السلام عليكم ورحمة الله وبركاته معلش المشكلة طويلة شوية لكني مشتت والله ومش عارف اعمل ايه ومحتاج افضفض..
انا مغترب من ٥ شهور تقريبا،عمري ٣٤ سنة وأعزب ابويا وأمي متوفيين، القصة إن كان فيه بنت فى حياتي من ١٤ سنة كنت ٢٠ وهي ١٨ وبعدنا عن بعض وقتها لاني كنت نبهت عليها ملهاش علاقة بشخص معين وهي فعلا قالت تمام وان ملهاش علاقة بيه، لكن تشاء الاقدار اني اكون خارج من الشارع واشوفها واقفة على باب المحل بتاعه بتضحك معاه وقتها قطعت علاقتي بيها فى لحظتها حتى مسمعتش مبرراتها خصوصا بعدها كانت بتزعق مع امه علشان يبعد عنها وكانت بتتعمد اني اشوف ده بنفسي بحكم ان الريف كله منفد على بعضه، المهم راحت الايام وجت وبعد ما اغتربت باسبوع بفتح فيس لاقيت صفحتها اودامي، بعت لها السلام وعاملة ايه وبالفعل ردت تاني يوم ومع الكلام عرفت انها خلفت اتنين وهما مع ابوهم لانها انفصلت من ٣ سنين، طلبت رقمها وفى اول المكالمات لاقيتها بتقول انها صابغة شعرها وبتروح حمام مغربي وكدا ولما استفهمت قالت لنفسها، المهم غيرت دفة الحوار وعبرت لها عن حبي السابق واني فعلا منستهاش ومكنش ينفع اتواصل معاها لانها متزوجة واتعاملت معاها بنفس الشغف القديم لأنها حب عمري، المهم بعد كام شهر بدأت تلمح ان اللي بيتقدموا لها كتير وانها فى ضغط بسبب كدا، بصراحة كلمت امها لان تقريبا والدها طيب شوية وحكيت لها ظروفي واني لما انزل هنتجوز فى سكن لحد ما نشوف مكان مناسب، وتمام تمام، قالت وهي بتكلمني انها هتجيب دبلة ومحبس وحولت لها فلوس وهي كملت عليهم علشان تجيب الدهب لاني اتفاجئت منها انها جابت دبلة وخاتم مع اني مكنتش لسه حولت لها باقي الفلوس، قالت انها حبت تعملي مفاجأة حتى كنت نايم وصحيت على رنة ماسنجر وعملت اني فرحان علشان متزعلش، المهم بعدها اتكلمت فى لبسها واني حابب الخمار الماليزي وبعت لها ڤيديوهات ليه ولطريقة لفه لكنها رفضت بحجة انه مبين شعرها وان امها رفضته وعرفت بالصدفة من امها انها اخدت رأيها بس ومقالتش ان انا اللي طلبت وهي لحد النهارده رفضاه، وطبعا قلت انها هتنتقب والرد لما تبقى عندي وده منطقي يعني، المهم ان اتفقنا انا وهي ان مفيش مكياچ ولا عطور والطرحة تتلف زي الخمار علشان تستر جسمها بدل ما بتترمي على الكتف كدا بحكم انها بتتعامل مع شباب ورجالة فى مكان شغلها غير ان ليها ظروف خاصة، اتفاجئت لما كانت فى مصيف ان الطرحة مرمية على الكتف عادي مكنتش مبينة شعرها ولا حاجة بس مش ده اتفاقنا ولما اتكلمت معاها قالت عادي ده مصيف، حتى المكياج خف ولما اتكلم برضو لاقيت الرد عادي ده خفيف او كريم اساس يعني حاجة من هذا القبيل، بعدها كانت بتكلمني فى الشغل ونادت عليا بأسم حد معاها فى الشغل وكان كلامها عفوي واعتذرت وقالت مش هتتكرر وانه متجوز وبيحب مراته وانها زلت لسان علشان بتنادي عليه كتير بسبب انهم بيستلموا شغل من بعض، بعدها باسبوع، قالت انه فيه حد معاها فى المكان كان عايز يتقدم لها وانه چنتل مان فى نفسه كدا ومعاه عربية، وقتها اخدت موقف ورجعت اعتذرت وقالت ان اللي معاها هما اللي بيقولوا عنه كدا مش هي مع العلم ان كلامها كان واضح، المهم تاني بدأت احس ان كلامها بيقل وتكلمني وقت فراغها غير انها بتيجي ساكتة ولو متكلمتش المكالمة بتنتهي عادي، عمرها ما اهتمت بتفاصيل حياتي حتى لو قلت لها عندي مشكلة فى الشغل بتسمع وبعدها مش بتسأل عملت ايه فى المشكلة، لدرجة اني طلبت منها تهتم شوية لكن بلا جدوى، كتير كنت بلقاها موجودة على كذا ابلكيشن ومش بترد وتقول بعدها كانت فى الحمام او نايمة وسايبة النت مفتوح واني كدا مش واثق فيها غير نبرة الصوت اللي بدأت تعلى زي “بقولك ايه انا على أخري” وياعم” و أوف ويوه” عرفت من حد ان طليقها اتجوز فى نفس الوقت ده ولما قلت لها ان ده سبب اسلوبها قالت خالص وان عندها ضغط شغل بس ومن فترة قريبة اول مرة اشتكي لامها من الاسلوب ده بس مقلتش لها التفاصيل دي، قالت ممكن لاني بعيد وانها عانت فى حياتها الاولي ومعظم الوقت نايمة مع العلم ان امها بتنزل شغل من ٧ المغرب ل ١١ تقريبا فى مكتب محامي وهي فى الوقت ده بتكون فى البيت لوحدها المهم امها وسط الكلام قالت بتحصل فعلا حتى انا كنت رنيت عليها من كام يوم وامها اللي ردت وانا قفلت وده محلصش حتى امها طلبت مني صور الصفحات بعتلها الفيس وماسنجر قالت مش هما ولما سألت عن صورة الواتس بعتها ومطلعتش هي برضو وبعدها قالت مش عارفة لانها مش فاهمة اوي فى السوشيال، بعدها كنت بكلم خطيبتي لاني مش بخبي عليها حاجة او مش حابب يكون فيه سوء فهم يأثر على علاقتنا وحكيت لها الموقف مع امها قالت دي بنت عمها كانت بترن عليها والرقم جاي على تروكولر باسم شخص وقالت لو مش مصدق خدم الرقم وشوف مين هيرد عليك، المهم عديت وموقفتش عند الموقف ده، لكن كذا مرة اكون بكلمها وتقول سلام هعمل حاجة ومش بتستني حتى اني ارد، يعني مثلا كنا فى مشكلة ورنت عليا وهي فى الشغل وكانت عارفة فعلا انه مش وقت كلام ولا حل مشكلة وانا رديت خلصت كلامها ولما بدأت اتكلم علشان نوصل لحل لاقيتها قالت طيب انا هقفل علشان بينادوا عليا وملحقتش ارد اصلا غير اني لاقيت اني كنت بكلم نفسي فترة وانها قفلت بالفعل رنيت على الرقم لاقيتها قفلت التليفون خالص وقالت عيب شبكة، ونفس الموقف اتكرر فى حضور بنت عمها اخرها من اسبوع بنتكلم وبعدين بنت عمها دخلت لاقيتها قالت هكلمك تاني وبرضو مهتمتش اسمع او ارد، صليت استخارة كذا مرة وكل مرة كانت بتظهر لي انها ماسكة التليفون وبتتواصل مع حد بصراحة قلت لها ده قالت عادي عقلي الباطن بس، غير ان فى بداية العلاقة قلبت فى الفيس وانستجرام لاقيت فيهم كذا اكونت متابعينها وصور بروفايلاتهم جنسية، قلت لها ايه ده قالت متعرفش وهما اللي بيتابعوها وانكرت معرفتها بالناس دي تماما، وطلبت تقفل صفحاتها دي وتعمل غيرها جديد رفضت، لكن علشان امشي الدنيا طلبت تعمل حظر للأكونتات المشبوهة دي والصفحات تبقى برايڤت وفعلا عملت كدا بس بعد مناهدة لاكتر من اسبوع، هي بتعمل اللي هي عيزاه ودماغها ناشفة وعينادية وصوتهم فى البيت مع بعض عالي اصلا،لكن
قالت كذا مرة انها هتتغير وبتتغير علشاني، واني السبب علشان سبتها زمان، لكن كل مرة بتضمن وجودي وغفراني بتسوء فيها فعلا وترجع لطبيعتها، اخر حاجة من كام يوم عندهم فرح بعتت لي اكتر من فستان وانا اخترت واحد فضي وفضفاض شوية لكنها اختار واحد تاني ضيق شوية عن التاني ولونه نبيتي وقالت انه واسع بس انا مش واخد بالي لاني مش موجود والصورة ظاهراه ضيق، من اربع ايام كنت بكلمها وقالت شوية وهتكلمني قلت ماشي فرح وبتاع وليها ظروفها واكيد مش فاضية للتليفون، لكن رنيت على رقمها لاقيته مشغول رنيت بعدها بشوية كنسلت كلمتها ماسنجر فتحت وكانت امها واختها بيتكلموا المهم قفلت وهي رنت تاني لما فضيت بقولها كنتي بتكلمي مين قالت مكنتش بكلم حد انا كنسلت عليك، قررت سؤالي كذا مرة، قبل ما تكنسلي كنتي بتكلمي مين، قالت ان واحدة صاحبتها كانت بترن، قررت السؤال تاني قالت انها كانت بتكلم صاحبتها وبعدين قالت ايه المشكلة انا كنت بتكلم اودامهم عادي يعني وطبعا لان فيه تراكمات وكل مشكلة كانت بتتأرشف مش بتتحل اتنرفزت عليها وطلبت منها باس وورد كل التطبيقات لاقيت نبرة صوتها اضطربت وقالت عادي ممكن تديني الباس ووردات وتكلم ناس عادي من اي اكونت المهم قلت لها طيب انا عايزهم برضو ومن الاخر يا انا يا الباسووردات قالت بنبرة حادة ” وأنا مش هديك حاجة” قلت لها خلاص براحتك وقفلت ومن وقتها لانا سألت ولا هي اهتمت مش عارف اعمل ايه ولا قادر افهمها وخايف اكون ظالمها وفى نفس الوقت خايف حياتنا تكون نسخة عن حياتها السابقة، وكل ده يستدعي الشك خصوصا انها متحفظة ومش واضحة غير انها تعرف عني كل حاجة ولا انا اللي مكبر الموضوع ولا هي بتعاقبني علشان مشيت زمان ولا ايه ..
محتاج أراء حضراتكم..
ملحوظة ؛
هي بتقول انها بتصلي وكانت بتصحى للفجر وكمان بتقيم الليل.
ومن شوية غيرت صورة الواتس وحطت صورة جديدة بمكياچ كامل وفستانها ضيق فعلا ورقبتها باينة لأن الطرحة مش ملفوفة هي مسدلة وداخلة فى فتحة الفستان، غير كذا حالة على الفيس ليها مع بنات عمها وهي وابن عمها لوحدهم والاغاني الشعبي اللي هي معناها مش فارق معانا
حاجة دي
رد بريد قراء بوابة العاصمة
علي الرغم من طول المشكلة جدا لكن قرأته كله… وخلاصة القول في نقطتين :
🔸 لا أنت تصلح لها ولا هي تصلح لك.
🔸نصيحتي لك أبحث عن من ثتق فيها ثم لا تبحث وراها في كل تفاصيل حياتها.
