انا مش مجبرة اكدب ولا مجبرة اعمل تأليف لقصة ولا مجبرة اتعب نفسي في الكتابة دي كلها وعارفة ان فيه ناس كتير ممكن متصدقش الكلام وناس تقول انتي ايه مشكلتك
انا بس حبيت اشاركوا موضوعي
انا من أسرة فقيرة جدا الحمد لله والدتي ووالدتي ناس علي قد حالهم ومش حيلتهم غير معاش بابا 2200 جنيه بالاضافة اني عندي اخت داخلة ثانوية عامة وأخ داخل تالته اعدادي ومعاش بابا يدوم يكفيهم اسبوع انا متزوجه بقالي 4 سنين زوجي حالته المادية كويسة جدا ما شاء الله ربنا يزيدة لما اتزوجني كنت زميلة اخته بالجامعه انا وبابا وماما قولنا ازاي يفكروا فينا بسبب الفرق المادي الكبير الي بينا والمستوى الاجتماعي وربنا كرمنا واتزوجنا ومعانا الحمد لله ولد وبنت من حوالي 6 شهور والدي تعب فجأة وكان محتاج عمليه في القلب واتحجز في مستشفي خاص لانها هيا الي كانت تناسب حالته الصحيه والدي في تعبه ده من تكاليف مستشفي خاص لعمليه لعلاج صرف 40 الف جنيه ووالدي مكنش معاه من المبلغ ده حاجه خالص والي شال كل التكاليف دي زوجي بعد ما والدي قام بالسلامه الحمد لله قعد معايا ومع ماما ومع زوجي وقال لزوجي انت عارف حالتي المادية استحملني وانا بسددلك كل شهر 1000 جنيه انتوا متخيلين يدي زوجي كل شهر 1000 جنيه ويبقاله من المعاش 1200 جنيه يعيشوا بيهم شهر كامل بابا وماما واخواتي الي في تعليم زوجي رفض طبعا بابا قاله وانا مش هقبل على نفسي الفلوس دي علشان خاطري ريحني لاقيت ماما جايبه شنطه فيه خاتمها والحلق بتاعها وخاتم اختي بتقولي دول بحوالي 15 الف ويسدد ليكوا كل شهر 1000 جنيه استحملونا زوجي قالهم ايه الي بتعملوه ده لا طبعا بس انا عندي حل تاني ال 40 الف انا هأخدهم من دهب بنتكوا لاني محتاج فلوس والدي قاله وبنتي ذنبها ايه لا طبعا قاله انا محتاج فلوس ومش عيب لما بنتكوا تشيلكوا في زنقتكوا وانا جاي استأذن منكوا ابيع جزء من دهبها بقيمه 40 الف بتوعي وبالفعل اقنع بابا وماما وزعلوا في نفسهم جدا وبابا وماما قالولي سامحينا يا بنتي لما يقدرنا ونسدك قولتلهم انتوا صحتكوا عندي في الدنيا وهو طلب جزء من دهبي مقابل فلوسه وانا برد جزء من جمايلكوا عليا وبالفعل زوجي طلب جزء بسيط من دهبي بقيمه 40 الف وجبتله الدهب واخدهم باعهم واخد الفلوس وانا في ذهول وزعل منه ومش قادرة أصدق زوجي وحبيبي يعمل معايا كدا وكتمت الزعل جوايا ومقدرتش اعاتبه ولا اتكلم معاها بسبب حبه واحترامه ليا وقولت ده حقه وهو اولي بيه بس برضو كنت زعلانه جوايا جدا بعد الموضوع ده بشهر لاقيته جايبلي هديه خاتم دهب قولتله مناسبته ايه قالي هو انا لما اجيب لمراتي هديه يبقي لازم مناسبه مكنتش عايزة اخده لاني كنت زعلانه جدا بس اخدته قولت يمكن بيراضيني علشان الموقف الي عمله واخدت الخاتم علشان ميحسش اني لسه زعلانه بعديها بي 4 شهور لاقيته بيقولي انا عايز اغيرلك علي دهبك قولتله ليه ما دهبي كويس قالي لا هنغيرة روحنا بيعنا دهبي الباقي كله واشتري طقم غيرة من نفس المحل ودفع لمحل الدهب 41 الف فرق لما روحنا قولتله ليه بتعمل كدا ليه مصمم تحرجني قالي ايه الي حصل لده كله قولتله انت بترجع دهبي تاني الي اخدته دي فلوسك وحقك وأهلي مديونين ليك بالفلوس دي قالي موضوع اهلك ده اتقفل من زمان وفلوسهم انا اخدتها كامله والي بعمله ده ملوش علاقه بأهلك واحد بيحب مراته وعايز يغيرلها الدهب بتاعها واحد بيجيب لمراته هديه ايه علاقه ده بدة وبعدين بقا انا عايز هديه تشتريلي ساعه حالا وغير الموضوع وقفله قولتله انا كده مش مرتاحه كدا انت ما اخدتش فلوسك قالي انا اخدت فلوسي كامله ومليش علي اهلك اي جميلة وموضوع اهلك ده اتقفل اخر واول مره تتكلمي فيه وأهلك ميعرفوش اي حاجه عن الي حصل دي اسرار بيني وبينك ومتتحكيش لأهلك وانا نفسي احكي كل الي حصل ده لأهلي لأنهم واخدين علي خاطرهم خالص منه وزعلانين من جواهم جدا
__________________________________________________
رد بريد قراء بوابة العاصمة
هوا الراجل دا تبارك الله عليه
حس ان اهلك محرجين حب يرفع عنهم الاحراج وقال ان بنتهم تسدد اولي وهوا مكنش محتاج ال٤٠ الف ولا حاجه هوا حب يبين انو محتاج عشان يبقي بنتهم ال دفعت
ومن ناحية تانية عوضها اضعاف ربنا يرفعو اضعاف
