اللي حصل امبارح لمعرفة الهلال ليه شقين شق فلكي وشق ديني..

كتبت : د. شاهي علي…. الفيوم
فلكياً: علشان نحدد بداية دورة القمر الجديدة لازم يحصل حاجة اسمها الاقتران، اللي هو وجود القمر بين الشمس واﻷرض على خط مستقيم واحد، وبعدين القمر يبتدي يتحرك علشان يعمل دورة جديدة.

طيب النهاردا الاقتران دا حصل الساعة ١٢ ظهراً بتوقيت القاهرة، وغروبه كان بعد غروب الشمس بوقت قصير جدا (حوالى 6 دقايق) يعنى لسه ضوء الشمس موجود في السماء ومغطى ضوء القمر ولذلك تعذر رؤيته؛ لإن علشان نشوف الهلال الجديد لازم يفضل في السماء مدة لا تقل عن 20 دقيقة فيكون ضوء الشمس اختفى تماما.

ولكن دا محصلش في جميع قارة أُستراليا وإفريقيا وأوربا، وفيه بعض اﻷماكن القليلة جدا فاﻷمريكتين ممكن يشوفوه بالتلسكوب، إنما الرؤية بالعين المجردة مستحيلة من أي يابسة.

من الناحية الدينية: قال الرسول عليه الصلاة والسلام: “صُومُوا لرؤيتِهِ، وأَفْطِرُوا لرؤيتِهِ، فإِنْ غُمَّ عَلَيْكُم فَأَكْمِلُوا العِدَّةَ ثَلَاثِين”
ودا معناه إن لو تعذرت الرؤية لأي سبب فلازم نتمم الشهر ثلاثين يوماً، والكلمة اﻷخيرة بتكون للفقهاء من دار الإفتاء، وبيكون قرارهم بمساعدة الفلكيين، الموضوع كبير أوي…

[وَالْقَمَرَ قَدَّرْنَاهُ مَنَازِلَ حَتَّى عَادَ كَالْعُرْجُونِ الْقَدِيمِ (39) لا الشَّمْسُ يَنْبَغِي لَهَا أَنْ تُدْرِكَ الْقَمَرَ وَلا اللَّيْلُ سَابِقُ النَّهَارِ وَكُلٌّ فِي فَلَكٍ يَسْبَحُونَ] (سورة يس: الآيتان 39، 40). صــــــدق الله العظـــــــــيم

عموماً دي فرصة أخيرة لينا بدعوة مستجابة أو استغفار مقبول