مبدايا انا عارفه ان حياتى كلها غلط في غلط و انى ظلمت نفسي كتير و ظلم نفسي وصلنى انى بتعالج نفسيا و ماشيه بالمهدئات وبالعلاج النفسي والعضوى

 

انا زوجه ف اواخر الثلاثينات ماساتى بدات لما جوزى خانى و بعد سنين مشاكل و صراع و ضغط نفسي و عصبى انفصل عنى لكن رفض يطلقنى علشان عندى بنتين و رفض علشان بناتنا انه يطلقنى عارفه انى كنت ممكن اخلعه او اطلق بمحاكم لكن معنديش قدره ماليه امشي فى محاكم وفى نفس الوقت محبتش اعمل كده علشان ميتعايروش بناتى لما يكبروا بانى خلعت ابوهم و السبب الثالث انى خفت ميصرفش عليهم و طبعا انتوا عارفين ان المحكمه بتحكم بمصروفات متفتحش ربع بيت

كل دى اسباب خلتنى اسكت عن حقوقى و تدريجيا اشيل الشيله لوحدى الحمل تقيل و نفسيتى تعبت و بقيت عصبيه من اقل حاجه بنهار . بقالى عشر سنين على الحال ده بشتغل و بربى بناتى و هو يدوب يصرف باقل القليل لان الحاله الماديه بالنسبة له مبقتش احسن حاجه و دايما مش موفق فى حاجه و امور كلها غلط و غضب من ربنا عليه بحسبن عليه دايما مع كل مشكله تقابلنى وانا فيها لوحدى راجل قبل ما اكون ست . مليش حد امى و ابويا متوفيين من زمان و معنديش غير اخ مسافر بره و حياته بعيده عنى تماما مليش حد غير بناتى عمرى و شبابى راح و صحتى بقت فى النازل

مشكلتى دلوقتي انى بقيت بدور على الحب والاحتواء والتقدير بره مش بعمل حاجه غلط لكن برضه مش بعمل صح بتعرف من خلال النت على رجاله و منهم اللى متجوز و منهم اللى منفصل بتكلم كلامى عادى كاصحاب لكن مفيش حاجه خارجه لكن طبعا من ناحيتهم هم بيحاولوا بتلميحات لكن اول ما بحس ده بقفل و ببعد . وربنا يشهد على انا مليش فى الغلط ولا الحرام و بخاف ربنا بس حقيقي محتاجه سند و حب و علاقه صح و حلال مش عارفه اعمل ايه و انا عايشه صراع صعب اووووووى ما بين ضميرى و خوفى من ربنا و ارضاء رغباتى و حقوقى

نفسي اعدل حياتى نفسي استقر نفسي محتاجش حد ماديا ولا ابو بناتى لانى بكرهه من كل قلبي خانى و كسرنى و سابنى اعافر فى الدنيا لوحدى و هو بنى ادم معدوم الإحساس والإنسانية طلبت منه كتير يطلقنى انانى مش عايز يخسر حاجه و مش شايف فى القصه غير نفسه

ارجوكم ادعمونى قولولى ازاى ادفن احساسي و اموته و مش عايزه اكلم اى راجل ولا ادور على اى مشاعر

قولولى ازاى اوصل لمرحله الرضا الكامل و مفكرش فى اللى محرومه منه علما بانى مشغوله و متبهدله فى شغلى يعنى اللى انا فيه ده مش وقت فراغ ولا فضا علشان محدش يقولى اشغلى نفسك

انا نفسي ربنا يرضى عنى و مفكرش فى حاجه

نفسي اشوف حقى بيرجعلى من اللى دمر حياتي بالشكل ده و سببلى اذى خلانى فقدت الثقه فى نفسي

طيب انا حتى لو اتطلقت منه و اتجوزت انا خايفه على بناتى من راجل غريب دول بنات وانا معنديش ثقه فى حد

ارجوكم ادعولى ارجوكم نفسيتى زى الزفت و المهدئات بقت تتعبلى اعصابي زياده و الدكاتره معندهمش غير مسكنات و مهدئات مبقتش تجيب معاي نتيجة

 

 

رد بريد قراء بوابة العاصمة

ربنا يثبتك ويقويكي علي حملك سواء لنفسك او أولادك

 

بس من كلامك واضح ان زوجك لسه معاكي وفي حياتكم وبيصرف لكن علي قدرة … ولا هو منفصل عنكم وانتي زوجة علي الورق وخلاص

 

في الحالة الاولي ..

بدل ما تبذلي مجهود وكلام وغيره مع حد تاني وحياة جديدة وغيره تقدري تبذلي نفس المجهود مع زوجك وتشوفي طريقة للحل والعلاج سواء مثلا اننا نشترك في شغلنا ونفقتنا ونغير من حياتنا وربنا يدعمنا ونكون في حال افضل

 

الحالة الثانية …

اطلقي باي وسيلة كانت وانهي المهزلة دي وربنا بيقول( وان يتفرقا يغني الله كلا من سعته ) فربنا يوفقك لحياة جديدة تكون أفضل وفيها عفة من ربنا

 

وفي كل الأحوال ربنا ثم ربنا ثم ربنا

ركعتين في جوف الليل وسجدة طويلة تكلمي فيها ربنا يصلح الحال ويفتحلك باب رزق وفضل وأمل