يوميات زوجه صايمه ٣

الحلقة ٣
بقلم سهير عسكر
مها:والله انا زهقت ياعماد جبت آخرى خلاص من الواد ده
عماد: واد مين؟
-عمر يعنى هيكون مين؟
-عمر ابننا ده..تاعبك فى إيه؟ دا حتى كيوت وأمور ..إيه ياحبيبي مزعل ماما ليه
-مابيسمعش الكلام خالص ياعماد أنا مبقاش فيا حيل ليه..عامل مشاكل فى كل حته والمُدرسة بتاعته بتشتكى منه
-أولاً ..انتى غلطانه حد يودى ابنه حضانه طول السنة صيف وشتا..دا الواد يتعقد من التعليم
-والله أنا لو طُلت أوديه حضانه بالليل لأبعته على طوول
-ياساتر ليه كده؟ مش قدام الولد يامها
-آهو عندك أهه شوفلك حل معاه
-خلاص سيبيهولى النهاردة
وبعد قليل
عماد: إيه بقي ياعم عمر الأبله بتاعتك بتشتكى منك ليه؟ إنت ياض أنا بكلمك سيب الكرتون اللى بتتفرج عليه ده وكلمنى ،ومين رزان زميلتك دى ماما قالتلى عليها
-إسمه أنيميشن يابابا مش كرتون واسمها الميس بتاعتك مش أبلتك ورزان دى المزة بتاعتى ..دا انت قديم اوى
-يانهار أبوك اسود ..اتعلمت الألفاظ دى منين..ياواد رد عليا
-فُكك ياعم
-فكك..إيه قله الأدب دى ..طبعاً ماانت ابن مها أومال هتطلع لمين
-إنت قصدك ان ماما قليله الأدب..ياماما ياماما..تعالى شوفى بابا بيقول عليكى إيه
-إخرس ياض يابن ال……. عيب ياعمر ..دا كلام رجاله متدخلش ماما فيه
-ماشي يابوب ..تدفع كام
-أدفع كام دا إيه؟..طاب بص هجيبلك شوكلاته
-خليهالك..انا عاوز تابليت
-عاوز إيه ياروح أمك
-إنت بتشتمنى ب ماما ..ياماما. يا ماما
-بس ياحبيبي أنا بهزر معاك..هجيبلك اللى انت عاوزه بس قولى الميس ضربتك ليه؟
-أبداً حاجه بسيطة خالص..كنت ببوس المزة بتاعتى
-انت اتجننت ..عيب ياعمر..هى رزان دى مش زى أختك؟
-لأ..دى صاحبتى..هو ينفع أتجوز أختى
-لأ طبعاً..وإيه كمان؟
-ضربت الواد زياد عشان بيعاكس الحته بتاعتى
-اللى هى رزان؟
-أيوة
-الله الله ع التربية الحديثة ياست مها..بس عارف إنت كده جدع عشان لازم تخاف عليها وتدافع عنها
-أخاف عليها دا إيه؟ ماتغور فى داهية ..أنا خايف لتصاحب زياد وتبطل تدينى مصاصه وشوكلاته زى كل يوم
-ما انت ابن مها هتفكر ازاى يعنى؟! بص ياعمر ياحبيبي…عيب ماينفعش تكلم بنات..صاحب الأولاد بس
-ليه؟؟
-من غير ليه..انت هتسمع الكلام وللا أكسر دماغك دى
-حاضر يابابا
-بقولك إيه ياعمر..هى الميس بتاعتك دى حلوة
-صاروووخ
-طاب ماتجيبلى نمرتها عشان أبقي أطمن عليك منها برضه
-بابا مينفعش تكلم بنات..مش انت لسه قايل كده
-ههههه…تصدق عندك حق..ما أنا هاخد النمرة وأديها ل ماما ..بس إوعى تقولها ..أصلى عاملها مفاجأة
-آااااه. مفاجأة ،وتجيبلى التاب
-تاب إيه يا واد يابن الكلب انت
وفى اليوم التالى
عماد: مها يامها انتى ازاى تسيبينى نايم لحد دلوقت اتأخرت ع الشغل
مها: شغل..هو دا الشغل بتاعك؟!
عماد: إيه ده؟؟
مها: دى رسايل موبايلك ياسي عماد
عماد: دول زمايلى فى الشغل وبيعيدوا عليا عادى
مها: تقوم زميلتك تقولك وحشتنى ،وبعدين بتدور على نمرة مُدرسه عمر ليه؟
عماد: أنا..مين اللى قالك كده؟ ومين اللى فتح تليفونى ..انتى جبتى الباسوورد منين؟؟ انت ياواد ياعمر إيه اللى فى إيدك ده؟
عمر: دا التاب اللى ماما جابتهولى
عماد: بعتنى ياعمر…واطى زى…..
عمر: زى مين ياسي بابا؟
مها: بُصلى هنا وكلمنى ملكش دعوة بالواد
عماد: الواد ابن الكلب ده لازم يدخل حضانه داخلية..مش عاوز أشوف وشه فى البيت
عمر: ههههه…قال بيقولى متكلمش بنات قال…طاب اشرب بقي ياعم عماد
****يتبع****