الموت سفاح
شعر/ أحمد ربيع الدخاخني
الموت سفاح
ازاي يتجرأ ياخدك من وسطينا ياصاحبي
بالله لاترد عليا
ازاي اوصفها القهره
لسه مكانك فاضي علي القهوة
والكرسي سألني عليك امبارح
ملاقتش جواب
بالله لاترد عليا
ازاي اوصفها القهرة علي الأحباب
طب جالك قلب تسيبنا ازاي!
بالله لا تقول
معقول مش راجع تاني ياصاحبي؟!
يتألم كرسي القهوة في بُعدك
شلتنا هتنقص ضلع وينحني عودها
وهي الماكنه لو تنقص ترس.. هتلف ازاي!
مش تسأل طيب قبل ماتمشي
وتسيب تذكار
مش عادتك يعني تكون غدار
ياخي قول انك هتسيبنا خلاص
ولا انت زعلت اكمن هزرنا تقيل
طب كنت تقول هنخف هزار
بالذمه ده وقت تفارق فيه
والله ما لاقي كلام يتقال
ولا يوصف حزني عليك أشعار
ياخي راعي اللقمه مابينا وماتسبناش
وهو الموت كان اجدع منك
انا عارف انك اقوي كتير
بس انت اكيد مش حابب تقعد هنا فمشيت
وانا لو عارف ان رجوعك ينفع تاني لو اتمناه
كنت اتمنيت
بس انت اكيد مرتاح دلوقت
احنا اللي نقصنا في بُعدك روح
احنا اللي هلكنا ياصاحبي
وانت اللي نجيت.
اكتشاف المزيد من بوابة العاصمة
اشترك للحصول على أحدث التدوينات المرسلة إلى بريدك الإلكتروني.
