ضعف الذاكرة لدي الأطفال

كتبت : أسماء فكري السعيد علي
كتير من أطفالنا بيكون عندهم مشكلة خطيرة جدا وللأسف بتبدأ معاهم وهما صغيرين و مش بيلاحظها لا الأمهات ولا المحيطين بالطفل بل قد يتوقعون غالبا أن ما يقوم به الطفل نتيجة تلك المشكلة ما هو إلا نوع من شقاوة الطفل أو عدم تركيزه لكثرة اللعب أو لعدم إهتمامه بالأمر ..
فمن منا لم يحدث معه تلك المشكلة ليقوم بتعنيف الطفل وبشدة بل وبمعاقبته ظنا من الأم أو الأب أن الطفل يتناسي كلامهم ( يطنشه يعني ) أو يلتهي باللعب فلا يسمع الكلام أو يأخذهم الخيال لما هو أسوأ أن الطفل مش ذكي ويبدأوا ينعتونه بالغباء أو مش شاطر لكن في الحقيقة كل ده بيكون غلط وغلط جدا كمان والسبب إننا مش إكتشفنا ولا لاحظنا المشكلة الحقيقية وهي ( ضعف الذاكرة لدي الأطفال ) ..
طيب يعني هو إيه اللي بيحصل وعلامة ذلك علي الطفل إيه ..
هجاوبك وأقولك ساعات كتير الطفل بيقوم بتصرف أو يقول كلمة فتوجهيه بإنه مش يعمل التصرف ده تاني ومش يقول كده .. لكن بعدها نفاجأ بأن الطفل يكرر نفس الموقف أو بيقول نفس الكلمة ولما تواجهيه وتقوليله ( أنا عملت ليه كده ؟ مش قلت ما تعمل ولا تقول كده تاني ؟ ) .. تجدي الطفل ينظر لكي مستغربا ويقولك لأ محصلشي أو مش فاكر نسيت .. ساعتها بنستشيط غضبا ونقول علي ابننا غبي أو شقي ..
وضعف الذاكرة عندي نوعين ( ضعف طويل المدي — ضعف قصير المدي ) ومهم جدا إني أحدد النوع اللي طفلي بيعاني منه علشان اعرف وأحدد إزاي هتعامل معاه

طيب كل اللي فات ده جميل .. لكن السؤال أنا كأم أو أب أو مسئول عن الطفل إزاي نعرف من التصرف اللي بيعمله الطفل إن تركيزه قليل ( ضعيف الذاكرة ) ولا ده نوع من الشقاوة ..
هقولك دي بعض العلامات اللي هتخليكي تقدري تفهمي وتحللي الموقف ومنه هتفرقي هو تركيز قليل ولا شقاوة :

١ — هتلاحظي إن الطفل ما بيقعدش في مكان ثابت يعني كثير الحركة تصل لحد الإفراط في الحركة وسهل جدا إن أي حاجة تشتت تفكيره وبسهولة جدا تقطعي تركيزه .
٢ — بيضيع حاجاته دايما ومش منظم خالص .. يعني تحسي إنه فوضوي في غرفته ولعبه وأدواته .
٣ — عنده صعوبة شديدة في التعلم والإستيعاب وده نتيجة إنه عنده صعوبة إنه يفتكر حاجة عن الدروس والمذاكرة .
٤ — مابيعرفش يقعد على واجبه المنزلي يخلصه مرة واحدة لازم يقوم مليون مرة ويطلب طلبات كتير أغلبها بيكون غير منطقي زي إنه جعان وهو لسة واكل أو عاوز يروح الحمام والأدهي إنه عاوز ينام وممكن يكون لسة صاحي من قيلولته .
٥ — خطه في الكتابة بيبقي سئ نوعا ما بالنسبة لأصحابه اللي في سنه .
٦ — المهارات الرياضية زي الجري والقفز بيكونوا صعبين عليه جدا إنه يعملهم وبيهرب من أي موقف هيبذل فيه مجهود عضلي أو موقف متعلق بالجري والسرعة .

طيب هو ما ينفعش نعالج القصور في التركيز دا عند ولادنا ؟ .. لا ينفع طبعا بس لازم قبل ما نقول العلاج نعرف ايه هي الأسباب وراء القصور ده ..

اولا : انه ما بياخدش عدد ساعات نوم كفاية يعني ربما بيسهر كتير لأوقات متأخرة وبالتالي بيصحي متأخر وعلشان كده لازم تحاولي تغيري الروتين دا وخليه يصحي بدري .. لأن ده هيزيد من نشاطة وطاقته وهيساعده علي تنشيط الدورة الدموية بانتظام اللي بتساعد علي تنشيط المخ .. وعموما الطفل بيحتاج من ٨ ل ٩ ساعات نوم حسب عمره .

ثانيا : الضغط اللي انتي كأم أوكأب كمان بتمارسوه عليه إنك لازم تذاكر الكمية دي كلها علشان لازم تجيب الدرجة النهائية .. ولازم .. ولازم … دا كله بيجيب مع الطفل نتيجة عكسية مش زي ماأنتي متوقعه خالص .

ثالثا : نظام الأكل اللي ولادنا بيتناولوه .. يعني بلاش سكر كتير وقهوة زي اللي بابا بيشربها أو شاي زي اللي بتحبه ماما والأطعمة الجاهزة من برة لأنها مليانة كالوري ومواد منبهة بتدمر جهاز التركيز بالمخ في سنهم الصغير ده .. يعني حاولوا تأكلوا الطفل لحمة أو تونة أو فراخ و لبن أو زبادي لأن دي أطعمة بتكون مفيدة ليه جدا لاحتوائها علي الكثير من الفيتامينات والبروتينات اللي بتساعده في بناء جسمه وتكوين عقله .

رابعا : الواجبات اللي بتبقي صعبة عليه وانتي شايفاها فعلا بالنسبة لسنه غير مناسبة .. ما تقوليش له لازم تحلها وتخلصها لا بالعكس حاولي إنتي أو باباه تخلوها في صورة مفهومة الأول وبعدين ساعدوه إنه يحلها .. يعني دعموه بالتبسيط أولا ثم المساعدة البسيطة للوصول للحل لأن ده مش هيخليه يمل ولا يزهق من المذاكرة والواجب .. ولو استطاع الحصول علي الحل الصحيح يجب مكافئته كنوع من التشجيع له .

عشان كدا في بعض الطرق اللي تقدري من خلالها تحسني تركيزالطفل وتقوي كمان بيها ذاكرته .. طيب زي إيه :
أولا : لازم تلاحظيه وهو بيلعب وهو بيقرأ كتاب وهو بيتكلم مع أصحابه أو عن أصحابه ومن خلال كلامه او تصرفاته استنتجي ايه هي اهتماماته وحاولي تدعميها وتقويها .

ثانيا : حاولي إنك تتكلمي مع المدرسين بتوعه وإشرحيلهم مشكلته وخليهم يساعدوكي بعلاجها عن طريق إنهم يقربوا منه ويكلموه طول ما هو في الفصل عشان يركز معاهم ومش يتوه أو يركز في حاجة تانية وبرده أنهم يشجعوه علي شطارته وتركيزه بإن أصحابه يصفقوا له أو مكافئته ولو بقطعة بونبون .

ثالثا : خليكي صبورة جدا وافهمي طفلك وعقليته واحترميه ولغة الحوار بينكم تكون مبنية علي الصداقة بدل ما تشتميه وتضربيه وتحسسيه بالإهانة .

رابعا : وقت ما يكون بيعمل واجباته وفري له مكان هادئ .. يعني بلاش تشغلي التليفزيون وبالذات علي حاجات بيحبها أو تشد انتباهه وبلاش تتكلمي مع إخواته في مواضيع تجذبه وتخلي عنده فضول لمتابعة الحديث والحوار بينكم لكن ممكن تقعدي جمبه تقري كتاب زي ما هو بيقرأ بالظبط أو تمسكي ورقة وقلم تحسبي فيهم مثلا مصروفاتك لليوم وتفهميه إنك انتي كمان بتعملي الواجب زيه عشان يحس إنك انتي بتعملي حاجة مفيدة زيه .

خامسا : قسميله جدول لليوم .. يعني مثلا ساعة مذاكرة وساعة لعب و ساعة يمارس هواياته المفضلة وساعة رياضة معينة المهم أنه يواظب باستمرار عليهم علشان يعرف معني الإلتزام وده كمان هيساعده يركز في الوقت فيعطي كل شئ وقته .

سادسا : استخدمي نظام المكافأة الأسبوعية أو الشهرية يعني قوليله اعمل الواجبات كلها ويكون معظمها صح يعني حددي له نسبة في النجاح والإنجاز وآخر الأسبوع هنخرج نتفسح أو فاجئية بهدية .

سابعا : قسميله واجباته يعني مثلا قسمي الصفحة اللي بيقراها ل ٤ فقرات أو المسائل اللي بيحلها لنقط معينة ده هيساعده علي الانجاز السريع والتركيز كمان .

ثامنا : طوري عنده مهارات زي الجري ولعب الكرة هي مش بس بتساعد في تقوية جسمه لكن كمان مفيدة لعقله وتخليه يركز كويس على اللي هو عايزه .. لأن افتكري أن العقل السليم بيكون في الجسم السليم .

تاسعا : إلعبي معاه في وقت فراغه الألعاب اللي بتنمي ذكاؤه زي ألعاب الpuzzle اللي بتبقي عبارة عن صورة متقطعة وبيكون مطلوب منه إنه يجمع الأجزاء المفقودة عشان يكمل الصورة أو لعبة الكلمات وهي إنك تطلبي منه يجمع أقصي عدد من الكلمات بيكون فيها حرف معين وليكن حرف ال ” أ ” مثلا من الحاجات اللي موجوده قدامه وتشوفي هيقول إيه أو لعبة الارقام المفقودة وهي إنك تقولي مثلا أرقام متتالية لتنسي رقما بالمنتصف فيقوله هو .. مثلا ( ٦-٨-٩ ) ليقول هو فين ( ٧ ) يا ماما .. كمان لعبة الكاسات البيضاء مفيدة جدا اللي هو جيبي ٣ كاسات وجنيه فضة و حطي تحت كاسه منهم الجنيه وبعدين بسرعة بدلي مكان الكاسات وخليه يكتشف تحت أنهو كاس موجود الجنيه .. دي بتخليه قوي الملاحظة جدا .

فيه ألعاب كتيرة جدا هتساعدك إنك تحسني تركيزه بس الأهم إنك تكتشفي المشكلة بدري و توفري له ساعة من وقتك كل يوم تتكلمي معاه وتسمعيه .. ودا هيريحك كتير بعد كدا وكمان هيساعد علي تحسين سلوكيات الطفل وبالتالي تطوير مهاراته وتركيزه ..
وافتكره إن ولادنا أمانة بإصلاحهم سيصلح المجتمع .