وصفات العاصمة
فرايد تشيكن
إيمان العادلى
المقادير
– كيلو من قطع الفراخ اللي تحبوها.
– كوبايه ونص دقيق متعدد الاستخدامات.
– معلقتين نشا.
– نص معلقه صغيره ملح.
– نص معلقه صغيره فلفل أسود.
– نص معلقه كبيره بودرة ثوم.
– نص معلقه كبيره بودرة بصل.
– مكعب مرقة دجاج مطحون.
– معلقه صغيره بابريكا.
– بولة مياه ساقعه متلجه.
طريقة التحضير
– هنغسل قطع الفراخ كويس ونصفيها بمصفاه ونسيبها لحد ما تتصفى خالص.
– في بوله كبيره نخلط الدقيق مع كل التوابل الي قولنا عليها ونسيبهم على جنب.
– نجيب قطع الفراخ ونتبلها من نفس التوابل ولو عاوزينها سبايسي هنزود معلقتين صلصه الحاره ونخليها ترتاح في التلاجه 4 ساعات على الاقل.
– بعد كده ناخد قطعة فراخ ونحطها في خليط الدقيق والتوابل ونتأكد انها اتغمست في الخليط بشكل كامل.
– نشيل القطعه من الدقيق ونتخلص من الدقيق الزياده ونغمسها في المياه المتلجه وننزل بيها في خليط الدقيق تاني ونغطيها بالخليط كويس.
– نكرر نفس الخطوات مع باقي قطع الفراخ ونحطها في صينيه أو طبق كبير وندخلها التلاجه اقل حاجه 3 ساعات ويستحسن يوم كامل.
– نحضر طاسه غويطه فيها زيت كتير بحيث يغطي قطع الفراخ.
– نسخن الزيت وننزل بكل قطعة فراخ براحه خالص في الطاسه ونسيب مساحه كافيه بين القطع وبلاش نخليهم لازقين في بعض.
– نقليها لمدة 20 لـ 25دقيقه على نار متوسطه ونحولهم ونقلبهم كل شويه.
– نطلع قطع الفراخ من الطاسه ونصفيها من الزيت كويس وبالهنا والشفا.
