انى أكره الرجال. ( قصة قصيرة)

بقلم سهير عسكر
وقفت الفتاة الحسناء ذات الوجه والصوت الملائكى الملئ بالبراءه وكأنها طفله فى عامها اﻷول يخطو خطاه اﻷولى نحو عالم الكبار تلتف قدماها وتتلعثم وتنهمردموعها أمام دكتور الأمراض النفسية
-دكتر أنا بكرة الرجالة
ضحك الطبيب وظهرت أسنانه جليه تحتلها سنه ذهبيه براقه وقال لها بوقار يشبه الشيب الذى يزدان به رأسه شبه الصلعاء وازدادت جبهته لمعانا ثم اقترب منها وهمس فى أذنهابابتسامة عريضة مستفزة
-يابنتى مفيش ست بتكره الرجالة وﻻ راجل بيكره الستات
أجابت بنبرات تمتزج بها الحيره والدهشة معا:
-أمال أنا بكره الرجالة ليه؟
-بعد ما تتجوزى مش هتكرهيهم
-تفتكر
وعادت الفتاه بعد عام كامل بنفس الهيئه ونفس النبره الحزينه وكأنها كانت باﻷمس
-دكتر أنا اتجوزت ولسه بكره الرجاله
-بقالك أد ايه متجوزة ؟
-3شهور
-يابنتى 3شهور مش مدة كافيه تحكمى فيها على علاقتك بجوزك،وبعد مناقشه دامت طويلاً وبعدما أرهقها حكم ومواعظ عادت الى بيتها بخمسمائه علامة استفهام جديدة ﻻتفسر حالتها
-أنا مريضة وﻻعندى حاله نفسية وﻻعقدة وظلت تسأل نفسها
وبعد عشرة أعوام
عادت للطبيب وقدظهرت عليها علامات الكبر.اختلفت نبرتها وازدادت كآبه
-أنا متجوزة بقالى 10 سنين وكرهت الرجالة أكتر وأكتر ايه حل مشكلتى؟
-روحى وابعتيلي جوزك
وحضر الزوج
-يا دكتر دى ست مجنونه تروح المطبخ عشان تغسل المواعين توصل لباب المطبخ تنسي هى عايزة ايه؟
-هو حضرتك بتشتغل ايه؟
-نجار مسلح ﻻمؤاخذه بس خلى بالك أنا واخد اﻻعداديه يعنى بعرف اقرا واكتب
-ومراتك
-مالها ﻻمؤاخذه
-واخده ايه؟
-أنا عارف أسانس باين آهى من بتوع الكليات اللى ماﻻقوش شغل وقعدت ﻻمؤاخذه لما عنت في البيت وجيت أنا اتجوزتها وانتشلتها من الوحل اللى كانت عايشه فيه أصلها كانت فقيرة دقه بعيد عنك مكنوش ﻻقيين اللضى
-مفكرتش مره تجيبلها هديه؟يابني الست دى كائن حساس يعنى ﻻزم تعاملها معامله خاصه
-يعنى اعملها ايه؟دانا يا دكتر بجيب كيلو اللحمه أبو 150جنيه وبدفع فيه 200جنيه للجزار عشان يديهولى مشفى وبجيب التفاح أبو 20جنيه ب30أحمر ويستاهل بقك .أبقى قصرت في ايه؟
-الست يوم ما تهاديها تكون الهديه ورده ازازة برفان أضعف اﻻيمان كلمه حلوة
-الله احنا يا دكتر هناكل ورد انت عارف كيلو الفراخ بقي بكام النهارده .أنا راجل شقيان أنا فاضي للورد والكلام ده ماغنيلها أحسن طاب بذمتك كيلو الكباب مش أحسن من البرفان والقطران اللى بتقولى عليه ده.اﻻ قولي هى عندها ايه؟
-والله يابني أنا كنت محتار فى حالتها من سنين طويلة بس النهارده أنا عرفت عندها ايه؟
-ايه ﻻمؤاخذه؟
-حاجه اسمها سوء اﻻختيار
تمت****