ساعدوني خايف بيتي يخرب أنا شغال في شركة انترناشونال معروفه متجوز من 3 سنين عن حب ومعانا ولد.

مراتي اتعرفت عليها في الشغل زميلتي واشتغلنا مع بعض في نفس القسم 8 سنين في خلالهم اتخطبنا واتجوزنا ولله الحمد.

أول ما اشتغلت هي في الشركه كنت انا اعلى منها سيكا عشان سابقها ف الشغل والخبره بعدها بسنه ونص هي اترقت وبقينا في نفس الليفل واستمر الوضع دا سنين وسنين حصلت فيها بيننا كل حاجه حلوه حب وخطوبه وجواز وخلفه.

دلوقتي من 6 شهور هي اترقت وبقت اعلى مني ف القسم بتاعنا.

هي مش مشرفه عليا ولا تيم ليدر ولا حاجه عالفريق بتاعي لكن يعتبر في القسم مسمى البوزيشن بتاعها اعلى وكمان مقر الشركه الاجنبيه في الشرق الاوسط بيبقى في دبي فهي من ميزات البوزيشن الجديد انها كمان احيانا تروح اجتماعات ف دبي.

المشكله عندنا في سيستم الترقيات في الشركه، فيه طبعا ترقيات بتحصل بناءا على تراكم الخبره بس دى تيجي بعد سنين طويله مش بسهوله، وفيه ترقيات تانيه بتيجي بالحظ بناءا على عقود العملاء بتوعك، وعقود العملاء بتوعنا سنويه اصلا. فتلاته من عملاء مراتي لما جم يجددوا عقودهم السنوية زودوا العقد بتاعهم وطلبوا خدمات اكتر من الشركه بالتالي ارتفع المدخول اللي بيجي منهم ومراتي استحقت الترقيه. يعني هي سياسه كدا غريبه في الترقيه.

المهم مراتي اترقت.

ودلوقتى بحكم البوزيشن الجديد هي بتدخل اجتماعات مع الexecutives وتسافر على دبي مرتين عالاقل مع ان البوزيشن بتاعها مش عالي اوى بس فيه ميزات حلوه تزود خبرتها في الcv.

علاقتنا كويسه ومفيش حاجه اتغيرت بيننا بس الموضوع بيدايقني اوى وهي بقت تعرف حاجات وقرارات للشركه قبل ما نعرفها انا وباقي القسم بحكم دخولها للاجتماعات دى وكمان بقت معاها واحده من التيم تساعدها مع عملاءها يعني تقدرو تقولوا مراتي بقت مديره مباشره عليها.

كل دا عشان عملاء مراتي زودوا من العقود السنويه بتاعتهم!!!

نفسي اسيب الشركة بس هيبقى غباء مني ومش هلاقي شركة زيها خاصه في الوضع اللي بقينا فيه.

يا ريت تقولولي اتأقلم ازاي مع الوضع. انا مش بحسس مراتي بحاجه وبالعكس بقيت بحاول افصل الشغل عن البيت اكتر بحيث اننا منتكلمش عن الشغل نهائي في بيتنا بس بحس مش كفايه وبحب مراتي لكن الترقيه اكيد عكرت صفو حاجة جوايا

 

رد بريد قراء بوابة العاصمة

روح إتفرج على فيلم مراتى مدير عام

وركز وشوف النهاية هتعرف ان الدبور

اللى بيزن فى ودانك ده وهيخليك تنفسن

من المدام وتغير منها هو البداية لخراب

حياتك .. فشوف الحكاية من زاوية تانية

شوف ان ترقية مراتك ونجاحها من نجاحك

وان مراتك مهما كان شطارتها فى الشغل

وتميزها ماكنتش برضه هتقدر تنجح لو

مش موجود معاها زوج متفهم لطبيعة شغلها

فإستعيذ من الشيطان ده وكل حاجة هتبقى تمام

وربنا يصلح اللى فى قلبك يارب ويهديه

ويهديلك نفسك