زي العادة
بقلم :د.اشرف محمد القط
هو:
زي العادة انا جاي مـ الشغل
مراتي حبيبتي مساء الفل
فين الأكل يا ست الكل
هي :
يووه يقطعني يا نور العين
أصل خدتني الحلوة عيونك
دبت انا فيها غرام وحنين
قامت نار الشوق الوالعة
فضت غاز الأنبوبتين
وانا معرفتش اطبخ حاجه
عندك جبنة في التلاجة
هو:
بس لو الشوق ولّع تاني
وهيتكرر كده موضوعك
تطبخي لينا حلة محشي
وتشويلنا اللحمة علي ضلوعك
هي:
أما صحيح راجل مفجوع
مش بتحس بغير الجوع
كرشك واقف بيني وبينك
لما بتشبع وأما تجوع
هو:
يسلم فمك لما ينّقط
دايماً هو العسل الخام
كده يا حبيبتي فضل ونعمة
جنب الجبنة هيبقى تمام
اكتشاف المزيد من بوابة العاصمة
اشترك للحصول على أحدث التدوينات المرسلة إلى بريدك الإلكتروني.
