع كتير منها على سبيل المثال :

Separation anxity disorder

وده بيظهر عند الأطفال فى الأسر اللى بيحصل فيها طلاق أو انفصال ،أو بيكون فى مشاكل كتيرة بين الطرفين، فتلاقى دايما شكوى إن الولد أو البنت مش مركز ومش بيذاكر ، وحاسس بضيق وزهق ، وقلقان ، ومش قادر يكمل حياته ، وبيكون ده بداية جرس الإنذار للتدخل المبكر للعلاج .
وعلاج القلق له طرق كتير ، ومن أهمها العلاج السلوكى الإدراكى (CBT) ، لتحسين الأعراض والرجوع تدريجياً للأنشطة اللى كان بيتجنبها المريض بسبب القلق . عشان تقدر تساعد مريض القلق إنه يتابع حياته بصورة طبيعة .