ياأهلا بالمعارك …أقصد المدارس

كتبت : نيفين صالح
ياخفى الألطاف نجنا مما نحذر و نخاف أيام وتبداء الدراسة وتنتهى الاجازة (اجازة ماتمت خدها الغراب وطار)وسترفع كل أم شعار ياأهلا بالمعارك وتتسلح بسلاح الأمهات الأبدى (الشبشب)وتدخل فى معارك يومية متواصلة (صبح وليل ليل وصبح )حتى أيام العطل الرسمية .
مع انتشار الادوات المدرسية فى المحال التجارية والمكاتب (الجو بقى ريحته أقلام وكراسات والذى منه )استعدادا لبدء العام الدراسى الجديد عند رؤية الأباء والأمهات لهذه السلع والسؤال على أسعارها يصابوا بنوبات هلع تكاد تكون مفزعة ومفجعة فى بعض الاحيان .ستعود الدراسة (لنا الله كله عند ربنا)وتبداء المعارك اليومية التى تنقسم الى نوعين
معارك قبل بدء اليوم الدراسى مثل:
· ناموا بدرى عندكم مدرسة بكرة
· 30 مرة قوم ياحبيبى هتتأخر على المدرسة
· 10 مرات ادخل الحمام
· 20مرة افطر
· 50مرة غير هدومك
· 20مرة يلا هنتاخر على المدرسة
وبعد كل ده هيكون لسه مجهزش للمدرسة
طبعا فى خناقات فرعية ولكنها لاتقل ابدا عن الخناقات الاساسية .
ولاننسى خناقات ومعارك السندوتشات والمصروف التى من الممكن ان يتخلف على اثرها ضحايا.
النوع الثانى معارك بعد انتهاء اليوم الدراسى
· 20 مرة غير هدومك
· 40 مرة اكتب الواجب الذى من الممكن ان ننتهى من الواجب بعد او مع أذان الفجر( اهو نصلى الفجر وندعى على الواجب)
· 80 مرة فواصل من قوم ذاكر
· 60مرة قوم نام وراك مدرسة الصبح
وفى الختام عزيزتى الأم يجب ان تتحلى بالصبر ثم الصبر والكثير من الصبروياحبذا لو وضعتى اعصابك فى ثلاجه او غسالة اللى يريحك السنة طويلة ولسه بنقول ياهادى وميصحش ابدا تكتفى بهذا القدر من التعليم اولادك قدرك ونصيبك لامفر منه (ومينفعش تسربيهم مش بينفع صدقينى غيرك حاول ومنفعش) تحلى بالصبر والبرود وان شاء الله السنة الدراسية تمر مرور الكرام سنة دراسية سعيدة(سامحنى يارب على الكدب ده)
وتستمر المعارك كل يوم ،وفى يوم الإجازة نأمل ان نجدد نشاطنا (هنام نوم …..)
وتأتى الرياح بما لاتشتهى السفن الساعة 6صباحا
ماما إصحى عندنا مدرسة(ماشاء الله بيصحى لوحده فى الاجازة)
لحظة ياحبيبى ابكى فى صمت….ضاعت الاجازة.