انا مش عارفه هي مشكله ولا فضفضه بس انا محتاجة رائي كل واحد فيكم بجد 

انا مطلقه وعندي ٣٥ سنه حرفيا عيشت مع طليقي فترة كانت وحشه اوووي اتعرضت فيها لكل انواع الاذي النفسي والجسدي مع انه للاسف كان علي قصه حب كبيرة بس انا في الاخر اخترت نفسي واطلقت والحمدالله مفيش اطفال .. قبل جوازي كان فيه شخص بيحبني وعايز يتجوزني وانا كنت وقتها مرتبطه بطليقي في رفضته واتجوزت .. اول ماعرف اني اطلقت ظهر في حياتي تاني وعايز يتحوزني انا في البدايه وضحتله كل حاجة وقولتله اني لسه خارجة من تجريه كانت كلها سيئه ومش هعرف ادخل في اي علاقات دلوقتي لحد لما اتعافي نهائي من اللي كنت فيه وهو كان مصمم بشكل فظيع وانه معايا لحد لما ابقي تمام وكدا .. كان حرفيا ميعديش يوم غير لما يسالني ها بقي محبتنيش او لسه تمام في كنت دايما بحس منه بضغط في الموضوع انه عايز دلوقتي ومفيش صبر عليااا وانا والله العظيم رفضت الموضوع كتير اووووي لاني عارفه نفسي مش هتعافي في يوم وليله وهو لما ظهر في حياتي كنت لسه متطلقه في مكانش عندي استعداد اني ادخل في اي علاقه .. بعد ألحاح منه فظيع قولت خلاص هدي نفسي فرصه ودا اكيد العوض وكدا ان ربنا بعته في الوقت دا .. هو شخص حرفيا فيه اي حاجة اي بنت تتمناها جدع وحنين وطيب وابن بلد ويتمنالي الرضا ارضي ومتقبلني باي وجع واي شكل وبيحلفلي انه قعد يدور عليا كل السنين اللي فاتت ديه وانا عارفه انه صادق بصراحة وخلال التلت شهور اللي المفروض انا بدي نفسي فرصه فيهم كان دايما بيحاول يطمني انه غير الرجاله وانه هيحافظ عليا وحاول بكل الطرق يفرحني ويخليني كويسه .. المشكله بقي فيا انا انا اللي مش عارفه اتعافي نهائي ولسه مش مستوعبه اللي حصلي من طلبقي اصلا في بالتالي مش قادرة اديله اي حاجة ولا اتصال ولا اهتمام ولا اي حاجة وهو برضو كان حرفيا كل شويه يعاتبني ويضغطني اني مبهتمش او مبتصلش كل مكالمه لازم وانا اصلا مفيش ضغط ولا حيل للمناهد ولا عندي طاقه او مشاعر حب علشان اديها لحد بالعكس حاسه انه ضغط عليا وضاغطني واني كنت صح لما قولتله اخد وقتي براحتي بس والله كان بسبب ضغطه عليا .. انا دلوقتي محتارة ومش عارفه اعمل ايه حرفيا بقول خلاص اتجوزة واجي علي نفسي لان سني كبر ونفسي اشوفلي عيل وخلاص واكبد مش هقعد من غير جواز في اللي اعرفه احسن من اللي معرفهوش واقول كفايه عمري اللي ضاع علي طلبقي من ساعه ما ارتبطنا واتخطبنا واتجوزنا مش هضيع اللي جاي عليه كمان .. وساعات بجبر نفسي قلبي وعقلي عليه واحس اني متقبلاه واقول خلاص هو دا بالعافيه وكفايه انه كويس وساعات بحس اني مش قادرة اعمل كدا ومش عايزة اعيش مضغوطه لان ابسط حقوقه انا مش عارفه ادهاله زي الاتصال والاهتمام وكدا في ازاي هتجوزة اصلا ويبقي ليه حقوق شرعيه واكتر حاجة مأثرة فيا موضوع ( العلاقه الخاصه ) حاسه اني مش هعرف اعيش او اتعايش مع شخص تاني في الموضوع ابدااا هو كان طليقي وخلاص في هل دا ليه حل ؟ .. انا مخي واقف ومش عارفه اتصرف وفي نفس الوقت مش عايزة اخسرة لانه شخص فعلا كويس في مش عارفه اللي انا فيه دا طبيعي لاني مأخدتش وقتي ولا العيب فيه لانه مدانيش وقتي ودايما يعاتب فيا ويضغطني ؟ وبرضو عايزة اقرر علشان احرام مسيبهوش متعلق بالموضوع كدا .. في اللي عندة نصيحة او حل بالله عليكم يقولي عليه

رد بريد قراء بوابة العاصمة

كلميه وقولي له انك محتاجة تاخدي وقتك ومش مستحملة اي نوع من انواع الضغط وانك محتاجة على الاقل سنة علشان تتعافي وخلال السنة دي انت مش عايزة اي نوع من انواع التواصل واعمليله بلوك هو واي حد يحاول يضغطك بأي شكل

ماترضيش حد على حساب نفسك ابدا وبعد السنة تكوني تعافيتي وعرفتي تقيمي دنيتك صح