أول يوم فراق.. من ديوان “إعادة ترتيب الروح” بمعرض القاهرة الدولي للكتاب2020
الشاعر/ احمد ربيع
أول يوم فراق
شكل النهار
ممزوج بلون الليل
فنجاني وشه خفيف
لكن بدم تقيل
والمايه نازله تحس مش طيقاك
نغزة وجت لك
من قُرب طرف سريرك
وكبوس عجيب صحاك
اليوم ده شكله غريب
انا صاحي ليه دلوقت!
معقول اكون اشتقت؟!
البُعد ليه كداب!
غالِطني لما مشيت
ومقلش إني هقوم
علي كل ده بَعدك
بالله عليكي إرجعي
أنا باقي علي وعدك
اليوم كئيب جدا
وعقاربه متنمرده
يرضيكي طيب كده!
يعني الفراق سَعدك
ساعديني وهسعدك
مدي الحياة ليا
وحياتي هي إيديكي
مديها من فضلك
لما الفراق فاض بيا
انا قلت افضفضلك
والفرق بيني وبينيك
زي الحنين والشوق
مين اللي حن لمين
مين الأحن عليكي
غير حد داق منك
حبة وجع مُرين
ورجع يدوق تاني
وانا عارف اني حزين
وبتوه في أحزاني
ولساني سابق ديما
طب مانتي عرفاني
بحلف بإني خلاص
عمري ماهرجع تاني
لو مهما يحصل إيه
او مهما قلبي اشتاق
وفي كل مره بحن
في أول يوم فراق.
اكتشاف المزيد من بوابة العاصمة
اشترك للحصول على أحدث التدوينات المرسلة إلى بريدك الإلكتروني.
