بداية كلامي انا لا بشمت ولا ده طبعي خالص كنت عايز افضفض مع الناس شويه وانزل تجربتي وهيا مش مشكلة علي قد ما هيا تجربة مريت بيها انا مسافر

 السعودية ولما نزلت اجازة علشان اتزوج اول حد فكرت فيها هيا بنت خالتي وقولت لوالدتي وعرضت عليها الموضوع قالتلي بالنص دي في آخر سنه في طب بشري ودكتورة وبلاش احراج قولتي لوالدتي وأنا مش غرضي انها دكتورة انا هتقدملها علشان انا عارفها وعارف أخلاقها وفين الاحراج يا ماما هيا دكتور بس برضو راجل محاسب عام وليا وضعي في شغلى قالت براحتك وروحنا فعلا اتقدمنا ويا ريتنا ما روحنا قالوا اسبوع ونرد عليكوا كان ابسط شي كل شي نصيب وانتهي الموضوع انا اتقالي كلام من خالتي وزوجها وبنتها عمري ما هنساه خالتي قالتلي احنا مرضناش نزعلك انت محترم وكل حاجه بس هيا دكتورة وانت خريج تجارة واحنا عايزين دكتور زيها زوج خالتي حاول تشوف وحده تكون نفس تعليمك قولتلهم تمام الله يوفقها وبرضو كلمتها وقابلتها في مكان برة وقولتلها ليه رفضتيني قالتلي انت محترم واي بنت تتمناك بس انا عايزة حد نفس تفكيري نكون متفاهمين وانتهي الموضوع والحمد لله ربنا كرمني بأجمل زوجه في الدنيا كلها ورزقني منها بولد وبنت واخدتها معايا السعوديه وبفضل ربنا عندي 30 سنه واول يوم ليا النهاردة في ترقيه في شغلي من محاسب عام الي مدير حسابات ربنا كرمني واشتريت شقه تمليك غير الشقة الي بيت اهلي ربنا كرمني واشتريت عربيه وسايبها في مصر وليا وضعي ومكانتي في شغلى وده كله لا شطارة مني ولا فهلوة ده كل فضل ونعمة عليا من ربنا بنت خالتي بقا الدكتور راحت اتزوجت دكتور كان متخرج قبلها بسنتين لا لسه عمل اسم ولا سمعه ولحد الان لا عارف يعمل اسم ولا سمعه بالإضافة ان والدتي بتحكيلي ان فيه بينهم مشاكل باستمرار بسبب انهم كانوا ساكنيين في مدينه واجبرها تروح معاه القرية عندهم وأهله عندهم ارض زراعية وحصل بينهم اكتر من مشكلة ويمكن كانت هتوصل للطلاق وفي اخر كلامي انا لا بشمت ولا ده طبعي خالص انا بس بوصل للناس رساله ان مش شرط أن بنتك دكتورة يبقي لازم تتزوج دكتور او مهندس او ظابط او طيار وبلاش تبصوا لأي حد تاني باستحقار

دي بتقولي أن مستوي تفكيرنا مش واحد مستوي مين يا ام مستوي

انا راجل مدير حسابات لشركة ميزانيتها تصرف علي كليتك عشر سنين لقدام

وفي نهاية كلامي بوجه رساله لأي حد متخرج او هيتخرج من تجارة أفرح انت في كليه قمه بس استغلها صح

 

 

رد بريد قراء بوابة العاصمة

مش شماته بس لا ده فراغ كمان

انت عملت قرشين شوفت نفسك

ونسيت ان من حقها تختار اللى يناسبها ..

وكل واحد له وجهة نظر

بكره هي أحوالها هتتصلح وحياتها كلها هتتعدل وهتنقل المدينه في ارقي مكان …

ركز في شغلك ، واهتم بزوجتك وأولادك

كل واحد له رزقه كامل

خدت رزقك ، ملكش دعوه برزق غيرك ..

ربنا يوفق الجميع