انا مكتوب كتابي بقالي عشر ايام وفرحي بعد ست شهور  كتبنا الكتاب بدري عشان ظروف سفري معاه 

 

طول فتره الخطوبة حصل تطاولات كذا مره بالشتيمة ف الاول كنت بسكت واعيط شويه والموضوع يخلص

بعدها بقيت اتعصب وانهار من كتر سب الدين والسب لاهلي

هو بيقول عليا اني بستفزه

انا مش هقول علي نفسي ملاك انا دايما بكون رد فعل علي كلامه او تصرفاته بس مش بتسفزه للدرجه ال تخليه يسبني كل شويه ويهني

الموضوع ف ان اهلي محترمين بطريقه غلط

مش عارفه دا احترام ولا سذاجه وضعف منهم مفيش مره روحت اشتكيت وجابولي حقي انا بنت وحيده

كل ال هما عايزينه انهم يجوزوني ويستروني عشان مش اكبر فالسن وقطر الجواز يفوتني

مع اني بشتغل وبصرف علي نفسي ومش مشيلاهم هم

كل مشكله كانو بيبقو سلبيين فيها اوي في حد يقربلي حاولت تجيب حقي كام مره بس كانت مش بتعرف بردو تاخد حق ولا باطل

المهم

المفروض بغض للنظر عن شتيمته واهانته انه بيحبني عشان كان يعرفني من زمان

بيبقي معاايا كويس وفجأه من قعده واحده مع اهله بيتحول بيبقي شيطان وعلي طول يسلطوه عليا

هو طبعا مش شايف انهم وحشين عشان اهله

لتظلمت من الناس دي كتير اوي

وحاولت امشي الدنيا كتير زي م بيتقاالي بس مبقتش قادره

بعد كتب لكتاب بقي بيتعامل معايا اني مراته يعني يبيع ويشتري فيا زي مهو عايز حصل مشكله علي العفش ف لقيته بيغلط فيا قولتله انت عويل

(ملحوظه)

انا اتساهلت انا واهاي معاه ف كل حاجه من يوم الخطوبة وتنازلت فالموخر بعد م كان ٣٠ بقي ١٠

بحجه لنه مستخسر يدفع للمآذون

وتنازلت فالعفش ف كذا حاجه ومسهله عليه الدنيا خالص

 

بعد م شتمته ب يعويل وقفلت اتصل شتمتني اوحش شتيمه

وبعدها اتصلت والدته واخوه علي امي وشتموني ب اقذر الشتايم ان ازاي اشتم ابنهم واقول ياعويل

مع ان مفيش حد فيهم ولا مره وقغله وهو بيشتمني

وحكمو عليه امه واخوه اني اروح ابوس رجله واتاسفله او يطلقني

بيمسكوني من ايدي ال بتوجعني عشان مش ابقي مطلقه

هتسالو فين رد اهلي

مفيش حد رد ابويا قعيد وامي قالتلهم عيب ماينفعش ال بتقولوه ده مايصحش انتو كدا بتظلمو وبتغلطو

 

حاسه اني عايزه اموت نفسي ولا يييجي عليا لحظه اني اروح اعتذرله. واعيش مكسوره بقيه عمري قصاده

وبالله عليك تنزله النهارده عشان اهلي عايزني اروح اعتذرله

 

رد بريد قراء بوابة العاصمة

دا اسمه انفصال مش طلاق حبيبتي انتي لسه مدخلتيش عشان تبقي مطلقه وعادي بتحصل كتير والبنات بتتجوز بعدها عادي

اوعي ثم اوعي ثم اوعي تتنازلي وتروحي تعتذريله ولا حتي اعتذار في تليفون ولا اي نوع من انواع الاعتذار

الانفصال دلوقتي ارحم كتير من طلاقك بعدين ومعاكي عيل ولا اتنين